کتب خانہGranth 3 (Shahmukhi)

✫ ۷ جیٹھ ۲۰۱۰ بِکرمی پِنڈ جیٹھوُوال جیِون سِنگھ دے گِرہ ضِلع امرتسر ✫

لِکھی لِکھت ہرِ آپ مِٹائے۔ ساچا لیکھ پھیر لِکھائے۔ جھوُٹھا بھیکھ رہے نہ رائے۔ مہاراج شیر سِنگھ وِشنوُں بھگوان، آپ چلائے اپنے بھائے۔ اپنے بھانے آپ چلاونا۔ گُرمُکھ بُھلیاں راہے پاونا۔ وِچ سنسار پھلے پُھلیا، پربھ ابناشی رسنا گاونا۔ چرن پریِتی گھول گھُلیا، آتم رس ہرِ سچ دواونا۔ سچ بھنڈارا پربھ دا کُھلیا، در منگیا دان پربھ ساچے جھولی پاونا۔ آد بیادھ مِٹائی۔ آتم سادھ دَیا کمائی۔ وِچ وِرودھ رہے نہ رائی۔ ایکو ایک پایا ہرِ رگھُرائی۔ ساچی دیوے نام وڈیائی۔ پربھ ابناشی مادھوَ مادھ ہوئے آپ سہائی۔ مہاراج شیر سِنگھ وِشنوُں بھگوان، لِکھی لِکھت دیوے مِٹائی۔ لِکھیا لیکھ دُھردرگاہی۔ پربھ ساچے آپے آپ دئے مِٹائی۔ ساچا لیکھا گھر ساچے آپ دئے لِکھائی۔ گُرمُکھ ساچے آپ ترائے پھڑ کے دوویں باہیں۔ پھڑے دوویں باہیں، کلجُگ

جیِو بُھلیا پربھ ساچا پائے راہی۔ پوُرے تول جو جن تُلیا، دیوے وڈیائی سبنی تھائیں۔ ہرِ دوارا سدا رہے کُھلیا، گُرمُکھ ساچے جھولی بھر گھر لےَ جائی۔ مہاراج شیر سِنگھ وِشنوُں بھگوان، جِس جن نہ بُھلیا، پربھ ساچا ہوئے سہائی۔ بُھلنا بُھلانا، رُلنا رُلانا، کُلنا گاونا، در گھر ساچے گُرمُکھ ساچے بُھل بخشانا۔ آتم کایا بھانڈے کاچے، پربھ ساچی وست ٹِکانا۔ ہرِ ہِردے جن ساچا واچے، پربھ ساچی لِکھت لیکھ کرانا۔ مہاراج شیر سِنگھ وِشنوُں بھگوان، گُرسِکھاں وقت سُہانا۔ وقت سُہاوا آپے کیِیا۔ سوہنگ بیِج ساچا بیِیا۔ آتم جوت جگایا ساچا دیِیا۔ گُرسِکھ تیری آتم جوت جگائی، مہاراج شیر سِنگھ وِشنوُں بھگوان، نِرمل کرائے تیرا جیِیا۔ نِرمل جیِیا نِرمل بُدھ۔ آپ کرائے گُرمُکھ کارج سِدھ۔ آپ بنائے اپنی بِدھ۔ تن من در گھر ساچے آپ اُپجائے گھر نوَ نِدھ۔ مہاراج شیر سِنگھ وِشنوُں بھگوان، آپ بنائے اپنی بِدھ۔ نوَ نِدھ ہرِ آپ اُپجاوے۔ دُکھ بُھکھ ہرِ روگ گواوے۔ ساچا سُکھ ہرِ گھر اُپجاوے۔ اُجل مُکھ جگت رہ جاوے۔ گُر چرنی جو جن سیِس جھُکاوے۔ مہاراج شیر سِنگھ وِشنوُں بھگوان، گُرمُکھ ساچا دِوس ریَن سد رسنا گاوے۔ رسنا گاونا دُکھ مِٹاونا، بُھکھ گواونا، سُکھ اُپجاونا، مہاراج شیر سِنگھ وِشنوُں بھگوان، نیتر پیکھ آتم شانت کراونا۔ نیتر پیکھ دیِن دَیالا۔ بھگت وچھل ہرِ ہرِ کِرپالا۔ گُرسِکھاں دیوے آپے بالا۔ چرن پریِتی لگان گھالا۔ سُکے پھوُل لگائے ڈالا۔ آپے بنے گُرسِکھ تیرا گُر دلالا۔ سوہنگ دیوے آتم ساچی مالا۔ گلوں کٹے پربھ ساچا جگت جنجالا۔ مہاراج شیر سِنگھ وِشنوُں بھگوان، گُرسِکھ تیرا کدے نہ کنگالا۔ آپ جنجالا دیوے کٹ۔ سوہنگ تن پہنائے ساچا پٹ۔ ہؤمے مَیل پربھ ساچا آتم دیوے کٹ۔ ایکا آتم نیِر وہائے، ایکا تیِرتھ ایکا تٹ۔ پربھ ابناشی جوت جگائے وسے گھٹ گھٹ۔ مہاراج شیر سِنگھ وِشنوُں بھگوان، دِوس ریَن پہنائے ساچا پٹ۔ بُھکھ دُکھ گیا روگ۔ آپ مِٹائے چِنتا سوگ۔ دیوے درس ہرِ اموگھ۔ ایکا سوہنگ بخشے ساچا جوگ۔ مہاراج شیر سِنگھ وِشنوُں بھگوان، آپ کرائے آپن چوج۔ چوجن چوجی کھوجن کھوجی۔ آپے دیوے پربھ ساچا روزی۔ پرگٹے جوت ہرِ ہرِ ہرِ چتُر بھوجی۔ مہاراج شیر سِنگھ وِشنوُں

بھگوان، گُرسِکھ رکھائے اپنے مؤجی۔ مؤج میلا وقت سُہیلا۔ سچ کھیل پربھ ساچے کھیلا۔ مہاراج شیر سِنگھ وِشنوُں بھگوان، آپ کرایا اپنا میلا۔ میل مِلاواں اپنا کر۔ دُکھ درد ہرِ جائے ہر۔ جنم کرم دوئے سُپھل کر۔ گُرسِکھ ساچے تیری سرنی جائن پڑ۔ چرن دھوُڑی ملِے مجوُری۔ پربھ ابناشی سدا حضوُری۔ گُرمُکھ ساچے آتم نوُرو نوُری۔ مہاراج شیر سِنگھ وِشنوُں بھگوان، آپ کرائے سرب کلا بھرپوُری۔ بھرپوُرا وڈ سوُرا۔ سد وسے نیڑنا نہ جانو دوُرا۔ جوت سروُپی حاضر حضوُرا۔ مہاراج شیر سِنگھ وِشنوُں بھگوان، ایکا دیوے نام شبد سروُرا۔ شبد نام لیکھا لِکھ۔ دُئی دوَیت اُتارے ترِکھ۔ ساچی دیوے نام بِھکھ۔ کایا لوبھ نہ رہے وکھّ۔ مہاراج شیر سِنگھ وِشنوُں بھگوان، جو جن رسنا گائے سَتجُگ ہووے پوُرن سِکھ۔ مہاراج شیر سِنگھ وِشنوُں بھگوان، رسنا گاؤ۔ نِجانند نِج گھر میں پاؤ۔ پرمانند دے وِچ سماؤ۔ بند بند وِچ جوت جگاؤ۔ آتم کندھ پرے ہٹاؤ۔ سوہنگ چھند آپ سُنو اوَر سُناؤ۔ مدرا ماس رسنا لاؤنا گند، پربھ ابناشی دے سزاؤ۔ مہاراج شیر سِنگھ وِشنوُں بھگوان، وڈ داتا بےپرواہو۔ مدرا ماسی آتم اندھے۔ بتّی دندے کرائے گندے۔ آتم در دروازے وجےّ جندے۔ آتم ہویا اندھیر جِؤں مسّیا چندے۔ مہاراج شیر سِنگھ وِشنوُں بھگوان، انتم دے سزائے سوہنگ رندے رندے۔ سوہنگ رندے آپ رنگاونا۔ ہڈّ ماس ہرِ آپ وڈ وڈ کھڈّ پاونا۔ اٹھائی کُنڈ وِچ پِھراونا۔ دھرم رائے دے ہتّھ پھڑاونا۔ تتیاں تویاں اُتے بہاونا۔ مہاراج شیر سِنگھ وِشنوُں بھگوان، بےمُکھاں نشٹ کراونا۔ دھرم رائے در سچ پُکارے۔ خالی بھر ہرِ میرے بھنڈارے۔ کلجُگ جیِو ہوئے بےمُکھ سارے۔ اندھ اندھیار ورتیا وِچ سنسارے۔ ٹھگّ چور یار لُٹن گھر بارے۔ جھوُٹھی ہوئی مات سرکارے۔ ڈاکے وجّن دِن دِہاڑے۔ نِہکلنک آیا کل جامہ دھار، گھر گھر پَین پواڑے۔ پربھ ساچا دَیا کمائے۔ گُرسِکھاں نام جپائے۔ جگت بھنور چوں باہر کڈھائے۔ مہاراج شیر سِنگھ وِشنوُں بھگوان، سچ دھرم دی جےَ جےَ جَیکار کرائے۔ سچ دھرم سچ جَیکارا۔ سچ سچ کرے جگت وِہارا۔ چار ورن اِک رکھائے سچ دوارا۔ اوُچ نیِچ نہ پربھ وِچارا۔ سوُچو سوُچ آپ

گِردھارا۔ چار کُنٹ در آئے ساچے گُرچرن کرے نِمسکارا۔ مہاراج شیر سِنگھ وِشنوُں بھگوان، سچ سُچ کرے ورتارا۔ سچ سُچ تیرا ورتار۔ سچ سُچ تیرا ادھار۔ سچ سُچ تیرا ہرِ سِکدار۔ سچ سُچ تیری ساچی دھار۔ سچ سُچ ورتاوے وِچ سنسار۔ مہاراج شیر سِنگھ وِشنوُں بھگوان، سَتجُگ ساچے لائے پار۔ سچ سُچ سَت سنتوکھ۔ سچ سُچ گُرسِکھاں دیوے موکھ۔ سچ سُچ آتم نِوارے سب دوکھ۔ سچ سُچ آپ گوائے ترِشنا بھوکھ۔ مہاراج شیر سِنگھ وِشنوُں بھگوان، گُرمُکھاں کرائے اُجل مُکھ۔ اُجل مُکھ گُرسِکھ تیرا۔ پربھ ابناشی آپ کرائے نبیڑا۔ آپ کٹائے تیرا لکھّ چؤراسی گیڑا۔ آون جاون جاون آون، آپ مُکائے جھیڑا۔ پربھ ابناشی پتت پاون، بنّھ وکھائے بیڑا۔ مہاراج شیر سِنگھ وِشنوُں بھگوان، تُدھ بِن پار لنگھائے کیہڑا۔ گُرمُکھاں ہرِ کرم وِچاریا۔ جنم مرن ہرِ آپ سواریا۔ ساچا دھرم ساچا ورن وِچ ساچی جوت جگا رہیا۔ مہاراج شیر سِنگھ وِشنوُں بھگوان، اپنا آپ میل مِلا رہیا۔ مِلیا میل سچ کرتارا۔ چڑھے رنگ اپر اپارا۔ نہ آوے بُھکھ ننگ، سوہنگ دیوے شبد بھنڈارا۔ جو در منگے ساچی منگ، دیونہار ہرِ داتارا۔ ہوئے سہائی سدا انگ سنگ، دِوس ریَن ہوئے رکھوارا۔ آپ چڑھائے امرت ساچی کنگ، آتم چلے سچ پُھہارا۔ مہاراج شیر سِنگھ وِشنوُں بھگوان، گُرمُکھاں بنے آپ ورتارا۔ امرت میگھ آپ برسائے۔ گُرمُکھ ساچے آپ ترائے۔ وِچ دیس ماجھے جوت جگی ہرِ رائے۔ انحد شبد اناحد واجے دِوس ریَن ہرِ رہیا وجائے۔ مہاراج شیر سِنگھ وِشنوُں بھگوان، جوت سروُپی گُرمُکھ ساچے وِچ سمائے۔ گُرمُکھ ساچے پربھ ڈیرہ لایا۔ آپ اپنا بھیو رکھایا۔ وڈ وڈ دیوی دیوَ سرب بُھلایا۔ گُرمُکھ ساچی سیو آپ لگایا۔ مہاراج شیر سِنگھ وِشنوُں بھگوان، سوہنگ ساچا میو مُکھ لگایا۔ پوُرن جوت پوُرن پرکاش۔ اگیان اندھیرا جائے وِناس۔ دُکھاں ڈیرہ ہویا ناس۔ پربھ ابناشی پایا پھیرا، گُرسِکھاں ہویا داس۔ آپ چُکائے تیرا میرا، گُرسِکھاں سوہنگ جپائے سواس سواس۔ مہاراج شیر سِنگھ وِشنوُں بھگوان، مانَس جنم کرائے راس۔ راج دوارا ہرِ بھگوَنت۔ گُرمُکھ ساچے منگن سنت۔ آپ بنائے ساچی بنت۔ دیوے وڈیائی وِچ وِچ جیِو جنت۔ پربھ ساچے دی مہما بڑی

اگنت۔ سوہنگ دیوے ساچا منت۔ مہاراج شیر سِنگھ وِشنوُں بھگوان، سرب جیِیاں دا ساچا کنت۔ سرِشٹ سبائی ایکا کنتا۔ لکھّ چؤراسی وِچ رہنتا۔ بند خلاصی آپ کرنتا۔ سرب گھٹ واسی آپ اکھونتا۔ گھنک پُری وِچ جوت جگنتا۔ ایکا جوت مات پرکاسی۔ مہاراج شیر سِنگھ وِشنوُں بھگوان، آدن انتا۔ آد انت انت آد پربھ ابناشی ساچا ارادھ۔ دِوس ریَن سد رکھنا یاد۔ سوہنگ شبد وجائے ساچا دُھن ناد۔ مہاراج شیر سِنگھ وِشنوُں بھگوان، جوتی جوت سروُپ ایکا جوت آد جُگاد۔ جُگا جُگنتر آپے دیوے اپنا منتر ، جن بھگتاں بنائے ساچی بنتر، مہاراج شیر سِنگھ وِشنوُں بھگوان، سرب جیِیاں دی جانے گھٹ گھٹ انتر۔ آد جُگاد جُگا جُگیِشر۔ سرب جیِیاں دا ایکا اِیشر۔ گُرمُکھ ساچے آپ اُٹھائے چرن لگائے، سؤ جنم رہے تپیِسر۔ مہاراج شیر سِنگھ وِشنوُں بھگوان، سرب جیِیاں ایکا جگدیشر۔ جگدیش پیِت پیِتمبر۔ آپ کرائے اپنا اَڈمبر۔ گُرسِکھاں سنگ پنچم جیٹھ اپنا آپ رچائے سوّمبر۔ مہاراج شیر سِنگھ وِشنوُں بھگوان، جوتی جوت سروُپ وِشنوُں وِشومبر۔ وِشنوُں وِشنوُں وِشنوُں بھگوان۔ برہما بَیٹھ چار مُکھ کرے وِکھان۔ شِو شنکر لائے بَیٹھ دھیان۔ مہاراج شیر سِنگھ وِشنوُں بھگوان، ایکا جوت بلی بلوان۔ شِو شنکر ہرِ دھیان لگایا۔ جٹا جوُٹ سیِس رکھایا۔ باشک تشک گل لٹکایا۔ ہزار اٹھاسی برس ہرِ رسن دھیایا۔ پرگٹ ہوئے ہرِ جوت جوت سروُپ اپنا درس دِکھایا۔ اٹھاسی ہزار برس کیِیا ہرِ تپیشر۔ مِلیا پِھر ہرِ ساچا جگدیشر۔ پربھ ابناشی جوت سروُپ سرب جیِیاں دا ایکا اِیشر۔ مہاراج شیر سِنگھ وِشنوُں بھگوان، سرب دھیان مُنی رکھیشر۔ ہرِ ساچا نہیں بُھلاونا۔ دِوس ریَن رسنا گاونا۔ اپنا موُل نہیں گواونا۔ مدرا ماس رسن نہ لاؤنا۔ کایا کوٹ سُپھل کراونا۔ پربھ ساچا رِدے وساونا۔ سوہنگ ساچا گاونا۔ مہاراج شیر سِنگھ وِشنوُں بھگوان، آتم بھرپوُر شبد کراونا۔ پوُرن آسا دیوے کر۔ جو در منگے آئے ساچے گھر۔ ملِے نام وست پربھ ساچا کِرپا دیوے کر۔ نام خُماری رہنا مست، مہاراج شیر سِنگھ وِشنوُں بھگوان، خالی بھنڈارے دئے بھر۔

در منگن آیا منگتا۔ پربھ توڑے روگ ہنگتا۔ آپ رلائے وِچ سنگتا۔ نام ساچے سچ رنگتا۔ مہاراج شیر سِنگھ وِشنوُں بھگوان، جو در تیرے منگتا۔ منگیا ور ہرِ ساچے مندر۔ پربھ ممتا روگ مِٹائے تن کایا اندر۔ ہرِ ساچی جوت جگائے آپ تُڑائے من کا جندر۔ ساچی جوت ہوئے رُشنائے، مِٹائے اندھیر کایا اندر۔ مہاراج شیر سِنگھ وِشنوُں بھگوان، سوَچّھ سروُپی درس دِکھائے پرگٹ ہوئے آتم اندر۔ سوَچّھ سروُپی سوَچّھ سروُپا۔ پربھ ابناشی وڈ وڈ بھوُپا۔ ہرِ ہِردے سد رکھے واس، نہ جانے کوئی رنگ روُپا۔ مہاراج شیر سِنگھ وِشنوُں بھگوان، آتم جوت کرے پرکاش دیہی اندھ کوُپا اندھ کوُپ جوت پرکاشیا۔ اگیان اندھیر سرب وِناسیا۔ نہ لائی دیر ہرِ ابناسیا۔ مہاراج شیر سِنگھ وِشنوُں بھگوان، کِرپا کرے جو جن ہوئے داسن داسیا۔ داسن داس داس دسیتا۔ ساچا مان چرن پریِتا۔ سوہنگ مان اٹھاراں دھیائے گیِتا۔ مہاراج شیر سِنگھ وِشنوُں بھگوان، اندر اٹل رکھائے چیِتا۔ نِرمل دیہا نِرمل چِت۔ پربھ ابناشی کر ساچا ہِت۔ آپ بنائے اپنا مِت۔ گُرمُکھ تیرا بنے مات پِت۔ مہاراج شیر سِنگھ وِشنوُں بھگوان، دِوس ریَن سد رسن اُچار، مانَس جنم جاؤ کل جِت۔ مانَس جنم جِت کل جاونا۔ ساچا ہِت ہرِ اکھواونا۔ آتم سِنچ سوہنگ ساچا بیِج بِجاونا۔ اُٹھ سویرے نِت، پربھ ابناشی رسنا گاونا۔ ویلا جائے بیِت پھیر ہتّھ نہ آونا۔ آپ چلائے اپنی ریِت، سَتجُگ ساچا مارگ لاؤنا۔ مہاراج شیر سِنگھ وِشنوُں بھگوان، گُرسِکھاں پکڑے دامنا۔ دامن پکڑے دُھر درگاہ۔ ساچے دھام ہرِ دئے بہا۔ اوتھے لیکھا منگے کوئی نانہہ۔ مہاراج شیر سِنگھ وِشنوُں بھگوان، جوتی میل دئے مِلا۔ من تن سیِتل شبد دھار۔ کایا کلجُگ ہوئی سیِتلی، سوہنگ سُہاگا اُپر ڈار۔ سَتگُر راکھو چیِتلی، دیونہار اِک داتار۔ آپ چلائے ساچی ریِتلی، پربھ پوُرن اوتار۔ ہرِ راکھو ساچی میِتلی، مہاراج شیر سِنگھ وِشنوُں بھگوان، آپے دیوے نام ادھار۔ کایا تاکی چار دواری۔ پنجے بَیٹھے بن ہنکاری۔ سِر اٹّھاں رکھے آپ سواری۔ ناویں لٹّھاں رہیا بھوائی۔ دسمیں گنڈھ آپ کُھلائی۔ آتم بھٹّھا آپے چاڑھی۔ مہاراج شیر سِنگھ وِشنوُں بھگوان، کر کِرپا پار اُتاری۔ کایا کوُڑ کوُڑ کُڑیاری۔ جھوُٹھی دیہہ جیِو تن شِنگاری۔

انتم بازی جائے ہاری۔ جھوُٹھی کایا ساجی محل اٹاری۔ وِچ بدھّا ساچا تازی، سوہنگ شبد کر اسواری۔ مہاراج شیر سِنگھ وِشنوُں بھگوان، کل تیری پَیج سواری۔ کایا کپڑا کوُڑ ہنڈھاونا۔ تیِرتھ چّھپڑ جھوُٹھا نہاوَنا۔ نہ کوئی سکے اپڑ، پربھ ابناشی ہتّھ نہ آونا۔ مایا روُپی دِتا کپّڑ، بھرم بُھلیکھا ڈاہڈا پاونا۔ آپ کرائے پاپی پّپڑ، وِشے وِکاراں وِچ رُلاونا۔ سوہنگ شبد مارے تّھپڑ، مہاراج شیر سِنگھ وِشنوُں بھگوان، گُرمُکھاں مارگ پاونا۔ کایا کنچن کاچی ونگ۔ ہرِ کا ساچا نام چاڑھے ساچا رنگ۔ جھوُٹھا تن جھوُٹھا من جھوُٹھا دھن، درس دان سد منگ۔ مہاراج شیر سِنگھ وِشنوُں بھگوان، سدا سہائی انگ سنگ۔ کایا قِلہ کوٹ گڑھ۔ پربھ ابناشی بَیٹھا اندر وڑ۔ دِس کِسے نہ آیا پربھ ساچے وٹّی دڑ۔ گُرمُکھاں آپ جگایا، آپ لگائی ساچی جڑ۔ بےمُکھاں پربھ آپ رُڑایا، کوئی نہ اَگے رہے کھڑ۔ وہِندے وہن جگت وِہایا، پربھ ابناشی چھڈیا لڑ۔ گُرمُکھ ساچا آن ترایا، مہاراج شیر سِنگھ وِشنوُں بھگوان، در گھر ساچے گیا چڑھ۔ کایا ہست است اسوارا۔ ساچا وست شبد اپارا۔ پھڑیا دست سوہنگ کٹارا۔ مہاراج شیر سِنگھ وِشنوُں بھگوان، نرائن نر اوتارا۔ کایا کوُڑ کُٹمبا۔ جھوُٹھی جگت گُلزار دِسے چمبا۔ سوہنگ شبد کماوو رسنا گاوو، پربھ آپ اُڈائے بِن کھنبھاں۔ مہاراج شیر سِنگھ وِشنوُں بھگوان، آپ اپنے رنگ رنگا۔ کایا کوُڑ کوُڑ کُڑیاری۔ پربھ ابناشی کرے خواری۔ جھوُٹھی مایا دے وِچ رُلی، بازی اپنی انتم ہاری۔ جگت اندھیری جھوُٹھی جھُلی، پتّ نہ لگّے رہن اپنی ڈاری۔ مہاراج شیر سِنگھ وِشنوُں بھگوان، سچ تیری سِکداری۔ کایا مردنگ وجّن ڈھول نگارے۔ ہوئے رُشنائی وسے انگ سنگ، ساچی شبد ہوئے دُھنکارے ۔ ایکا چاڑھے ساچا رنگ، ساچا دِسے ہرِ دوارے۔ مہاراج شیر سِنگھ وِشنوُں بھگوان، ساچی جوت ٹِکائے تیرے کایا محل مینارے۔ کایا کوٹھی محل منارا۔ پربھ ابناشی دِوس ریَن رسن اُچارہ۔ سرب گھٹ واسی آپے وِچ کرے پسارا۔ گھنک پُر واسی نِرمل جوت کرے اُجیارا۔ مہاراج شیر سِنگھ وِشنوُں بھگوان، در دسواں آپ کُھلارا۔ دوار دسواں آپ کُھلائے۔ آتم تالا آپے لاہے۔ دیِپک جوتی بال کرے رُشنائے۔ مہاراج شیر سِنگھ وِشنوُں

بھگوان، سرب تھائیں ہوئے سہائے۔ دیِپک جوت آپ جگائی۔ گُرسِکھاں دیوے ہرِ وڈیائی۔ سوہنگ وست ہرِ جھولی پائی۔ سچ دات سچ وست ہرِ ہتّھ پھڑائی۔ بِن قلم دوات، ہرِ لِکھت لِکھائی۔ وِچ اندر مار جھات، ہرِ بَیٹھا جوت جگائی۔ آپے پُچھے تیری وات، جیِو بُھل نہ جائی۔ کلجُگ مِٹائے اندھیری رات، سوہنگ جوت کرے رُشنائی۔ مہاراج شیر سِنگھ وِشنوُں بھگوان، اپنے ہتّھ رکھے وڈیائی۔ مِلیا کنت سچ سُکھ بھاگی۔ چرن پریِتی ساچی لاگی۔ ہرِ ہرِ ہرِ ساچا آتم دھوئی پاپاں داغی۔ گھر ہرِ در ساچا اُپجاوے شبد دُھن انراگی۔ ہرِ سر تر درس کر آیا دِن وڈ وڈبھاگی۔ مہاراج شیر سِنگھ وِشنوُں بھگوان، مات جوت پرگٹائے، بھوَ جل بیڑا پار کرائے، نگر کھیڑا آپ وسائے، گُرمُکھاں بنے آپ واگی۔ نگر کھیڑا کُھلا ویہڑا۔ پربھ ابناشی آپ بنّھے بیڑا۔ در گھر ساچے ہرِ ساچا سُنے جھیڑا۔ بِن گُر پوُرے انت پار لنگھائے کیہڑا۔ پِچھا رہیا دوُر اَگا آیا نیڑا۔ مہاراج شیر سِنگھ وِشنوُں بھگوان، آپ مُکائے کلجُگ جھیڑا۔ کلجُگ جھیڑا آپ مُکاؤنا۔ بےمُکھاں بیڑا آپ ڈُباؤنا۔ گُرسِکھاں ہرِ پار کراؤنا۔ سوہنگ نئیا آپ چڑھاؤنا۔ مات پِت ہرِ آپ اکھواؤنا۔ آپے پُچھے وات، دِوس ریَن رسنا گاؤنا۔ سوہنگ دیوے ساچی دات، سچ نام ہرِ جھولی پاؤنا۔ مہاراج شیر سِنگھ وِشنوُں بھگوان، آپ اپنی سرن لگاؤنا۔ سرن لگائے ہرِ کا روُپ۔ کِھچ لیائے وڈ وڈ بھوُپ۔ جوت پرگٹائے بِن رنگ روُپ۔ مہما کرے جگت انوُپ۔ ہووے پرکاش وِچ اندھ کوُپ۔ مہاراج شیر سِنگھ وِشنوُں بھگوان، ایکا جوت مات پرگٹائے گُرسِکھاں دِسے سَت سروُپ۔ سَت سروُپیا، رنگ انوُپیا، وڈ شاہو وڈ وڈ بھوُپیا، مہاراج شیر سِنگھ وِشنوُں بھگوان، پنچم جیٹھ کرے پرکاش اندھ اندھیر مِٹائے جھوُٹھی سرِشٹ مات اندھ کوُپیا۔ اندھ اندھیرا آپ مِٹاؤنا۔ سچ وِہار آپ کراؤنا۔ ساچی کارے سرِشٹ لگاؤنا۔ ساچی دھارے شبد چلاؤنا۔ ساچی مارے بےمُکھاں کراؤنا۔ مہاراج شیر سِنگھ وِشنوُں بھگوان، تیرے نر نارے، در آئے جِس درشن پاؤنا۔ نر ناری جو آئن در۔ کر درس جائن تر۔ خالی بھنڈارے پربھ ساچا دیوے بھر۔ کلجُگ لگّے دُکھڑے ہرِ ہرے دیوے کر۔ اُجل ہوئے مُکھڑے، پربھ چرنی گئے تر۔ تن

لتھے سب دُکھڑے، جم کا لتھا ڈر۔ جو جن آئے در تے بُھکھڑے۔ پربھ دیوے ساچا ور۔ مات سُپھل کرائے کُکھڑے، جِس رسنا لیا اُچار۔ مہاراج شیر سِنگھ وِشنوُں بھگوان، آپ نُہائے تیِرتھ ساچے سر۔ سچ سروور ساچا جان۔ انتر آتم کر اِشنان۔ سوہنگ منتر جپ ملِے بھگوان۔ بَیٹھا رہے سد اِکنتر، ایکا لگن ہرِ چرن دھیان۔ آپ بنائے تیری بنتر، دیوے درس ہرِ دَیاوان۔ مہاراج شیر سِنگھ سَتگُر ساچا، آپ چُکائے جم کی کان۔ جم جم دوُت نہ آون نیڑے۔ ہرِ ساچا جِس وسے کھیڑے۔ آپ مِٹائے چؤراسی گیڑے۔ ساچے شبد بندھائے بیڑے۔ مہاراج شیر سِنگھ وِشنوُں بھگوان، آپ کرائے سچ نبیڑے۔ بھگت بھنڈارا آپ چلایا۔ گُرمُکھ ساچے سیوا لایا۔ انّ دان جِس جن کرایا۔ تن من ہرِ ہرا کرایا۔ ساچا دھن ہرِ جھولی پایا۔ آتم جن سرب کڈھایا۔ مہاراج شیر سِنگھ وِشنوُں بھگوان، اتُٹ بھنڈارا آپ رکھایا۔ گُر سنگت سیوا کری وِچار۔ مانَس جنم لیا سُدھار۔ پنچم جیٹھ پربھ ساچی دسّی دھار۔ مہاراج شیر سِنگھ وِشنوُں بھگوان، گُرسِکھاں جائے تار۔ سیوک سیوا کری پیاری۔ ساچا نام ملِے نام خُماری۔ شاہو شبد سچ اٹاری۔ جِتھے وسے ہرِ مُراری۔ اوتھے ہوئے نہ ریَن اندھیاری۔ ایکا جوت جگے نِرنکاری۔ بَیٹھا اڈول آپ گِردھاری۔ جھِلمل جھِلمل ہویا ویکھو رنگ رنگی کرتاری۔ مہاراج شیر سِنگھ وِشنوُں بھگوان، سچکھنڈ سچّا درباری۔ سچکھنڈ سچ ارداسا۔ تیِن لوک ہرِ رکھے واسا۔ کھنڈ برہمنڈ وِچ وربھنڈ جیِو جنت دیہہ وِچ نِواسا۔ مہاراج شیر سِنگھ وِشنوُں بھگوان، گُرمُکھاں کرے بند خلاصا۔ سیوا گھالی پربھ ساچا بنے آپے پالی۔ گُرسِکھاں کرے دِوس ریَن سُکھالی۔ آتم جوتی آپ جگائے جِؤں کتّک وِچ دیوالی۔ مہاراج شیر سِنگھ وِشنوُں بھگوان، دو جہاناں والی۔ آتم جوتی آپے بالے۔ گُر سنگت در سیوا گھالے۔ چرن پریِتی نِبھے نالے۔ اپنی گود آپ اُٹھالے۔ اپنا بِرد پربھ ساچا آپ سمبھالے۔ مہاراج شیر سِنگھ وِشنوُں بھگوان، گُرسِکھاں سد وسے نالے۔ سیوک سیوا کرم کمایا۔ ساچا دھرم جگت رکھایا۔ مانَس جنم سُپھل کرایا۔ پنج جیٹھ دِوس منایا۔ دھنّ دھنّ دھنّ گُرسِکھ جِس آئے درشن پایا۔ اُجل ہوئے مُکھ، دھرم رائے نہ دئے سزایا۔

سب اُتارے ترِشنا بُھکھ، سوہنگ ساچا واس رکھایا۔ مہاراج شیر سِنگھ وِشنوُں بھگوان، پوُرن آس آپ کرایا۔ گُر سنگت در سیوا کیِنی۔ کلجُگ ریَن بنائی ساچی بھینی۔ دھنّ دھنّ دھنّ گُرسِکھ تیرا مُکھڑا، پربھ ابناشی رسنا چینی۔ مہاراج شیر سِنگھ وِشنوُں بھگوان، سچ دات در ساچے دینی۔ دیوے دات دیِیا ہرِ دان۔ منگیا اِک داتا بھگوان۔ انتم انت آپ مُکائے جم کی کان۔ ڈنّ نہ لگّے وِچ جہان۔ گُرسِکھاں سیوا پربھ لائی لیکھے، سرِشٹ سبائی پئی ویکھے، پنچم جیٹھ والی دو جہان۔ گُرسِکھ پربھ لائے لیکھے۔ پربھ در آئے درس نیتر پیکھے۔ اگیان اندھیر مِٹائے بھرم بُھلیکھے۔ مہاراج شیر سِنگھ وِشنوُں بھگوان، مانَس جنم لایا لیکھے۔ بھرم بُھلیکھا دیوے کڈھ۔ کرے سُکھالے کایا ہڈّ۔ پربھ ابناشی باہوں پکڑ باہر دیوے کڈھ۔ مہاراج شیر سِنگھ وِشنوُں بھگوان، پنچم جیٹھ جوت پرگٹائی۔ ساچا لڑ نہ دینا چھڈ۔ ساچا لڑ نہ چھڈنا۔ اپنا کیِیا آپے وڈّھنا۔ ساچو ساچا سچ پربھ سوہنگ وِچ مات دے گڈھنا۔ مہاراج شیر سِنگھ وِشنوُں بھگوان، ساچا دیوے دان نام گُرمُکھاں ونڈنا۔ ونڈ ونڈایا ساچا نام۔ آتم ٹھنڈا کرایا پوُرن ہوئے کام۔ سوہنگ ساچی گنڈھ پلّے بندھایا، گھر ساچے آیا شام۔ مہاراج شیر سِنگھ وِشنوُں بھگوان، آپ اپنا کیِیا کام۔ پوُرن کاما، پوُرن راما، پوُرن شاما۔ جوت سروُپی پہریا بانا۔ سوہنگ دیوے والی دو جہاناں۔ سَتجُگ ساچا اِک نِشانہ۔ گُرسِکھاں ہتّھ بدھّا گانا۔ جوتی جوت کرے پرکاش کوٹن کوٹ بھانا۔ کدے نہ ہوئے کلجُگ ناس، جِس جن رسنا گانا۔ مِلیا ہرِ پُرکھ ابناشی، جوت سروُپی میل مِلانا۔ مہاراج شیر سِنگھ وِشنوُں بھگوان، سچکھنڈ نِواسی سچکھنڈ نِواس رکھانا۔ ہرِ ہرِ ہرِ در منگل گایا۔ پربھ ابناشی ساچا پایا۔ جو جن ہوئے داسن داسی، پربھ ساچا دَیا کمایا۔ پرگٹ جوت گھنک پُر واسی، اپنا درس دِکھایا۔ روُپ رنگ نہ ریکھ رکھاسی، جوت سروُپی گُرسِکھ سمایا۔ شبد سروُپی ویکھ وکھاسی، آتم ساچی بوُجھ بُجھایا۔ گُرمُکھ ساچا پربھ در پاسی، ساچا لہنا لَین جو آیا۔ مہاراج شیر سِنگھ وِشنوُں بھگوان، اپنا لیکھا آپ چُکایا۔ سادھ سنگت سد سد سد ودھائی۔ پنچم جیٹھ ہرِ در تے آئی۔ اشٹم نوُں ہرِ وِدا کرائی۔ ہؤمے ممتا روگ گوائی۔

ترِکھا ترِشنا آپ بُجھائی۔ کاہنا کرِشنا جوت پرگٹائی۔ مہاراج شیر سِنگھ وِشنوُں بھگوان، گُر سنگت وِدا کرائی۔ گُر سنگت جائے اپنے گھر۔ پربھ ابناشی دیوے ساچا ور۔ کر درس کل جاؤ تر۔ جو در آئے ناری نر۔ بِردھاں بالاں مِلیا ہرِ۔ مہاراج شیر سِنگھ وِشنوُں بھگوان، چرن پریِتی اِک دِسائے ساچا سر۔ ساچا تیِرتھ چرنی نہاونا۔ چرن دھوُڑ لےَ مستک لاؤنا۔ سوہنگ ساچا رسنا گاونا۔ مہاراج شیر سِنگھ وِشنوُں بھگوان، گھر جائے نہ منوں بُھلاونا۔ گھر گھر جھوُٹھے دھندے۔ پوُرے تول تُلنا، آتم اندھے۔ کلجُگ مایا وِچ نہ رُلنا، نہ ہوئن بھاگ مندے۔ سچ دوار پربھ دا کُھلنا، رہن نہ دیوے پاپی گندے۔ مہاراج شیر سِنگھ وِشنوُں بھگوان، اپنی سرن لگائے آپ بنائے ساچے بندے۔ بندی توڑ توڑے ابِھمانا۔ آپ دِسائے سچ ٹِکانا۔ جِتھے وسے آپ بھگوانا۔ جوت سروُپی اِک استھانا۔ دِوس ریَن اِک رنگ رنگانا۔ گُرمُکھ ساچے لہنا لَین، ہرِ چرن پریِتی سیو کمانا۔ درس پیکھے ہرِ ساچے نَین، پربھ ابناشی بُھل نہ جانا۔ مہاراج شیر سِنگھ وِشنوُں بھگوان، سد رسنا گانا۔ بھرم بُھلیکھا وِچ نہ بُھلنا۔ کلجُگ مایا وِچ نہ رُلنا۔ کلجُگ اندھیر ایکا جھُلنا۔ مہاراج شیر سِنگھ وِشنوُں بھگوان، گھر ساچے بخشے جو در آئے بخشائے بُھلنا۔ بُھلیا رُلیا آئے در۔ پربھ ابناشی پکڑے لڑ۔ در دوارے اَگے کھڑ۔ قِلہ کوٹ توڑے تیرا ہنکاری گڑھ۔ کرے درس مہاراج شیر سِنگھ وِشنوُں بھگوان، ہرِ کی پؤڑی جائے چڑھ۔ ہرِ کی پؤڑی سچ استھانا۔ ایکا گھر ایکا ٹِکانا۔ ایکا در اِک بھگوانا۔ ایکا سر اِک اِشنانا۔ ایکا در ایکا داتا مہاراج شیر سِنگھ وِشنوُں بھگوان، جوت سروُپی میل مِلانا۔ دھیِرج سَت سنتوکھ گیان۔ پربھ ابناشی ساچا مان۔ کلجُگ بُھلیا جیِو نادان۔ ویلے انت نہ بنی بال انجان۔ شبد سروُپی وجےّ بان۔ بےمُکھاں پربھ دیوے چھان۔ مہاراج شیر سِنگھ وِشنوُں بھگوان، جِتھے وسے ساچا کاہن۔ کاہن گھنئیا نَین مُدھارا۔ ساچی جوت سچ پسارا۔ اِک رنگ روُپ ایکنکارا۔ سَت سروُپ سچ سہارا۔ مہاراج شیر سِنگھ وِشنوُں بھگوان، رنگ انوُپ اپر اپارا۔ اپر اپار انتر جانت۔ گُرمُکھ ساچے ہرِ ساچا مانت۔ ویلے انت پربھ ساچا کرے پچھانت۔ مہاراج شیر سِنگھ وِشنوُں بھگوان، آپ رکھائے

اپنی آنت۔ آپ رکھائے اپنی آنا۔ سچ سُچ دا مینہہ برسانا۔ جوُٹھ جھوُٹھ سب نشٹ کرانا۔ رنگ انوُٹھ اِک چڑھانا۔ مہاراج شیر سِنگھ وِشنوُں بھگوان، اپنے رنگ رنگانا۔ ایکا ایک ایکا ٹیک۔ ایکا بُدھ کرے بِبیک۔ ایکا کلجُگ مایا نہ لاگے سیک۔ مہاراج شیر سِنگھ وِشنوُں بھگوان، گُرمُکھ ساچے نیتر پیکھ۔ مایا اگن نہ لاگے تن۔ دُکھیا ہوئے نہ آتم من۔ دھرم رائے نہ لائے ڈنّ۔ بےمُکھ جیِو آتم ہوئی انّھ۔ جھوُٹھے بھانڈے پربھ ساچا دیوے بھنّ۔ گُرسِکھاں بیڑا دیوے بنّھ۔ مہاراج شیر سِنگھ وِشنوُں بھگوان، گُرمُکھ بنائے ساچے جن۔ جن بنایا، تن وسایا، من منایا، دھیِر دھرایا۔ سوہنگ ساچا تیِر چلایا۔ امرت ساچا سیِر پیایا۔ ہؤمے وِچوں پیِڑ کڈھایا۔ وڈ وڈ سوُربیِر آپ اکھوایا۔ گُرمُکھاں دیوے دھیِر، ایکا دھیان چرن لگایا۔ کلجُگ انتم نہ لتھن چیِر، پربھ ابناشی ہوئے سہایا۔ آپے کٹے گُرمُکھ تیری بھیِڑ۔ آپ اپنا سِر ہتّھ ٹِکایا۔ سوہنگ بدھّی ساچی بیِڑ، سَتجُگ بیڑا آپ چلایا۔ بےمُکھاں ہرِ جائے پیِڑ، سَتجُگ ساچے دِس نہ آیا۔ کیا ہست کیا کیِڑ، سرِشٹ سبائی وِچ سمایا۔ مہاراج شیر سِنگھ وِشنوُں بھگوان، پنچم جیٹھ جوت سروُپی جامہ پایا۔ جامہ پائے، جگت جگائے، شبد چلائے، وقت سُہائے، بھگت اُٹھائے، درس دِکھائے، ترِکھا بُجھائے، ساچا نام بِھچھیا پائے۔ آتم وِکھا سرب لُہائے۔ آتم ترِشنا آپ بُجھائے۔ نیتر پیکھ دُکھ روگ مِٹائے۔ ویکھا ویکھ کوئی بُھل نہ جائے۔ کلجُگ مایا وِچ کوئی رُل نہ جائے۔ امرت آتم ہرِ ساچا دیوے ڈُل نہ جائے۔ مہاراج شیر سِنگھ وِشنوُں بھگوان، پوُرے تول تُلائے۔ پوُرے تول ساچا کنڈا۔ آپ تُلائے کھنڈ برہمنڈ سرب وربھنڈا۔ اپنے ہتّھ اُٹھائے سوہنگ ساچا ڈنڈا۔ مہاراج شیر سِنگھ وِشنوُں بھگوان، وڈ دیوی دیوَ وڈ چنڈ پرچنڈا۔ ساچا تولا ایکا دھارن۔ ہرِ ابناشی بھگت اُدھارن۔ گھنک پُر واسی پاوے سارن۔ مہاراج شیر سِنگھ وِشنوُں بھگوان، سَتجُگ بنائے آپ سچّی سرکارن۔ سَتجُگ بنے سچّی سرکارا۔ آپے دسےّ سچ وِہارا۔ سچ سُچ در کرے وپارا۔ کرم دھرم دا اِک جَیکارا۔ صِدقی سردار اوُچ اپارا۔ ساچے تخت بَیٹھے آپ ہوئے سِکدارا۔ مہاراج شیر سِنگھ وِشنوُں بھگوان، سِر اپنے چھتر جھُلارا۔ سچ سُچ کرے سِکدار۔ کوُڑ

کڑاوے دیوے مار۔ اگن کُنڈ وِچ دیوے ڈار۔ شبد کھنڈا اُٹھاوے دو دھار۔ پربھ ساچا جو جن سرنی لاگے، انتم انت اُترے پار۔ بےمُکھ در تے جائن بھاگے، پربھ ساچا کرے خوار۔ مہاراج شیر سِنگھ وِشنوُں بھگوان، پنچم پنچم پنچائت کرے سرکار۔ چرن مجن رام مُراری۔ کِرپا کرے آپ گِردھاری۔ گُر سنگت در آئے تاری۔ دیوے نام رنگت شبد خُماری۔ مہاراج شیر سِنگھ وِشنوُں بھگوان، سرب جیِیاں دا اِک ادھاری۔ سرب جیِیاں ہرِ ساچا گایا۔ پرگٹ ہو ہرِ درس دِکھایا۔ گُرسِکھ سیوا لیکھے لایا۔ مہاراج شیر سِنگھ وِشنوُں بھگوان، مات جوت دھر گھر ساچے بھوگ لگایا۔ لگّے بھوگ بھگت دوار۔ آتم کھولے تن کِواڑ۔ بےمُکھاں کایا ہوئی اُجاڑ۔ کلجُگ جھوُٹھے لگّے رہن جھاڑ۔ گُرمُکھاں سوہنگ شبد کرائے ساچی واڑ۔ شبد مار پربھ ساچا دیوے جھاڑ۔ مہاراج شیر سِنگھ وِشنوُں بھگوان، آپ بنائے گُرسِکھ ساچے لاڑ۔ لائے بھوگ بھگت ادھاری۔ در گھر آئے پَیج سواری۔ کاہنا کرِشنا ہرِ مُراری۔ مہاراج شیر سِنگھ وِشنوُں بھگوان، دِوس ریَن ریَن دِوس اٹّھے پہر چِٹّے اسو اسواری۔ شبد ادھارا اسو اسوارا۔ جوت آکارا وِچ سنسارا۔ تیِن لوک کرے چرن پنہارا۔ مات پاتال آکاش ایکا رنگ رنگے کرتارا۔ گُرمُکھاں سوہنگ دیوے شبد ادھارا۔ بےمُکھاں پربھ ساچا کرے ناس گُرمُکھاں آتم نام بھرے بھنڈارا۔ مہاراج شیر سِنگھ وِشنوُں بھگوان، پنچم جیٹھ گُرسِکھاں آپ بنے ورتارا۔ بھوگ لگایا ہرِ ہرِ بھگوَنت۔ گُرسِکھاں چوگ چُگائے، آپ بنائے ساچی بنت۔ آپ اپنی جوت جگائے، بےمُکھ بُھلے سرب جیِو جنت۔ مہاراج شیر سِنگھ وِشنوُں بھگوان، جوت سروُپی ہرِ ساچا کنت۔ بھوگ بھگت گھر لگّے۔ آتم جوتی ساچی جگے۔ شبد اندھیری ایکا وگے۔ سرِشٹ سبائی دگے۔ گُرمُکھ ساچے پربھ چرنی لگّے۔ بیَکُنٹھ نِواسی لائے اَگے۔ مہاراج شیر سِنگھ وِشنوُں بھگوان، جو جن سیِس نِوائے پگے۔ کر کِرپا ہرِ میل مِلایا۔ رنگ رنگیِلا مادھوَ پایا۔ جِؤں جادو وِچ کرِشنا آیا۔ مہاراج شیر سِنگھ وِشنوُں بھگوان، نِہکلنک کل جامہ پایا۔ جامہ دھارے ہرِ ہرِ گوبِندا۔ آپ مِٹائے سگلی چِندا۔ بےمُکھ دے سزائے، در گھر ساچے آئے کرن جو نِندا۔ گُرسِکھاں مان دوائے، آپ مِٹائے

ساچی چِندا۔ مہاراج شیر سِنگھ وِشنوُں بھگوان، وڈ سوُرا مرگِندا۔ وڈ مرگِندا درس دِکھندا، وقت سُہندا، بھگت ترندا، مانَس جنم سُپھل کرندا، سوہنگ شبد ہرِ ہرِ چلندا۔ در گھر ساچے رہن نہ پائے، مدرا ماسی گندہ۔ آپے دے سزائے، دھرم رائے نے پایا پھندا۔ مہاراج شیر سِنگھ وِشنوُں بھگوان، جو جن بُھلائے آتم ہوئے اندھا۔ آتم اندھا اندھ اندھیارا۔ کوُڑا ہوئے سرب پسارا۔ مانَس جنم اپنا ہارا۔ بُھلیا ہرِ ساچا کرتارا۔ امرت ڈُلیا سچ بھتارا۔ کلجُگ مایا دے وِچ رُلیا، مہاراج شیر سِنگھ وِشنوُں بھگوان، نہ پائے تیری سارا۔ سرن تیری جانے کوئی۔ دو جہانی بَیٹھ روئے۔ پاپاں مَیل کوَن دھوئی۔ جم جم دوُت سیِکھاں وِچ نَین پروئے۔ سنگی ساتھی ہوئے نہ کوئی۔ مہاراج شیر سِنگھ وِشنوُں بھگوان، گُرسِکھاں سہائی آپے ہوئے۔ بےمُکھ جھوُٹھا جگت وِہارا۔ گُرمُکھ ساچے ایکا ساچا گُر دربارا۔ آؤ در کل جاؤ تر چرن کر نِمسکارا۔ آون جاون چُکے ڈر، ہرِ دیوے چرن پیارا۔ مہاراج شیر سِنگھ وِشنوُں بھگوان، ساچا دیوے نام ادھارا۔ نام ادھاری، سَتجُگ تاری، کرے آتم کاری، جاوے تاری، آئے درباری، آتم دیوے نام خُماری۔ بھوَ ساگر توں پار اُتاری۔ کایا گاگر جوت اپاری۔ چِٹّی چادر شبد پٹاری۔ مہاراج شیر سِنگھ وِشنوُں بھگوان، گُرمُکھاں پائے آپے ساری۔ چِٹّی چادر چند چندرائن۔ چند چندرما ویکھے نَین۔ تیِجی رلے نال بِھنڑی ریَن۔ پنچم جیٹھ مِل تِنّے بہن۔ آپ بنائے بھائی بھَین۔ ساچا لاہا آپے لَین۔ گُرمُکھ ساچے سنت جن پربھ ابناشی رسنا کہن۔ مہاراج شیر سِنگھ وِشنوُں بھگوان، بےمُکھاں گھر گھر پوائے وَین۔ چند چندرما سیِتل دھاری۔ رتھ رتھواہی سچ اسواری۔ بھوَ ساگر وِچوں جائے تاری۔ ویلے انت نہ آئے ہاری۔ کِرپا کرے آپ بنواری۔ سَتجُگ ساچے پھیر دیوے سِکداری۔ سیِتل سیِتلا ہووے بھاری۔ مہاراج شیر سِنگھ وِشنوُں بھگوان، منگیا اِک سچّا درباری۔ سوُرج تپ اگر اگھائے۔ کلجُگ پاپ رہیا تپائے۔ پربھ ساچے دی آئے سرنائے۔ کرے بیننتی سُنو ہرِ رائے۔ جوُٹھ جھوُٹھ دا نشٹ کرائے۔ مہاراج شیر سِنگھ وِشنوُں بھگوان، نرائن نر اپنا کھیل آپ ورتائے۔ سوُر سوُریا بھانن بھانا۔ منگے در ایکا دانا۔ کلجُگ جیِو پاپی ہر، بُھلیا

جِنہاں ہرِ بھگوانا۔ دھرم مات وِچ آوے ڈر، جوتی جوت ہرِ آپ لگانا۔ در دوارے آئے کھڑ، کِرپا کرے ہرِ آپ بھگوانا۔ سوُرا سوُریا سُنے پُکار۔ آپے لئے تّھلے اُتار۔ اگن جوت لئے ساڑ۔ مہاراج شیر سِنگھ وِشنوُں بھگوان، اپنا کرے آپ وِہار۔ چند سِتارے سرب پُکارے۔ ویکھن جائن سرب دوارے۔ دِوس ریَن ریَن دِوس بےمُکھ رہے جھکھ مارے۔ جھوُٹھے بندے پاپی گندے مایا دھاری، غریِباں کرن خواری، مہاراج شیر سِنگھ سُنے پُکارا، ہرِ داتارا، جامہ دھارا، جوت سروُپی کیِیا آکارا۔ سوہنگ پھڑیا شبد کٹارا۔ چؤتھے جُگ آئی ہارا۔ نہ کوئی دِسے شاہدارا۔ ایکا دِسے ساچا ہرِ اسو اسوارا۔ جوت سروُپی شبد ادھارا۔ مہاراج شیر سِنگھ وِشنوُں بھگوان، نِرنجن نر نرائن نر اوتارا۔ تیِناں لوکاں سُنے پُکاری۔ برہما وِشن کھڑے درباری۔ دِوس ریَن کرن چرن نِمسکاری۔ پربھ ابناشی دھرم مات ہوئی بڑی خواری۔ کلجُگ جیِو اپنا موُل گئے ہاری۔ بھائی بھَیناں بنے وپاری۔ پَیسا منگن کرن خواری۔ پربھ ابناشی گلوں کٹ جگت بیماری۔ تٹ تیِرتھ نہ رہے سہاری۔ بےمُکھ کلجُگ جیِو جِنہاں ہتّھ مِلی سِکداری۔ مہاراج شیر سِنگھ وِشنوُں بھگوان، پرگٹ جوت پنچم جیٹھ اپنے پھڑے ہتّھ کٹاری۔ ساچا کھنڈا آپ اُٹھاونا۔ بےمُکھاں نشٹ کراونا۔ دھرم رائے دے در پُٹھے ٹنگاونا۔ مہاراج شیر سِنگھ وِشنوُں بھگوان، گُرسِکھاں انگوُٹھے در ساچے لگاونا۔ در گھر ساچے لائے انگوُٹھا۔ آتم رنگ چڑھائے اِک انوُٹھا۔ پنچم جیٹھ جوت جگا ہرِ ساچا تُوٹھا۔ آپ اپنے ہتّھ رکھائے، اِک بنائے مُٹھا۔ گُرمُکھ ساچے آپ منائے، جو در آئے رُٹھا۔ بےمُکھ آپ جلائے جِؤں اگن لگائے بُھٹھا۔ مہاراج شیر سِنگھ وِشنوُں بھگوان، لُکیا رہن نہ دیوے وِچ گُٹھا۔ مدن موُرتی اِک گوپال۔ دیونہار ہرِ اِک ساچا بھال۔ جھوُٹھا ونج مات نہ کرنا، ایکا بنائے ساچا لال۔ سچ وست ہرِ ایکا دیوے، گُرسِکھ گھر رکھنی سنبھال۔ مہاراج شیر سِنگھ وِشنوُں بھگوان، سدا سدا سد سہائی آپے وسے تیرے نال۔ سَت پرساد لاؤنا مُکھ۔ پربھ در گواونا کایا دُکھ۔ گھر سچ وساونا، ایکا آتم سُکھ۔ بھرم بُھلیکھا سارا لاہونا، بُھل نہ جانا کِسے منُکھ۔ پربھ ابناشی ساچا گاونا، اُجل کرائے مُکھ۔ مہاراج شیر سِنگھ وِشنوُں بھگوان،

ور گھر ہرِ ساچا پایا۔ پنچم جیٹھ سُکھنا سُکھ۔ سُکھنا سُکھی سنگت ساری۔ پنچم جیٹھ کری تیاری۔ کری بیننتی سنگت ساری۔ سُنے آپ ہرِ اوتاری۔ پنچم جیٹھ پربھ ساچے مات جوت اُتاری۔ گُرسِکھاں جائے جنم سواری۔ بھرم بُھلیکھے دئے نِواری۔ جو جن آئے سچ درباری۔ کوئی نہ رہے کھڑا در اَگے ہنکاری۔ شبد سروُپی آپ اُٹھائے کھنڈا دو دھاری۔ آؤ اُٹھو نیتر پیکھو چِنتا کرو نہ کوئی، مہاراج شیر سِنگھ وِشنوُں بھگوان، نہ کوئی جانے بھیکھادھاری۔ بھیکھادھاری نہ لَینا جان۔ پربھ ابناشی کرو پچھان۔ بُھل نہ جانا جیِو انجان۔ مہاراج شیر سِنگھ وِشنوُں بھگوان، سرب جیِیاں دا جانی جان۔ آتم ہووے جِس ہنکارا۔ اُٹھے آوے چل دوارا۔ بھانڈا بھرم پربھ دئے نِوارا۔ بوُجھ بُجھائے آپ گِردھارا۔ گُرسِکھ وسے چؤتھے پد، پربھ لئے سدّ، بےمُکھ ہوئے رّد، گُرمُکھ ساچے جاؤ گد گد، آپ بہائے چرن دوارا۔ سوہنگ پِلائے ساچی مد، دِوس ریَن رہے خُمارا۔ ایکا وجےّ ساچا ند، ساچی دُھن کرے دُھنکارا۔ مہاراج شیر سِنگھ وِشنوُں بھگوان، آپ مِٹائے اندھ ادھیارا۔ اندھ اندھیارا آپے میٹے۔ گُر سنگت ہرِ شبد پیٹے۔ آپ بنائے اپنے بیٹے۔ مہاراج شیر سِنگھ وِشنوُں بھگوان، ساچا کھیوٹ کھیٹے۔ گُر ساچا آتم مانا۔ جوت سروُپی پوَن سمانا۔ تیِن لوک ہرِ بوُجھ بُجھانا۔ ساچا میگھ سون ورسانا۔ آتم دُھن سرب وجانا۔ مہاراج شیر سِنگھ وِشنوُں بھگوان، پنچم جیٹھ گُرسِکھاں ساچا لیکھ لِکھانا۔ گُرسِکھاں سیوا ساچی کیِتی۔ آپے دیوے چرن پریِتی۔ پربھ ابناشی پرکھے نیِتی۔ مہاراج شیر سِنگھ وِشنوُں بھگوان، گُر سنگت دے وڈیائی، سدا رہے جگ جیِتی۔ سدا جگ جیِونا، امرت پیِونا۔ سوہنگ بیِج ساچا بیِجنا۔ تن پاٹا آوے گھاٹا، سوہنگ دھاگا لےَ کے سیِونا۔ مہاراج شیر سِنگھ وِشنوُں بھگوان، جِس جن رسنا چاٹا، سدا سدا جگ جیِونا۔ ساچا ہٹّ سچّا پساری۔ ساچی وست رکھے اپاری۔ سودا لَینا وارو واری۔ جو جن آئے چل درباری۔ پربھ بَیٹھا وڈ بھنڈاری۔ گُرسِکھ منگن چرن دواری۔ پربھ دیونہار داتاری۔ گُرسِکھاں جائے پَیج سواری۔ جو در آئے بِردھ بال نر ناری۔ کام کرودھ دئے نِوار، آتم دیوے شبد خُماری۔ پُت دُدھ دے بھرے بھنڈار، در

آئے جو بِھکھاری۔ گُرسِکھ نہ ہوئے کل خوار، منگیا اِک سچّا درباری۔ مہاراج شیر سِنگھ وِشنوُں بھگوان، ساچا ناؤں لَینا کھٹّ، مانَس جنم نہ آنا دوُجی واری۔ ساچی ہٹّ ہرِ آپ لگائی۔ ایکا وستر نام پہنائی۔ شبد شستر ہرِ ہتّھ پھڑائی۔ مہاراج شیر سِنگھ وِشنوُں بھگوان، گُرسِکھاں ہوئے آپ سہائی۔ در گھر گُر ساچا ہٹّ۔ ساچا تیِرتھ ساچا تٹ۔ کلجُگ جھوُٹھی کھیل جِؤں بازی گر نٹ۔ کلجُگ پربھ بھنیا تیرا کایا مٹّ۔ سوہنگ ساچا شبد ہرِ چرن لاگ، دِوس ریَن سد رسنا رٹ۔ مہاراج شیر سِنگھ وِشنوُں بھگوان، آپے میل مِلائے تیری دُئی دوَیت پھٹ۔ سچ پربھ دا بن سؤداگر۔ نِرمل کرم ہوئے اُجاگر۔ پربھ پار کرائے گُرمُکھ سِنگھ سِکھ بھوَ ساگر۔ آپ کرائے در آیاں آدر۔ مہاراج شیر سِنگھ وِشنوُں بھگوان، سَتجُگ ساچے گُرسِکھاں اُپر آپ رکھائے چِٹّی چادر۔ سچّا سودا ویکھ وِچار۔ پربھ ابناشی ہرِ کرتار۔ بھرم بُھلیکھے دیوے سرب نِوار۔ مہاراج شیر سِنگھ وِشنوُں بھگوان، جنم مرن دیوے گیڑ نِوار۔ پربھ ابناشی چرن پنہارا۔ آپے کھولے دسم دوارا۔ اُپجے دُھن سچّی دُھنکارا۔ مہاراج شیر سِنگھ وِشنوُں بھگوان، جوتی جوت سروُپ اپنا رنگ دِکھائے اپارا۔ گُر سنگت تیرا پریمی تیِر۔ سِنگھ سِنگھاسن دیوے چیِر۔ وِشنوُں ونسی پائے وہیِر۔ کوٹن کوٹ جو جن آئے چیِر۔ گُرمُکھاں آتم پریم کر، آپ وہائے نیتر نیِر۔ مہاراج شیر سِنگھ وِشنوُں بھگوان، ایہہ سچ پِلایا آتم سیِر۔ نیتر نیتر نیِر نِرالا۔ پیِر فقیِر نہ کِسے سمبھالا۔ دستگیِر نہ ہوئے رکھوالا۔ ساچا ماہی آپ گوپالا۔ کل پئے دُہائی آپ ہوئے رکھوالا۔ جھوُٹھی مِٹائے شاہی، توڑے سرب جنجالا۔ گُرسِکھاں پھڑے باہیں، گُرسِکھاں کرے پرِتپالا۔ آپ بہائے ساچے تھایں، ساچے گھر آپ رکھوالا۔ مہاراج شیر سِنگھ وِشنوُں بھگوان، ساچا پریِتم گُرسِکھاں کرے پرِتپالا۔ پریِت پریِتم گئی لگّ۔ دُئی دوَیت نہ رہی اگّ۔ کوُڑا ناتا تُٹا تگ۔ آتم جوتی جائے جگ۔ سچ شبد سِر دھرے پگّ۔ دیوے وڈیائی مہاراج شیر سِنگھ وِشنوُں بھگوان، وڈ سوُرا سربگ۔ پگّ پگڑی سِر بدھّا سیہرا۔ دُئی دوَیت ڈھایا ڈیرہ۔ گُرسِکھ بنایا اپنا چیرا۔ پنچم جیٹھ نہ لایا ڈیرہ۔ مہاراج شیر سِنگھ وِشنوُں بھگوان، آپ مِٹایا آون جاون گیڑا۔

آون جاون آپ مِٹایا۔ راجس تامس مگروں لاہیا۔ سانتک روُپ ہرِ سانتک سَت ست ورتایا۔ مہاراج شیر سِنگھ وِشنوُں بھگوان، گھر ساچے ٹھنڈ ورتایا۔ گھر ساچا ٹھنڈا دربارا۔ امرت چلے اِک پُھہارا۔ ساچی برکھے ایکا دھارا۔ گُرمُکھ وِرلا نہائے کرے چرن نِمسکارا۔ در گھر ساچے پاوے جو منگے ہرِ دوارا۔ مہاراج شیر سِنگھ وِشنوُں بھگوان، کر کِرپا پار اُتارا۔ جنم مرن اجے نہ جانیا۔ کلجُگ بُھلے جیِو نِدھانیاں۔ کلجُگ مایا اگن لگّی وِچ شیطانیاں۔ ایَویں پُھلیا پِھرے مستانیاں۔ سچّا راہ ہتّھ نہ آیا، بےمُکھ کی کرے دانیا۔ ساچا نام نہ رسنا گایا، کِتھوں ملِے ہرِ بھگوانیاں۔ بھرم بُھلیکھا جھوُٹھا لیکھا، پربھ ابناشی اجے نہ دیکھا، کِتھوں منگے ساچا لیکھا، کوَن مِٹائے تیری پِچھلی لِکھی ریکھا ، مایا دھاری اندھ اندھیاری۔ پاپاں ہوئی جیِو ہَینسیاری۔ جوُٹھی جھوُٹھی جیِو اٹاری۔ پربھ ابناشی نہ منوں وساری۔ ہرِ کا نام سچ سواری۔ شبد سروُپی ویکھ اٹاری۔ جِتھے دِسے ہرِ مُراری۔ جنم مرن ہرِ گیڑ نِواری۔ جوت سروُپی میل مِلاری۔ مہاراج شیر سِنگھ وِشنوُں بھگوان، نرائن نر ساچا شبد دیوے اسواری۔ ساچا شبد پربھ وکھان۔ کلجُگ جیِو نہ بُھل نادان۔ مایا وِچ نہ رُلیں بن انت نادان۔ امرت آتم نہ جیِو ڈوہلیں، جوتی جوت سروُپ ہرِ، گُرسِکھاں میل مِلان۔ مہاراج شیر سِنگھ وِشنوُں بھگوان، والی دو جہان۔ نام نِدھانا ہرِ در پاؤ۔ آتم جھوُٹھا تاک کُھلاؤ۔ کلجُگ جیِو ہنس کاگ بن جاؤ۔ آتم دھو ہنگتا داغ، سوہنگ ساچا رسنا گاؤ۔ پربھ ابناشی پکڑے واگ، جنم مرن وِچ پھیر نہ آؤ۔ گُرسِکھ سویا جائے جاگ، لکھّ چؤراسی جوُن کٹاؤ۔ مہاراج شیر سِنگھ وِشنوُں بھگوان، در گھر ساچے درشن پاؤ۔ کیا ویکھے کیا کرے وِچارا۔ ساچے پربھ نہ جانے سارا۔ ساچی دُھن سچّی سرکارا۔ مہاراج شیر سِنگھ وِشنوُں بھگوان، گُرسِکھاں گیڑ نِوارا۔ امرت میگھ آپ برسائے۔ آتم ترِکھا سرب مِٹائے۔ بےمُکھ آتم اگن لگائے۔ در در پِھرن ہلکائے، کوئے نہ پائے ساچی تھانئے، جِتھے وسے ہرِ رگھُرائے۔ گُرسِکھ ساچا سیو کمائے۔ پرگٹ جوت مہاراج شیر سِنگھ وِشنوُں بھگوان، امرت ساچا میگھ برسائے۔ امرت پیِنا امرت دھار۔ مانَس جنم لَینا سوار۔ بُھلیاں رُلیاں پربھ دیوے تار۔ پوُرب

کرم لئے وِچار۔ مہاراج شیر سِنگھ گُرسِکھاں پائے سار۔ آتم رس ہرِ ساچا گاونا۔ آتم جوتی دیِپ جگاونا۔ اندھ اندھیار سرب مِٹاونا۔ ایکا آکار جوت کراونا۔ سوہنگ دھار ہرِ اِک رکھاونا۔ وقت وِچار پربھ ساچے ساچا مارگ لاؤنا۔ چار ورن آوے اِک دوار، ایکا ڈنک وجاونا۔ راؤ اُمراؤ کر خوار، راجا رانا تختوں لاہونا۔ آپ سُہائے تھان بنک، مہاراج شیر سِنگھ وِشنوُں بھگوان، نِہکلنک نرائن نر وِچ ماتا جامہ پاونا۔ پنچم جیٹھ خوشی منائے۔ گُر سنگت ہرِ وِدا کرائے۔ سوہنگ دات بِھچھیا پائے۔ سَت کرامات اِک کرائے۔ اِک جماعت ہرِ آپ پڑھائے۔ آپے پُچھے وات، انتم انت ہوئے سہائے۔ مہاراج شیر سِنگھ وِشنوُں بھگوان، نِہکلنک کل جامہ پائے۔ اُٹھے سنگت کرے تیاری۔ پربھ چرن جاؤ بلہاری۔ مانَس جنم ہرِ جائے سواری۔ جو جن کرے نِمسکاری۔ در گھر ساچے دیوے سچّی سرداری۔ جِتھے وسے ہرِ آپ مُراری۔ رام رمئیا نر اوتاری۔ مہاراج شیر سِنگھ وِشنوُں بھگوان، پرگٹ جوت کل بھیکھادھاری۔ بھیکھ دھر دَیا کمائے۔ پنچم جیٹھ سوہنگ شبد مُکھ لگائے میوہ۔ پنچم جیٹھ ہرِ جوت پرگٹائے، پربھ ابناشی الکھ ابھیوا۔ مہاراج شیر سِنگھ وِشنوُں بھگوان، وِرتھی جائے نہ تیری گھالی سیوا۔ گُر دربار گُرمُکھاں جائے ہرِ تار۔ دیوے درس اگمّ اپار۔ مِٹائے حرص آتم ترِشنا بُھکھ نِوار۔ کاہنا کرِشنا ساچی جوت آکار۔ برہما وِشن کھڑے رہن دوار۔ مہاراج شیر سِنگھ وِشنوُں بھگوان، نرائن نر اوتار۔ نر اوتار جامہ دھاریا۔ گُرمُکھ ساچے وِچ سما رہیا۔ بِن رنگ روُپی دِس نہ آ رہیا۔ بھرم بُھلیکھے سرِشٹ بُھلا رہیا۔ گُرمُکھ ساچے اپنے لیکھے لا رہیا۔ وِچ مات پرگٹ آپے ویکھے جو جن سوہنگ رسنا گا رہیا۔ مہاراج شیر سِنگھ وِشنوُں بھگوان، مارگ سَتجُگ ساچا لا رہیا۔ جوت سروُپی جامہ پائے۔ سَتجُگ ساچا مارگ لائے۔ کلجُگ جھوُٹھا بھیکھ مِٹائے۔ گُرمُکھ ساچے سنت جن پربھ ساچا سرن لگائے۔ مہاراج شیر سِنگھ وِشنوُں بھگوان، چار ورن اِک کرائے۔ چار ورن اِک دوارا۔ چار ورن اِک گھر بارا۔ چار ورن ایکا سرن نِہکلنک نرائن نر اوتارا۔ چار ورن مہاراج شیر سِنگھ وِشنوُں بھگوان، ایکا ایک دیونہارا۔ چار ورن اِک سنگ۔ پربھ ابناشی چاڑھے ساچا

رنگ۔ آپ مِٹائے آتم بُھکھ ننگ۔ جوت سروُپی شبد اسواری کایا گھوڑا کسے تنگ۔ مہاراج شیر سِنگھ وِشنوُں بھگوان، جوتی جوت سروُپ وڈ سوُرا سربنگ۔ وڈ سوُرا سوُربیِر۔ کیا کوئی جانے وڈ پیِرن پیِر۔ بُھلے وِچ مات اؤلیئے دستگیِر۔ کلجُگ انتم آپ تُڑائے پاپاں بدھّی زنجیر۔ سوہنگ کھنڈا ہتّھ اُٹھائے چار کُنٹ کرائے وہیِر۔ بےمُکھاں ہرِ دِس نہ آئے، نہ کوئی دیوے دھیِر۔ گھر گھر روون ناریاں رنڈاں، وہِندے رہن نیتر نیِر۔ کلجُگ تیرا انتم انت کرائے اخیِر۔ وہِندے وہن جائن شک، مہاراج شیر سِنگھ وِشنوُں بھگوان، مات جوت پرگٹائے وڈ پیِرن پیِر۔ مات جوت پرگٹائے۔ اپنا بھیو آپ کُھلائے۔ سوہنگ ساچا شبد چلائے۔ سَتجُگ ساچا مارگ لائے۔ جوُٹھ جھوُٹھ ہرِ نشٹ کرائے۔ رنگ انوُٹھ آپ چڑھائے۔ مہاراج شیر سِنگھ وِشنوُں بھگوان، سرِشٹ سبائی اِک کرائے۔ سچ بھگواننا، پربھ ساچا ماننا۔ بھرم بُھلیکھا سرب نِکالنا۔ مہاراج شیر سِنگھ وِشنوُں بھگوان، پنچم جیٹھ وِچ مات جوت پرگٹاننا۔ مات لوک وجّا ڈنک۔ اِک کرائے راؤ رنک۔ آپ مِٹائے آتم شنک۔ مہاراج شیر سِنگھ وِشنوُں بھگوان، گُرمُکھاں جوت جگائے آتم لائے ساچی تنک۔