کتب خانہGranth 8 (Shahmukhi)

۵ اَسوُ ۲۰۱۶ بِکرمی سردارا سِنگھ دے گھر پِنڈ پکھووال ضِلع لُدھیانہ

ایکنکارا ہرِ بھگوان، عقل کلا اکھوائیا۔ جوتی نوُر نوُر مہان، نِرگُن روُپ ڈگمگائیا۔ سَت پُرکھ سَت سُلطان، شاہو بھوُپ وڈ وڈیائیا۔ اِک اِکلّا راج راجان، ایکنکارا آپ اکھوائیا۔ ایکا وسیا سچ مکان، سچکھنڈ بَیٹھا آسن لائیا۔ شبد سِنگھاسن اِک مہان، پُرکھ ابناسی ڈیرہ لائیا۔ آپے جانے اپنا دُھر فرمان، نہ کوئی دوُسر سنگ رلائیا۔ جوتی جوت سروُپ ہرِ، آپ اپنی جوت دھر، آد نِرنجن آپ اکھوائیا۔ آد نِرنجن ہرِ بھگوانا، ایکا رنگ سمائندا۔ آد جُگادی کھیل مہانا، جُگ جُگ ویس وٹائندا۔ شاہو بھوُپ نر ہرِ سُلطانا، نِرویَر ناؤں دھرائندا۔ موُرت اکال بھیوَ نہ آنا، بھیوَ ابھید چُھپائندا۔ جوتی جوت سروُپ ہرِ، آپ اپنی جوت دھر، انبھوَ پرکاس کرائندا۔ انبھوَ پرکاس ہرِ بھگوَنت، بھیوَ ابھید ابھیدیا۔ کھیلے کھیل جُگا جُگنت، اچھل اچھل اچھیدیا۔ پاوے سار لکھّ چؤراسی جیِو جنت، لیکھا جانے چارے ویدیا۔ آپے جانے اپنا منت، آپے لِکھے لیکھ کتیبیا۔ آپے در گھر ساچے سوبھاوَنت، اپنے نیتر آپے پیکھیا۔ آپے داتا دانی ہرِ گُنونت، جوتی جوت سروُپ ہرِ، آپ اپنی جوت دھر، آپے کھیلے کھیل جُگا جُگنتیا۔ آپے داتا ہرِ نِرنکار، ایکا رنگ سمائندا۔ شبد اگمّی بول جَیکار، ایکا نعرہ لائندا۔ آپے سچ گھر کرے آکار، نِرگُن اپنی جوت جگائندا۔ آپے وسیا اندھ اندھیار، دھوُاں دھار آپ سمائندا۔ آپے لوآں پُریاں محل لئے اُسار، چؤداں لوکاں مٹھ تپائندا۔ آپے وِشنوُں بھرے ہرِ بھنڈار، آپے برہما پاربرہم اُپجائندا۔ آپے شنکر لئے سنگھار، نام کھنڈا ہتّھ چمکائندا۔ آپے باسک سیجا سُتا پَیر پسار، سانگو پانگ ہنڈھائندا۔ آپے مُکھ سہنسر گائے وارو وار، رسنا جِہوا آپ ہِلائندا۔ آپے کروڑ تیتیِسا دئے آدھار، آپے سُرپت سیو کرائندا۔ آپے گن گندھرب بول جَیکار، گیِت انادی آپ سُنائندا۔ آپے ترےَگُن مایا بنّھے دھار، آپے پنج تت میل مِلائندا۔ آپے من مت بُدھ کر شِنگار، ہڈّ ماس ناڑی رتّ جوڑ جُڑائندا۔ آپے گھر وِچ گھر اپنا رکھ، گھر ساچا اِک سُہائندا۔ آپے کرے بند کِواڑ، آپے مُکھ کُھلائندا۔ آپے ویکھے کایا مندر اندر ڈوُنگھی غار، محل اٹل آپ سُہائندا۔ آپے دیِپک جوتی دیوے بال، اگیان اندھیر گوائندا۔ آپے امرت آتم سر سروور بھریا تال، نِجھر جھِرنا آپ جھِرائندا۔ آپے آتم سیجا بَیٹھ کرے پرِتپال، دِوس ریَن ویکھ وکھائندا۔ آپے شاہ آپے کنگال، آپے سرگُن نِرگُن ڈیرہ لائندا۔ آپے وست نام دھن مال، سچ خزیِنہ آپ ہو جائندا۔ آپے لکھّ چؤراسی توڑ

جنجال، جگت جنجالا ویکھ وکھائندا۔ آپے جُگ جُگ چلے اولّڑی چال، وید کتیب بھیوَ نہ پائندا۔ آپے گگن منڈل ویکھے ساچا تھال، انحد سیوا ساچی لائندا۔ جوتی جوت سروُپ ہرِ، آپ اپنی جوت دھر، ابناسی کرتا کھیل کھلائندا۔ ابناسی پُرکھ پُرکھ سُلطانا، وڈ وڈّی وڈیائیا۔ اِک اِکلّا والی دو جہانا، جُگ کرتا ناؤں رکھائیا۔ جودھا سوُربیِر مرد مردانہ، پاربرہم آپ اکھوائیا۔ سچکھنڈ مندر اِک سُہانا، چار دیِوار نہ کوئی بنائیا۔ چھپر چھنّ نہ کوئی پانا، نہ باڈی سنگ رکھائیا۔ دِیا باتی کملاپاتی اِک جگانا، آپ اپنی کر رُشنائیا۔ گائے دُھن سچ ترانہ، آپ اپنا شبد الائیا۔ سچ سِنگھاسن بَیٹھ مردانہ، مِہربان وڈ وڈیائیا۔ چلائے حُکم دُھر فرمانا، درگاہ ساچی سوبھا پائیا۔ نہ کوئی در دِسے دربانا، نہ کوئی سیِس جھُکائیا۔ روَ سس نہ کوئی نِشانہ، منڈل منڈپ نہ کوئی وکھائیا۔ اِک اِکلّا سِری بھگوانا، تِھر گھر واسی پُرکھ ابناسی بےپرواہیِا۔ بےپرواہ بےعیب پروردِگار، ایکا ایک اکھوائندا۔ ایکا وسے سچ مینار، سچ محلہ آپ وسائندا۔ آپے ناری کنت بھتار، آپ اپنی سیج ہنڈھائندا۔ آپے شبد سُت بن دُلار، آپ اپنی گود سُہائندا۔ آپے نِیوں نِیوں کرے نِمسکار، نِرگُن نِرگُن سیِس جھُکائندا۔ آپے ہویا خبردار، آپ اپنی کھیل کھلائندا۔ آپے لکھّ چؤراسی کر تیار، ایکا اپنی ونڈ ونڈائندا۔ آپے جیرج انڈ بھرے بھنڈار، اُتبُھج سیتج سنگ مِلائندا۔ آپے جل بِنب دئے ادھار، دھرت دھوَل سُہائندا۔ آپے جنگل جوُہ اُجاڑ پہاڑ، ڈوُنگھی کَندر ڈیرہ لائندا۔ آپے جل تھل مہیئل پسر پسار، آپ اپنا رنگ رنگائندا۔ آپے ساچا سئیا بن بھتار، آپ اپنا ویس وٹائندا۔ آپے پنج تت کرے پیار، نِرگُن سرگُن میل مِلائندا۔ آپے شبد انادی انحد دھار، آپ اپنا راگ سُنائندا۔ آپے پنچم سخیاں میِت مُرار، گھر گھر بہہ بہہ منگل گائندا۔ آپے رنگ رلیاں مانے گُپت ظاہر، دِس کِسے نہ آئیندا۔ آپے سُرت سوانی کرے پیار، برہم پاربرہم مِلائندا۔ مرے نہ جمےّ وِچ سنسار، اجوُنی رہِت آپ اکھوائندا۔ جُگا جُگنتر بنّھے دھار، جُگ کرتا ویس وٹائندا۔ آپے گُر پیِر اوتار، ایکا اپنا ناؤں رکھائندا۔ آپے جوتی جوبن دئے ہُلار، آپے شبدی رنگ چڑھائندا۔ آپے ویکھے کھیل اگمّ اپار، الکھ اگوچر بھیوَ نہ آئیندا۔ جوتی جوت سروُپ ہرِ، آپ اپنی جوت دھر، کرنی کرتا کرنیہارا، آد جُگادی لےَ اوتارا، ایکا گُر اکھوائندا۔ ایکا گُر شاہو بھوُپ، سَتگُر ناؤں دھرائندا۔ وسنہارا چارے کوُٹ، دہ دِشا ڈیرہ لائندا۔ اپنی مہما جانے انوُپ، بھیوَ کوئی نہ پائندا۔ نہ کوئی رنگ نہ کوئی روُپ، گھٹ گھٹ اپنا آسن لائندا۔ جوتی جوت سروُپ ہرِ، آپ اپنی جوت دھر،

جُگا جُگنتر لوک مات بُجھائے لگّی بسنتر، امرت میگھ برسائندا۔ امرت میگھ ٹھنڈی ٹھار، ہرِ سَتگُر ناؤں رکھائیا۔ امرت میگھ ٹھنڈی ٹھار، ہرِ سَتگُر ہتّھ اُٹھائیا۔ جُگا جُگنتر پاوے سار، جن بھگتاں لئے ترائیا۔ ہرِجن بخشے چرن پیار، آپ اپنی بوُجھ بُجھائیا۔ منُمکھاں توڑے گڑھ ہنکار، نام کھنڈا ہتّھ اُٹھائیا۔ چنڈ پرچنڈ تِکھی دھار، ہرِ ساچا اِک رکھائیا۔ لکھّ چؤراسی آپے کرے خوار، آپ اپنا میل مِلائیا۔ آپے دُشٹاں دئے سنگھار، بلدھاری وڈ وڈیائیا۔ پائے ونڈ ہرِ نِرنکار، ونڈنہارا بےپرواہیِا۔ برہمنڈ کھنڈ اِک جَیکار، ایکا نعرہ لائیا۔ بھگت بھگوَنت پائے سار، بھگتن بھگتی لیکھے لائیا۔ سادھاں سنتاں کرے پیار، آپ اپنی گود اُٹھائیا۔ گُرمُکھ ساچے لائے پار، نام بیڑے آپ چڑھائیا۔ گُرمُکھاں دیوے اِک ادھار، آتم انتر برہم جنائیا۔ ساچا منتر اِک جَیکار، گُر شبدی آپ جنائیا۔ جوتی جوت سروُپ ہرِ، آپ اپنی جوت دھر، نِرگُن سرگُن کھیل کھلائیا۔ نِرگُن روُپ پُرکھ اگمّ، بےانت بےانت بےانتیا۔ سرگُن اندر پئے جمّ، شبدی ڈھول مردنگ وجنتیا۔ آپے جانے اپنا کمّ، آپ اپنا کھیل کِھلنتیا۔ سَتجُگ بیڑا آپے بنّھ، اپنے کندھ اُٹھنتیا۔ جگت وڈیائی دھنّ دھنّ، رسنا جِہوا آپ سُہنتیا۔ ہنکاری بھانڈا دیوے بھنّ، جوُٹھ جھوُٹھ میٹ مِٹنتیا۔ جوتی جوت سروُپ ہرِ، آپ اپنی جوت دھر، اپنا ویس آپ وٹنتیا۔ سَتجُگ ویس ہرِ وٹایا، ہرِ سجّن وڈّ وڈیائیا۔ شبد برہمادی اِک چلایا، ایکا گُن وکھائیا۔ جوتی جوت سروُپ ہرِ، آپ اپنی جوت دھر، وار اٹھاراں ویس وٹائیا۔ سَتجُگ ہویا پار کِنار، تریتا لئے انگڑائیا۔ کھیلے کھیل کھیلنہار، رام رام روُپ وٹائیا۔ توڑنہارا گڑھ ہنکار، لنکا گڑھ تُڑائیا۔ غریِب نِمانیاں پاوے سار، اپنے گلے لگائیا۔ انتم بیڑا کریا پار، تِھر کوئے رہن نہ پائیا۔ دواپر بنّھے آپے دھار، اپنی ریِت آپ چلائیا۔ کاہنا کرِشنا ہو تیار، نام بنسری اِک وجائیا۔ ایکا منتر اِک گیان، ایکا منتر دِرڑائیا۔ ایکا لیکھا لِکھے لیکھ لِکھار، وید ویاسا بوُجھ بُجھائیا۔ کلجُگ کھیلے کھیل وِچ سنسار، خالق خلق آپ اکھوائیا۔ پرگٹ ہووے بےعیب پروردِگار، نوُرو نوُر نوُر رُشنائیا۔ پاوے سار سنگ محمد چار یار، اَدھ وِچکارے میل مِلائیا۔ عیسیٰ موُسیٰ کریا خبردار، کالا سوُسا تن چُھہائیا۔ اِنجیِلاں قُرآناں بھر بھنڈار، تیِس بتیِسا گیا سُنائیا۔ نیتر نیَن اِک اُگھاڑ، ایکا اکّھ کُھلائیا۔ چؤداں طبقاں کھول کِواڑ، اپنی بوُجھ بُجھائیا۔ اَگے کریا بند دوار، محمد بھیوَ نہ رائیا۔ االلہ رانی کر شِنگار، نیتر کجلا اپنا پائیا۔ پُرکھ ابناسی اِچھیا پائے بِھچھیا بھرے بھنڈار، لوک مات وڈّی وڈیائیا۔ ساچی سِکھیا دُھر کرتار، قلمی کلمہ آپ سُنائیا۔

کائنات کرے خبردار، سویا کوئی رہن نہ پائیا۔ جوتی جوت سروُپ ہرِ، آپ اپنی جوت دھر، دیوے ور بےپرواہیِا۔ محمد ور گھر ساچا پایا، گھر ساچا ویکھ وکھائندا۔ کلجُگ اَگے اُٹھ اُٹھ آیا، نیتر رو رو نیِر وہائندا۔ چاروں کُنٹ ڈنک وجایا، ہرِ کا نام نہ کوئی بُھلائندا۔ پُرکھ ابناسی اَگے نِیوں نِیوں سیِس جھُکایا، رو اپنا حال سُنائندا، جوتی جوت سروُپ ہرِ، آپ اپنی جوت دھر، اپنا کھیل کھلائندا۔ کلجُگ اُٹھ بال نادان، ہرِ ساچا آپ سمجھائیا۔ تیرا سنگ نِبھائے پنج شیَطان، پنچم کرے کُڑمائیا۔ آسا ترِسنا نال رکان، جھوُٹھی نار نال رلائیا۔ مایا ممتا ہؤمے ہنگتا گیِت سارے گان، ہرِ کا روُپ دِس نہ آئیا۔ محمد اُٹھے نؤجوان، تیرا سنگ نِبھائیا۔ اُمت اُمتی کر پردھان، آپ اپنا ڈنک وجائیا۔ جوتی جوت سروُپ ہرِ، آپ اپنی جوت دھر، کھیلے کھیل اگمّ اپار، دوہاں وِچولا آپ اکھوائیا۔ دوہاں وِچولا ہرِ ہرِ ہویا، بھیوَ کوئی نہ پائندا۔ جیِو جنت لوک مات سویا، ہرِ ساچا کھیل کھلائندا۔ جوُٹھا جھوُٹھا بیِج بویا، کوُڑا پھل لگائندا۔ درگاہ ساچی ملِے نہ کوئی ڈھویا، سچکھنڈ نہ کوئی سُہائندا۔ جوتی جوت سروُپ ہرِ، آپ اپنی جوت دھر، آپ اپنی کھیل کر، لوک مات ویکھ وکھائندا۔ دوہاں میلا جگت سنسار، چاروں کُنٹ اندھیرا چھایا۔ سادھاں سنتاں نہ سُنے کوئی پُکار، دِوس ریَن رہے کُرلایا۔ جیِواں جنتاں نہ دِسے کوئی سہار، نہ کوئی سنگ نِبھایا۔ چاروں کُنٹ ہوئے خوار، دھیِرج دھیِر نہ کوئی دھرایا۔ کلجُگ مارے اِک للکار، اپنا بل رکھایا۔ محمد کرے سچ پیار، ایکا کلمہ رہیا پڑھایا۔ دھرنی منگے بن بِھکھار، گل پلّوُ اپنا پایا۔ چُکیا نہ جائے کلجُگ بھار، آپ اپنا حال سُنایا۔ پُرکھ ابناسی تیرا ٹھانڈا دربار، بِن تیرے ہوئے نہ کوئی سہایا۔ پاربرہم پربھ دئے پیار، دے مت آپ سمجھایا۔ تیرا کرے ہؤلا بھار، میرا تیرے نال رکھایا۔ نانک نِرگُن ہو تیار، لوک مات ویکھ وکھایا۔ ننا : نِرگُن کر آکار، نرائن روُپ وٹایا۔ ککا : کرم پائے نیِسان سرب سنسار، آپ اپنا بھیوَ کُھلایا۔ جیِواں جنتاں کرے کلیان، نام نِدھانا اِک جپایا۔ جوتی جوت سروُپ ہرِ، آپ اپنی جوت دھر، کھیلے کھیل اگمّ اپار، آپ اپنا ویس وٹایا۔ نانک جوتی ہرِ نِرنکار، نِرگُن روُپ مات کرے رُشنائیا۔ سچکھنڈ میلا دُھر دربار، وِچھڑ کدے نہ جائیا۔ کوٹن کوٹ روَ سس کرن نِمسکار، برہما وِشن شِو بَیٹھے سیِس جھُکائیا۔ نانک پایا اِک گُر کرتار، ہرِ سَتگُر ساچا ماہیِا۔ دوہاں وِچولا کھیل اپار، سَت نام آپ دھرائیا۔ سَتگُر پوُرا لئے اوتار، لوک مات وجّی ودھائیا۔ چار ورناں کرے اِک پیار، اوُچاں نیِچاں گلے لگائیا۔ مُلّا شیخ مسائق پیِر دستگیِر بنّھے ایکا دھار، نوُر اِلاہی اِک

وکھائیا۔ اُچے ٹِلّے پربت توڑے گڑھ ہنکار، ٹھگ چور یار آپ سمجھائیا۔ ہرِجن دیوے سچ پیار، آتم انتر ایکا نام جنائیا۔ کایا مندر دیِپک دیوے بال، اگیان اندھیر مِٹائیا۔ شبد وجائے ساچا تال، انحد سیوا لائیا۔ آپے بن بن پِھرے کنگال، اپنی سیوا آپ کمائیا۔ گُرمُکھاں توڑے جگت جنجال، اپنی جھولی آپ بھرائیا۔ پھل لگائے ساچے ڈال، امرت میوہ اِک کھوائیا۔ لوک مات آیا بن دلال، کھتری براہمن شوُدر وَیش نہ کوئی جنائیا۔ جوتی جوت سروُپ ہرِ، آپ اپنی جوت دھر، جُگ جُگ اپنی کھیل کھلائیا۔ نانک سَتگُر ہرِ بلہار، بلہاری ہرِ پایا۔ شبدی شبد بول جَیکار، ایکا ایکنکارا آپ دھیایا۔ آپے ورتے ورتاوے وِچ سنسار، سرگُن نِرگُن میل مِلایا۔ جیِواں جنتاں سادھاں سنتاں دئے ہُلار، شبد ہُلارا اِک رکھایا۔ نؤ دوارے پار کِنار، بجر کپاٹی کُنڈا لاہیا۔ ڈوُنگھی کَندر پاوے سار، سُکھمن ناڑی ویکھ وکھایا۔ ٹیڈھی بنک ہو اُجیار، آپ اپنا درس دِکھایا۔ تربَینی نیَنی کھیل اپار، سوَچّھ سروُپی ویکھ وکھایا۔ دسم دواری کر پیار، گُرمُکھ سُرتی ناری لئے پرنایا۔ جوتی جوت سروُپ ہرِ، آپ اپنی جوت دھر، ساچا مارگ اِک وکھایا۔ ساچا مارگ ایکا لا، چار ورناں اِک جنائیا۔ رام روُپ آپ اکھوا، سیِتا سُرتی آپ پرنائیا۔ کاہنا کرِشنا ویس وٹا، ہرِ بھگت لئے ترائیا۔ بِن ہرِ نامے کوئی نہ تھاں، درگاہ ساچی ملِے سزائیا۔ سرب جیِیاں دا پِتا ماں، پُرکھ اکال اِک وکھائیا۔ جُگا جُگنتر کرے سچ نیاں، حق نِبیڑا آپ کرائیا۔ کایا نگر کھیڑا ویکھے جگت گراں، اپ تیج وائے پرِتھمی آکاش ڈیرہ لائیا۔ نِتھاویاں دیوے ساچا تھاں، آپ اپنی دَیا کمائیا۔ لکھّ چؤراسی گیا سمجھا، کلجُگ انتم کوُکے دئے دُہائیا۔ کوئی نہ کِسے پکڑے بانہہ، ناتا تُٹے بھَین بھائیا۔ راج راجان نہ کرن نیاں، بُھلی سرب لوکائیا۔ کھیلے کھیل پربھ بےپرواہ، نِہکلنک جوت کر رُشنائیا۔ لکھّ چؤراسی دئے کھپا، جوُٹھ جھوُٹھ رہن نہ پائیا۔ ساچا ڈنکا دئے وجا، جاگرت جوت اِک وکھائیا۔ کاگوں ہنس دئے بنا، مانک موتی نام چوگ چُگائیا۔ جوتی جوت سروُپ ہرِ، آپ اپنی جوت دھر، اپنا لیکھا لیکھ سمجھائیا۔ نانک لِکھیا لیکھ اپار، انگد انگ لگائندا۔ انگد بھریا سچ بھنڈار، امرداس ورتائندا۔ امرداس کر پیار، رام داس نال رلائندا۔ رام داس ہو اُجیار، ارجن شبد الائندا۔ شبد گُر سرب سِکدار، ایکا ایک اکھوائندا۔ سنتاں بھگتاں کرے پیار، جُگ جُگ میل مِلائندا۔ بودھ اگادھی اگادھ بودھی کھیل اپار، بھیوَ کوئی نہ پائندا۔ گُروُ گرنتھ گُر کر تیار، نِرگُن شبد ونڈ ونڈائندا۔ دیہہ جوت کر پیار، ہرِ گوبِند میل مِلائندا۔ ہرِ رائے کرے خبردار، رام رائے مُکھ سُہائندا۔ بال

بالا میِت مُرار، ہرِ کرِشنا آپ ترائندا۔ تیغ بہادر ٹھانڈا ٹھار، ٹھنڈی ٹھار دھار چلائندا۔ سیِس جگدیِش اپنا وار، تیِس بتیِس ویکھ وکھائندا۔ بیِس بیِسا کریا خبردار، گُر گوبِند راہ تکائندا۔ سُت دُلارا کر پیار، پوُت سپوُتا ناؤں دھرائندا۔ پُرکھ ابناسی میِت مُرار، ایکا رنگ رنگائندا۔ وسیا چیِت نہ ہوئے باہر، ایکا دوُجا بھؤ چُکائندا۔ آپے کھول سچ دوار، ساچا مارگ آپے لائندا۔ آپے ہوَنی ہوَن کھیل نیار، پوَنی پوَن آپ ہو جائندا۔ آپے سُگندھی بھرے بھنڈار، آپے اپنے لیکھے لائندا۔ آپے نام کِھچ اِک تلوار، چنڈی آپ چمکائندا۔ آپے کرے تن شِنگار، گاترے آپ لٹکائندا۔ آپے ہویا خبردار، اپنا بھیوَ کُھلائندا۔ آپے پنچاں بنیا سِکدار، ساچا حُکم سُنائندا۔ کِھچی آئے وارو وار، سِر سِر بھیٹا اِک وکھائندا۔ امرت بھریا سچ بھنڈار، نام باٹے آپے پائندا۔ کھنڈا پِھرے اَدھوِچکار، ساچی سیو کمائندا۔ مِٹھا رس گُر سنگت پیار، گھولی گھول گھُمائندا۔ ہسّ ہسّ گُرمُکھ کرے تیار، متھے تِلک لگائندا۔ نسّ نسّ ویکھ سنسار، کلجُگ پندھ مُکائندا۔ پنچم پنچم کر تیار، پنچم حُکم سُنائندا۔ پنچم میِتا خبردار، آلس نِندرا مگروں لاہِندا۔ پنچم بھریا نام بھنڈار، پنچم گُر سمجھائندا۔ گُروُ گرنتھ گُر کر وِچار، ایکا سِکھیا سِکھ سمجھائندا۔ آپے ڈھیَہہ پئے دوار، اَگے جھولی اپنی ڈاہِندا۔ کھیلے کھیل کھیلنہار، بھیوَ کوئی نہ پائندا۔ آپے وسیا اندر باہر، پُری انند آپ سُہائندا۔ آپے سرسا کرے پار، آپے گُرسِکھ وِچ ٹِکائندا۔ آپے پوُت سپوُتا دیوے وار، آپے سوُلاں ستّھر ہیٹھ وِچھائندا۔ آپے ڈھولا گائے ہرِ کرتار، ایکا شُکر منائندا۔ پُرکھ ابناسی ویکھنہار، بُھل کدے نہ جائندا۔ دیوے ور سچّی سرکار، ساچا حُکم سُنائندا۔ تیرا قرضہ وڈّا بھار، پُرکھ اکال اپنے سِر اُٹھائندا۔ کلجُگ انتم توڑے جگت جنجال، تیرا بندھن بندھ پائندا۔ تیرا روُپ ورتے وِچ سنسار، شبدی ناؤں رکھائندا۔ پنج تت نہ کوئی آکار، گوبِند ناؤں دھرائندا۔ نام کھنڈا تیز کٹار، تیرے ہتّھ پھڑائندا۔ پُرکھ ابناسی ہوئے نال تیار، دِس کِسے نہ آئیندا۔ سرب جیِیاں دا سانجھا یار، ساچی سیو کمائندا۔ نِرگُن سرگُن سنگم کر وِچار، آپ اپنی کل ورتائندا۔ دیوے درس اگمّ اپار، سَت سروُپ انوُپ درس دکھائندا۔ جوتی جوت سروُپ ہرِ، آپ اپنی جوت دھر، گُر گوبِند ویکھ وکھائندا۔ گوبِند سُنیا ہرِ فرمان، گھر ساچے وجّی ودھائیا۔ تیرا روُپ سِری بھگوان، میرا رنگ چڑھائیا۔ تیرا نام گُن نِدھان، برہمنڈ کھنڈ وجےّ ودھائیا۔ تیرا بِبان اِک نِشان، لوآں پُریاں آپ پِھرائیا۔ تیرا چِلّہ تیِر کمان، تیرا ہتّھ اُٹھائیا۔ لکھّ چؤراسی پاوے آن، تیرا حُکم وڈّی وڈیائیا۔ پرِتھمی آکاش ویکھے مار دھیان، گگن

منڈل پھیرا پائیا۔ راج راجانا شاہ سُلطاناں توڑے مان ابِھمان، ہؤمے گڑھ رہن نہ پائیا۔ جوُٹھا جھوُٹھا مِٹے جگت نِشان، کوُڑی کِریا دئے مِٹائیا۔ تیرا سنگ سِری بھگوان، وِچھڑ کدے نہ جائیا۔ ایکنکارا میلا وِچ جہان، ایکا ڈھئیا دئے گواہیِا۔ پُرکھ ابناسی ہو مِہربان، آپ اپنی دَیا کمایا۔ جوتی جوت سروُپ ہرِ، آپ اپنی جوت دھر، پُرکھ اکال دیِن دَیال وسنہارا سچ سچّی دھرمسال، سچکھنڈ بَیٹھا ڈیرہ لائیا۔ سچکھنڈ نِواسا پُرکھ ابناسا، ایکا کھیل کھلائندا۔ گوبِند تیرا سچ بھرواسا، ساچا سنگ نِبھائندا۔ جوتی جوت کرے پرکاسا، پرکاس پرکاس کرائندا۔ آد جُگاد نہ کدے وِناسا، جنم مرن نہ کوئی رکھائندا۔ کدے نہ آوے ہار پاسا، ہار جِت نہ کوئی جنائندا۔ وسنہارا کایا کاسہ، پنج تت گڑھ سُہائندا۔ کھیلے کھیل پرِتھمی آکاشا، چؤداں لوکاں ویکھ وکھائندا۔ جن بھگتاں ہوئے داسی داسا، گُرمُکھاں راہ تکائندا۔ جوتی جوت سروُپ ہرِ، آپ اپنی جوت دھر، اپنا روُپ آپ سمجھائندا۔ اپنا روُپ ہرِ سمجھائے، شبدی شبد جنائیا۔ کلجُگ انتم ویس وٹائے، کوُڑا پندھ مُکائیا۔ دھرم نِشانہ اِک جھُلائے، ستّ رنگ آپ رنگائیا۔ شاہ سُلطاناں خاک مِلائے، سیِس تاج نہ کوئی ٹِکائیا۔ ایکا اِشٹ دیوَ پُرکھ اکال رکھائے، نہ کوئی دوُسر سیِس جھُکائیا۔ چار ورناں بنائے بھَیناں بھائے، ایکا دوُجا میٹ مِٹائیا۔ راؤ رنکاں آپ سمجھائے، برہم مت اِک سمجھائیا۔ ایکا تت سرب وکھائے، تتی وا نہ لگّے رائیا۔ ساچا رتھ آپ چلائے، رتھ رتھواہی سیو کمائیا۔ اپنی گاتھا آپ سُنائے، گُنونتا وڈ وڈیائیا۔ گُرسِکھاں سگلا ساتھ آپ نِبھائے، سگلا سنگ آپ ہو جائیا۔ ایکا نام مردنگ وجائے، برہما ویتا اٹّھے نیَن جاگ کُھلائیا۔ وِشنوُں سیجا دئے ہِلائے، لچھمی نال رلائیا۔ شنکر باسک تشکا گلوں لاہے، ہتّھ ترسوُل اُٹھائیا۔ کروڑ تیتیِسا رو رو دئے دُہائے، کلجُگ نہ کوئی سہائیا۔ اِند اِندراسن تخت تجائے، برہما منونتر ویکھ وکھائیا۔ نؤ کھنڈ پرِتھمی کاج رچائے، ستّاں دیِپاں پھول پُھلائیا۔ سو پُرکھ نِرنجن ایکا نام باز اُڈائے، چارے کُنٹ پِھرائیا۔ نیِلا نیِلی دھاروں دھار پار کرائے، سولاں کلیاں آسن پائیا۔ شاہ سوار ڈیرہ لائے، پیِرن پیِرا وڈ وڈیائیا۔ دستگیِراں میٹ مِٹائے، شاہ حقیِراں کھیل کھلائیا۔ جن بھگتاں جگت بھیِڑاں کٹ وکھائے، آپ اپنی دَیا کمائیا۔ چاروں کُنٹ وہیِراں دئے پائے، جوتی جوت سروُپ ہرِ، آپ اپنی جوت دھر، کلجُگ تیری انتم ور، آپ اپنا ویس وٹائیا۔ کلجُگ ویس ہرِ اولّا، اپنا آپ کرائندا۔ ویکھنہارا رانی االلہ، دُئی دوَیتی پردہ لاہِندا۔ جانے روُپ ہرِ بِسمِلا، بِسمِل وِچ آپ سمائندا۔ چؤداں صدیاں کٹیاں چِھلا، آپ اپنا کھیل کھلائندا۔ جگت سِنگھاسن انتم

ہِلا، دھرت دھوَل نہ کوئی ٹِکائندا۔ پاوے سار عیسیٰ موُسیٰ بوُرا ککاّ بِلا، اُچا ٹِلا پربت پھول پُھلائندا۔ جوتی جوت سروُپ ہرِ، آپ اپنی جوت دھر، کلجُگ تیری انتم ور، آپ اپنا کھیل کھلائندا۔ کھیل کھلنتا ہرِ نِرنکار، آد جُگاد سِری بھگوانیا۔ نِہکلنکا لئے اوتار، جوتی نوُر دھرے مہانیا۔ شبد رکھے تِکھی دھار، دو جہاناں ویکھ وکھانیا۔ ویہہ سؤ بِکرمی ہو تیار، لوک مات ہویا پردھانیا۔ ویہہ سؤ اِک اکّھ اُگھاڑ، تریَلوکی مارے تیِر نِشانیا۔ ویہہ سؤ دو ساچا لاڑ سچ تت کرے شِنگار، کھیلے کھیل گُن نِدھانیا۔ ویہہ سؤ تِنّ نہ کوئی روُپ نہ کوئی چِنھ، آپ اپنا ہویا جانی جانیا۔ ویہہ سؤ پنج گُرمُکھ آتم سُتا سچ پلنگ، گھر مندر اِک سُہانیا۔ ویہہ سؤ چھ اپنے شبد لگا نیہوں، ساچا ناتا جوڑ جُڑانیا۔ ویہہ سؤ ستّ ہویا اُتپت، ہڈّ ماس ناڑی نہ دِسے رتّ، جوتی شبدی جوت بھگوانیا۔ ویہہ سؤ اٹّھ کھیلے کھیل کملاپت، بیِج بیِجیا اپنے وت، آپ اپنا ہل چلانیا۔ ویہہ سؤ بِکرمی نؤں، نؤ کھنڈ پرِتھمی رہیا بھؤں، سچکھنڈ دوارے نہ جائے سؤں، آلس نِندرا نہ کوئی رکھانیا۔ ویہہ سؤ دس، کھیلے کھیل ہسّ ہسّ، ہرِجن میلے نسّ نسّ، گُرمُکھ بال اِنجانے گود اُٹھانیا۔ ساڈھے تِنّ ہتّھ مندر اندر وس، کروڑ تیتیِسا کرے بھس، اِند اِندراسن تج جائے نسّ، ہرِ ساچا ویکھ وکھانیا۔ جگت جگدیِشا کھیلے کھیل شاہو شابیِسا نِیوں نِیوں سیِس جھُکائن روَ سس، لوک مات ہوئے پردھانیا۔ جوتی جوت سروُپ ہرِ، آپ اپنی جوت دھر، نؤ دوارے کھول کِواڑ، ساچا مندر کر تیار، ویہہ سؤ باراں میِت مُرار، ہاڑ ستاراں تِھت وکھانیا۔ ویہہ سؤ باراں کھیل اپارا، ہرِ ساچا کھیل کھلائندا۔ ہرِ سنگت کرے سچ پیارا، ساچا دھام وکھائندا۔ ساڈھے تِنّ ہتّھ نگری اُچ مِنارا، سچ محل آپ اُپائندا۔ نِرگُن دیِپک کر اُجیارا، آپے ویکھ وکھائندا۔ شبد اگمّی بول جَیکارا، ساچا ڈھولا گائندا۔ لوک مات ونج کرائے سچ ونجارا، ایکا وست وکھائندا۔ گُرمُکھاں بھرے نام بھنڈارا، آسا ترِسنا میٹ مِٹائندا۔ آپے بنیا ہرِ ورتارا، آپ اپنی کھیل کھلائندا۔ سمت تیراں گُپت ظاہرا، راج راجانا آپ اُٹھائندا۔ سادھاں سنتاں دئے ہُلارا، کلجُگ اکّھ کُھلائندا۔ انتم آیا پار کنارہ، گُر گوبِند لیکھ لِکھائندا۔ اُچا ٹِلا ڈھہے منارا، اِٹّ نال اِٹّ نہ کوئی رکھائندا۔ سمت چؤداں میِت مُرارا، ہرِ سنگت ویکھ وکھائندا۔ ایکا اِکّی ایکنکارا، ایکا رنگ رنگائندا۔ دھاروں تِکھی وِچ سنسارا، والوں نِکّی میل مِلائندا۔ بھیوَ نہ پائن مُنی رِکھی، وید پُران شاستر سِمرت اِنجیِل قُرآن گیِتا گیان کھانی بانی اپنا حُکم چلائندا۔ دیونہارا دُھر فرمان، جُگ جُگ کار کمائندا۔ سمت پندراں نؤجوان، اپنا بل وکھائندا۔ اٹھسٹھ

تیِرتھ ویکھے جگت گیان، سادھاں سنتاں کایا مٹھ پھول پُھلائندا۔ گنگا جمنا ویکھے مار دھیان، گوداوری سُرستی پھول پُھلائندا۔ جوتی جوت سروُپ ہرِ، آپ اپنی جوت دھر، اٹھسٹھ موُل چُکائندا۔ اٹھسٹھ رِڑکے ہرِ ہرِ پانی، نام مدھانا پایا۔ ویکھنہارا چارے کھانی، چارے ویداں پھول پُھلایا۔ اٹھاراں پُران ویکھے مار دھیانی، پُران پُرانی آپے گایا۔ گیِتا گیان ہو پردھانی، ایکا سِکھیا سِکھ سمجھایا۔ اِنجیِل قُرآنی جگت نِشانی، آپے ویکھ وکھایا۔ نانک نِرگُن گائے بانی، بان نِرالا لایا۔ گوبِند مِلیا ساچا ہانی، پُرکھ اکال منایا۔ کلجُگ انتم کھیل مہانی، پُرکھ ابناسی جوڑ جُڑایا۔ گُرمُکھاں دیوے پد نِربانی، چؤتھا پد وکھایا۔ تیِجا نیَن اِک کُھلانی، اپنا پردہ لاہیا۔ انحد سُنائے ساچی بانی، اپنا راگ الایا۔ سمت سولاں ویہہ سؤ بِکرمی نؤ کھنڈ پرِتھمی دیوے اِک نِشانی، بُھل رہے نہ رائیا۔ جوتی جوت سروُپ ہرِ، آپ اپنی جوت دھر، کلجُگ تیری انتم ور، اَسوُ پنج دِوس سُہایا۔ اَسوُ پنج پنچ پیارا، پنچم مُکھ صالاحیندا۔ کلجُگ کرے پار کنارہ، اَدھوِچکار نہ کوئی رکھائندا۔ لکھّ چؤراسی پاوے سارا، گھٹ گھٹ اندر ویکھ وکھائندا۔ چاروں کُنٹ دھوُاں دھارا، دھرت آکاش رنگ رنگائندا۔ سمت ستاراں لائے نعرہ، حق بحق ویکھ وکھائندا۔ کاگ ہنس اُڈائے ڈارا، کاگی کاگ کُرلائندا۔ راگی نادی ڈھاڈی کوئی نہ گائے وارا، ہرِ اپنا ویس وٹائندا۔ جن بھگتاں بخشے چرن پیارا، گُر سَتگُر درس دکھائندا۔ جوتی جوت سروُپ ہرِ، آپ اپنی جوت دھر، کلجُگ جیِو آپ اُٹھائندا۔ کلجُگ جیِو اُٹھ اُٹھ جاگ، ہرِ ساچے جوت جگائیا۔ شبد سُنائے اِک راگ، ایکا ناد وجائیا۔ پھڑ پھڑ ہنس بنائے کاگ، کاگوں ہنس وکھائیا۔ دیِپک جوتی جگے چراغ، اندھ اندھیر رہن نہ پائیا۔ اپنے ہتّھ پکڑے واگ، سمت اٹھاراں ویکھ وکھائیا۔ ترےَگُن مایا ڈسنی ڈسے ناگ، پنج تت کرے ہلکائیا۔ بہتّر ناڑی لگّے آگ، نہ کوئی سکے بُجھائیا۔ کِسے گھر نہ دِسے باتی چراغ، ساچی سیج نہ کوئی وِچھائیا۔ جوتی جوت سروُپ ہرِ، آپ اپنی جوت دھر، سمت اٹھاراں امرت جل دھار، چاروں کُنٹ وہائیا۔ ایکا نؤ نؤ اِک، ایکا کھیل کھلائندا۔ ایکا لیکھا دئے لِکھ، ایکا میٹ مِٹائندا۔ ایکا پاونہارا بِھکھ، ایکا جھولی ڈاہِندا۔ ایکا سِکھیا لئے سِکھ، ایکا مُکھ بھوائندا۔ ایکا میٹنہارا ترِکھ، ایکا اگنی تت جلائندا۔ ایکا ویکھے دیس پردیس، ایکا نر نریش سوبھا پائندا۔ ایکا سُتا باسک سیج، ایکا برہما وید سُنائندا۔ ایکا ہویا رکھی کیش، ایکا گوَردھن ہتّھ اُٹھائندا۔ ایکا نانک گوبِند دس دسمیش، کھڑگ کھنڈا اِک چمکائندا۔ ایکا االلہ رانی کرے بھیکھ، ایکا مستک میخ لگائندا۔ ایکا انتم میٹے

ریکھ، صدی چؤدھویں پندھ مُکائندا۔ کِسے نہ چلے کوئی پیش، ہرِ کا بھانا نہ کوئی مِٹائندا۔ جوتی جوت سروُپ ہرِ، آپ اپنی جوت دھر، کھیلے کھیل سمت اُنی، نہ کوئی دیِسے مُسلم سُنّی، سب دی چوٹی جائے مُنّی، جگت حدیِث نہ کوئی پڑھائندا۔ اُنی اُنیِسا کھیل جگدیِشا، جاگرت جوت کرے رُشنائیا۔ بھیوَ کُھلانا بیِس بیِسا، کلجُگ پیِسن پیِس کمائیا۔ جانے بھیوَ راگ چھتیِسا، نارد مُن سرِشٹ سبائیا۔ لیکھا چُکے قُرآن حدیِثا، وید پُران ویکھ وکھائیا۔ جوتی جوت سروُپ ہرِ، آپ اپنی جوت دھر، کلجُگ تیرا لہنا تیرے اَگے دھر، ایکا دھکاّ دیوے لائیا۔ کلجُگ اپنا چُکنا بھار، بیِس بیِسا دئے دُہائیا۔ پُرکھ ابناسی مارے مار، لوک مات رہن نہ پائیا۔ گُر گوبِند کِھچ کٹار، اپنے ہتّھ رہیا چمکائیا۔ فؤج اگمّی آپے چاڑھ، نؤں کھنڈ پرِتھمی میٹ مِٹائیا۔ نہ کوئی دیِسے جھوُٹھی دھاڑ، جوُٹھ جھوُٹھ رہن نہ پائیا۔ دھرت مات لگّے اکھاڑ، ستّ دیِپ نؤ کھنڈ لکھّ چؤراسی اپنا ڈؤروُ واہیِا۔ رائے دھرم ہوئے تیار، اٹھسٹھ اٹھائی کُنڈاں بوُہا لاہیِا۔ چِتر گُپت کڈھے لیکھ لِکھار، اپنا کھاتا دئے وکھائیا۔ لاڑی مؤت کر شِنگار، نیتر کجّل رہی پائیا۔ ہتھّیں لال مہِندی رنگ اپار، جھوُٹھا گانا رہی بندھائیا۔ ہوئی نار جگت مُٹیار، ور منگے اَگے بےپرواہیِا۔ جوبن جوانی دِہاڑے چار، تِھر رہن نہ پائیا۔ کلجُگ ویلا چار کُنٹ ہوئے خبردار، آپ اپنا راہ تکائیا۔ ساچا کنت ویکھ بھتار، کوَن کوُٹے بَیٹھا ڈیرہ لائیا۔ منمُکھ جیِو ہویا وِبھچار، ایکا نار دھرائیا۔ سمت ویہہ سؤ سولاں پندراں کتّک سگن پئے وِچ سنسار، وِچ وِچولا شبد بنائیا۔ سمت ستاراں کلجُگ جاننجی دیوے چاڑھ، سیِس دستار اِک وکھائیا۔ سمت اٹھاراں جل جل دھارا ساچے ڈولے دیوے واڑ، چار یار کہار وکھائیا۔ سمت اُنی اپنا مُکھ کلجُگ لاڑی دئے وکھائی، مُکھ چُنّی گھُنگھٹ لاہیِا۔ نہ کوئی دیِسے میِت مُرار، ساچا سنگ نہ کوئی وکھائیا۔ بِن ہرِ نامے بُھلا سرب سنسار، بِن ہرِ نام نہ کوئی پار کرائیا۔ مُسلم ہِندوُ سِکھ عیِسائی کوئی نہ بنے یار، جو جن بَیٹھے مُکھ چُھپائیا۔ جِس جن رسنا جِہوا گایا گُن کرتار، کھتری براہمن شوُدر وَیش دئے ترائیا۔ سمت بیِس کرے پیار، آپ اپنا میل مِلائیا۔ ساچی سکھی کر تیار، ساچی سِکھیا اِک سمجھائیا۔ خالص خالصہ وِچ سنسار، نؤ کھنڈ پرِتھمی ویکھ وکھائیا۔ بنے ثالث آپ نِرنکار، ساچی سیوا سیو کمائیا۔ جوتی جوت سروُپ ہرِ، آپ اپنی جوت دھر، کلجُگ تیری انتم ور، کوُڑی میٹے جگت شاہیِیا۔ کلجُگ مِٹے جھوُٹھی شاہی، سَتجُگ ساچا مات لگاونا۔ جگت وِدھان کوئی رہے ناہیں، شاہ سُلطان نہ کِسے اکھواونا۔ جوتی جوت سروُپ ہرِ، آپ

اپنی جوت دھر، آپ اپنا ڈنک وجاونا، سمت ویہہ سؤ اِکّی ہو پردھان، ہرِ ساچا کھیل کھلائیا۔ پنچم مُکھ سیِس تاج مہان، پنچاں سِکھاں راج جوگ سِکھائیا۔ ستّ رنگ جھُلے نِشان، ستّاں دیِپاں آپ وکھائیا۔ شبد ڈنکا ہتّھ بھگوان، اپنے لئے اُٹھائیا۔ نؤ کھنڈ دیوے اِک گیان، ایکا کرے پڑھائیا۔ پُرکھ اکال چرن دھیان، انتر آتم اِک لِو لائیا۔ چار ورن اِکو گان، ایکا اِشٹ وکھائیا۔ جوتی جوت سروُپ ہرِ، آپ اپنی جوت دھر، کلجُگ تیری انتم ور، کھیلے کھیل بےپرواہیِا۔ کلجُگ سَتجُگ ساچا کھیل، ہرِ ساچا آپ کُھلائندا۔ منُمکھاں گھّلے دھرم رائے دی جیل، گُرمُکھاں گود اُٹھائندا۔ جوت نِرنجن چاڑھے تیل، آد نِرنجن حُکم سُنائندا۔ کھیلے کھیل سجّن سُہیل، رنگ نویل ڈیرہ لائندا۔ آپے گُر گُروُ گُر چیل، گُر چیلا آپ اکھوائندا۔ جوتی جوت سروُپ ہرِ، آپ اپنی جوت دھر، گُرمُکھاں نیتر پائے نام انجن، پاربرہم درد دُکھ بھےَ بھنجن، بھوَ ساگر آپ ترائندا۔ بھوَ ساگر ڈوُنگھی گاگر، کایا گڑھ ویکھ وکھائندا۔ نِرمل کرم کرے اُجاگر، اُپر چڑھ جوت جگائندا۔ کرے نام ونج سؤداگر، سیِس دھڑ نہ کوئی رکھائندا۔ ایکا نام رتی رتناگر، رتن امولک ہیرا لال جواہر مانک موتی، گُرسِکھ بنائندا۔ جوتی جوت سروُپ ہرِ، آپ اپنی جوت دھر، ہرِجن ساچے میل مِلائندا۔ ہرِ سجّن گُر پایا، گہر گمبھیِر گوبِند۔ ہؤمے رنگ مٹایا، مِٹی سگلی چِند۔ گھر مندر اِک سُہایا، اُپجی ساچی بِند۔ پُرکھ ابناسی درشن پایا، وڈ داتا گُنی گہِند۔ مانَس جنم لیکھے لایا، امرت پیِیا ساگر سِندھ۔ جوتی جوت سروُپ ہرِ، آپ اپنی جوت دھر، میٹنہارا سگلی چِند۔ گُرمُکھ ساچا میِتڑا، آد جُگاد رکھائے۔ گُر سُنائے ساچا گیِتڑا، آپ اپنا راگ الائے۔ وکھائے دھام اِک انڈیٹِھڑا، سچکھنڈ واسی بےپرواہے۔ مِٹھا کرے کؤڑا ریِٹھڑا، جو جن رہے سرنائے۔ آپے پاکی پاک پتت پاپی کرے پُنیِتڑا، پتت پاوَن آپ کرتار۔ آد جُگادی ٹھنڈا سیِتڑا، جن بھگتاں کرے پیار۔ جُگ جُگ چلائے اپنی ریِتڑا، کوئی ٹھگؤری نہ کرے سنسار۔ جوتی جوت سروُپ ہرِ، آپ اپنی جوت دھر، ہرِ سنگت بھرے بھنڈار۔ گُر سنگت گُر وسیا، گُرداتا مِہربان۔ ہرِ سنگت اندر بہہ بہہ ہسّیا، شبد وکھائے سچ نِشان۔ تیِر نِرالا نام کسیا، مارے اِک نِگاہبان۔ میٹے ریَن اندھیری مسّیا، کرے پرکاس کوٹن بھان۔ جن بھگتاں دوارے پِھرے نسّیا، آد جُگادی ہرِ مِہربان۔ جوتی جوت سروُپ ہرِ، آپ اپنی جوت دھر، کھیلے کھیل سِری بھگوان۔ ہرِ سنگت کایا سنگت سچ منارا، گُر سَتگُر آپ سُہائندا۔ گُرمُکھاں کرے پار کنارہ، جو جن چرن دھیائندا۔ درگاہ ساچی دئے سہارا، رائے دھرم نیڑ نہ

آئیندا۔ لکھّ چؤراسی پار کنارہ، مات گربھ بندھن کٹ وکھائندا۔ اُلٹا رُکھ نہ لئے ہُلارا، دس دس ماس میٹ مِٹائندا۔ شبدی شبد ونج ونجارا، ساچے ہٹّ وِکائندا۔ امرت دیوے ٹھنڈی ٹھارا، بھر پیالہ جام ساقی آپ پیائندا۔ گُرمُکھاں کرے سد پیارا، آپ آپا وار وکھائندا۔ کلجُگ بُھلیا جیِو گوارا، ہرن پھرن نیتر نہ کوئی کُھلائندا۔ جوتی جوت سروُپ ہرِ، آپ اپنی جوت دھر، ہرِ سنگت اندر جائے وڑ، دِس کِسے نہ آئیندا۔ گُرمُکھ اندر آپے وڑیا، اپنی دَیا کمائیا۔ اپنے پؤڑے آپے چڑھیا، اپنا ڈنڈا ہتّھ اُٹھائیا۔ نہ کوئی سیِس نہ کوئی دھڑیا، سَتگُر پوُرا بےپرواہیِا۔ گُرسِکھاں در دوارے کھڑیا، جو جن بَیٹھے راہ تکائیا۔ پنچ وِکارے آپے سڑیا، جِؤں جوگا جوگ کمائیا۔ جوتی جوت سروُپ ہرِ، آپ اپنی جوت دھر، کلجُگ تیری انتم ور، توڑنہار ہنکاری گڑھیا، گڑھ ہنکارا میٹ مِٹائیا۔ گڑھ ہنکاری جائے تُٹ، قِلعہ کوٹ رہن نہ پائیا۔ ہرِ کا شبد تیِر نِرالا رہیا چُھٹ، دو جہاناں ڈیرہ رہیا ڈھاہیِا۔ نؤ سَت پنج تت بنے اتُٹ، من مت نہ کوئی چتُرائیا۔ ورناں برناں پائے پُھٹ، نہ کوئی جوڑ جُڑائیا۔ کلجُگ مدھ پیالہ پیِتا گھُٹ، چاروں کُنٹ کھیہہ اُڈائیا۔ کلجُگ بھاگ گیا نِکُھٹ، منُمکھ جیِواں نال رلائیا۔ کچے تندن ڈور جائے تُٹ، گُڈی آکاش نہ کوئی چڑھائیا۔ گُرمُکھ وِرلا پیِوے امرت گھُٹ، جِس جن سَتگُر پوُرا آپ پیائیا۔ آون جاون جائے چُھٹ، گیڑا گیڑ نہ کوئی بُھوائیا۔ بھؤندے پِھردے کوٹی کوٹ تیِرتھ تٹاں جنگل جوُہ اُجاڑ پہاڑاں دِس کِسے نہ آئیا۔ جوتی جوت سروُپ ہرِ، آپ اپنی جوت دھر، ہرِجن میلے اپنے در، در دروازہ غریِب نوازا ایکا ایک کُھلائیا۔ در دروازہ غریِب نوازا کھول، اپنی دَیا کمائندا۔ شبد انادی آپے بول، بودھ اگادھ جنائندا۔ لکھّ چؤراسی نام کنڈے رہیا تول، سَتگُر نانک تیراں تیراں دھار چلائندا۔ پُرکھ ابناسی بَیٹھا رہے اڈول، سرِشٹ سبائی آپ ڈُلائندا۔ ترےَگُن تیرا پیا گھول، پنج تت ڈھول وجائندا۔ سچ وست نہ کِسے کول، سچ ونج نہ کوئی کرائندا۔ کرنی کرتا کوُڑ کُڑیارا چاروں کُنٹ کڈھے پول، بھیوَ ابھید بھیوَ کُھلائندا۔ جوتی جوت سروُپ ہرِ، آپ اپنی جوت دھر، کلجُگ تیری انتم ور، نِہکلنک نرائن نر، کلجُگ مِٹائے سَتجُگ لگائے، گُرمُکھ ترائے منمُکھ ڈُبائے، گھر ساچے سچ وست ٹِکائے، ساچا گھر ہری ہرِ، گُرمُکھ کایا گڑ وکھائیا۔ گُرمُکھ کایا مندر، گھر گھر وِچ آپ سُہایا۔ آپے توڑے لگا جندر، نام ہتھؤڑا ایکا لایا۔ من منوُآ دہ دِش نہ بھوے بندر، جِس جن شبدی ڈوری بندھن پایا۔ جوتی جوت سروُپ ہرِ، آپ اپنی جوت دھر، نِرگُن دیوا نِرگُن باتی، نِرگُن داتا

کملاپاتی، نِرگُن میٹے اندھیری راتی، نِرگُن دیوے ساچی داتی، نِرگُن رکھی اُتم ذاتی، نِرگُن بخشے امرت بوُند سوَانتی، گُرمُکھ ساچے بال، اپنی گود لئے اُٹھائیا۔

۶ اَسوُ ۲۰۱۶ بِکرمی سُرجن سِنگھ دے گھر پِنڈ پکھووال ضِلع لُدھیانہ

ہرِ چاکر پاخاک، خاکی خاک سمائیا۔ پتت پاپی کرے پاکی پاک، پتت پُنیِت وڈّی وڈیائیا۔ بِپر سُداما بنیا سجّن ساک، غریِب نِمانے سنگ رلائیا۔ چرن دھوُڑی مستک ٹِکاّ لائے راکھ، پِچھلی ریکھا دئے مِٹائیا۔ اندر مندر آپے جھاک، دُئی دوَیتی میٹ مِٹائیا۔ سجّن سُہیلا بنیا ساک، میِت مُرارا بےپرواہیِا۔ جِس جن کُھلائے اپنی جاگ، سو جن درشن پائیا۔ دھنّ جنیندی مائی وڈ وڈ بھاگ، پِتا پوُت ودھائیا۔ جگت ترِسنا بُجھے آگ، اگنی تت مِٹائیا۔ چرن پریِتی سچ وَیراگ، بِرہوں وِچھوڑا اِک وکھائیا۔ مایا ممتا نہ ڈسے ڈسنی ناگ، آسا ترِسنا میٹ مِٹائیا۔ پھڑ پھڑ ہنس بنایا کاگ، سَتگُر پوُرا وڈ وڈیائیا۔ نام سُہنجنا بنّھے تاگ، تندوَ تند اِک وکھائیا۔ رسنا جِہوا ہرِجن رہے ارادھ، رس بِھنا اِک وکھائیا۔ لیکھا چُکے سنت سادھ، میِت مُرارا ایکا میل مِلائیا۔ سُنے سُنائے سرب فریاد، پنچاں پنچ ویکھ وکھائیا۔ دیونہارا ساچی داد، اکھّر وکھّر جھولی پائیا۔ پرم پُرکھ پربھ مادھوَ مادھ، موہنی روُپ وٹائیا۔ کھیل کِھلنتا آد جُگاد، جُگ جُگ ویس وٹائیا۔ کلجُگ ساگر ڈوُنگھی بھور ہرِجن ساچے لئے لادھ، ترنی ترن اِک اکھوائیا۔ آپے لڈائے اپنے لاڈ، دِس کِسے نہ آئیا۔ جوتی جوت سروُپ ہرِ، آپ اپنی جوت دھر، آپے کِل وِکھ پاپ مِٹائیا۔ پاپ روگ سنتاپ، دُکھ درد نِواریا۔ ایکا بخشے ساچا جاپ، بھرے نام شبد بھنڈاریا۔ ہرِجن بُجھے آپے آپ، ہؤمے ہنگتا روگ نِواریا۔ میل مِلاواں کملاپات، کملی رملی گلے لگا لیا۔ آد جُگادی پُچھے وات، واہ واہ سَتگُر ناؤں دھرا لیا۔ مِٹے ریَن اندھیری رات، جِس جن اپنا درس دِکھا رہیا۔ لہنا دینا چُکیا تیِرتھ تاٹ، گھٹ انتر سر سروور آپ نُہا لیا۔ جوتی جوت سروُپ ہرِ، آپ اپنی جوت دھر، آلنیوں ڈِگے بوٹ، آپ اُٹھا لیا۔ آپ اُٹھائے دَیا کمائے، دَیا نِدھ دَیاوانیا۔ کر کِرپا جن میل مِلائے، دُھردرگاہی سِری بھگوانیا۔ داسی داس ہو سیو کمائے، رنگے رنگ دو جہانیا۔ واس نِواسی آپ اکھوائے، گُنونتا گُن نِدھانیا۔ گھنک پُر واسی

ویکھ وکھائے، سچ مندر بَیٹھ بِبانیا۔ جوت پرکاس بھیوَ نہ آئے، نہ دیِسے جیِو جہانیا۔ شاہو شاباشی ویکھ وکھائے، جوتی جوت سروُپ ہرِ، آپ اپنی جوت دھر، بخشنہارا چرن دھیانیا۔ چرن دھیان دھوُڑ اِشنان، چِنتا روگ سوگ مِٹ جائیا۔ دیوے مان توڑے ابِھمان، کِرپا نِدھان کرم کمائیا۔ سچ بٹھائے اِک بِبان، ہرِ مِہربان کال پھاس کٹ وکھائیا۔ مہاکال در رہے واس، ہرِ حُکمی حُکم پِھرائیا۔ جوتی جوت سروُپ ہرِ، آپ اپنی جوت دھر، نِہکلنک نرائن نر، گُرمُکھ گُرسِکھ گُر گُر روُپ سمائیا۔

۶ اَسوُ ۲۰۱۶ بِکرمی بِشن داس دے گھر ڈّھکی چکّیاں جالندھر شہر

اک ایکنکار پُرکھ سمرتھ، آد جُگاد سمائیا۔ جن بھگتاں رام نام دیوے ساچی وتھ، آتم انتر بوُجھ بُجھائیا۔ نام چڑھائے ساچے رتھ، جُگ جُگ وڈّی وڈیائیا۔ ابناسی کرتا مہما اکتھ، بھیوَ ابھیدا بھیوَ نہ رائیا۔ جوتی جوت سروُپ ہرِ، آپ اپنی جوت دھر، آد نِرنجن وڈ وڈیائیا۔ آد نِرنجن پُرکھ سُلطان، پاربرہم اکھوائندا۔ جوتی نوُر دیِپ مہان، نِرگُن اپنا آپ جگائندا۔ وسنہارا سچکھنڈ سچ مکان، سچ دوارے سوبھا پائندا۔ جن بھگتاں دیوے آتم برہم گیان، نام نِدھانا جھولی پائندا۔ سُرتی سُرت کر پروان، شبد شبدی میل مِلائندا۔ دِوس ریَن نِگاہبان، آپ اپنا سنگ رکھائندا۔ جوتی جوت سروُپ ہرِ، آپ اپنی جوت دھر، بھگتن میِتا اِک اتیِتا، نِرگُن روُپ سَت سروُپ، آپ اپنے رنگ رنگائندا۔ رنگ رنگیِلا نر نِرنکار، عقل کلا اکھوائیا۔ جُگا جُگنتر لےَ اوتار، لوک مات ویس وٹائیا۔ سَتجُگ تریتا دواپر پاوے سار، کلجُگ کھیل بےپرواہیِا۔ رام نام کر اُجیار، کاہنا بنسری نام وجائیا۔ مُکند منوہر لکھمی نرائن جوت نِرنکار، انبھوَ پرکاس سمائیا۔ سنت سُہیلے لئے اُبھار، آپ اپنی دَیا کمائیا۔ دِیا باتی کملاپاتی کر اُجیار، کایا مندر ڈوُنگھی کَندر جوت نِرنجن آپ جگائیا۔ دُھن انادِ سچّی دُھنکار، انحد تال تلواڑا آپ سُنائیا۔ پاوے سار سُکھمن ناڑ، ٹیڈھی بنک ویکھ وکھائیا۔ بجر کپاٹی دیوے پاڑ، نام نِشانہ تیِر چلائیا۔ میٹ مِٹائے پنچم دھاڑ، کام کرودھ لوبھ موہ ہنکار نیڑ نہ آئیا۔ آسا ترِسنا دیوے مار، ہؤمے ہنگتا روگ رہن نہ پائیا۔ ایکا بخشے چرن پیار، سچ دوارا اِک وکھائیا۔ نِرگُن سرگُن میلا ناری کنت بھتار، آتم ساچی سُہنجنی سیج آپ ہنڈھائیا۔ اپنے رنگ روے کرتار، رنگ رنگیِلا موہن مادھوَ رس

بِھنا بھیوَ نہ آئیا۔ دسم دواری کھیل اپار، نوُر نوُرانہ ڈگمگائیا۔ امرت آتم ٹھنڈی ٹھار، بھر پیالہ ہرِجن ساچے جام پیائیا۔ کاگوں ہنس ہنس اُڈار، بنس بنسا میل مِلائیا۔ جوتی جوت سروُپ ہرِ، آپ اپنی جوت دھر، بھگتن میلا ساچے گھر، در ساچا اِک سُہائیا۔ بھگتن میِتا ہرِ بھگوَنت، اِک اِکلّا کھیل کھلائندا۔ پکڑ اُٹھائے ساچے سنت، ساچا مندر ویکھ وکھائندا۔ آپ بنائے جُگ جُگ بنت، جُگ کرتا ناؤں دھرائندا۔ آپے ناری آپے کنت، سُرتی شبدی ویکھ وکھائندا۔ آپے رسنا جِہوا منیِا منت، آپے ہرِ ہرِ گُن الائندا۔ آپے آد آپے انت، مدھ ڈیرہ آپے لائندا۔ جوتی جوت سروُپ ہرِ، آپ اپنی جوت دھر، بھگتن میلا ساچے گھر، گھر ساچا اِک سُہائندا۔ بھگتن کھولے بند کِواڑ، ہرِ ساچے وڈ وڈیائیا۔ ایکا دیوے نام ادھار، سوَچّھ سروُپی روُپ وٹائیا۔ دِیا باتی کر اُجیار، گھر مندر آپ ٹِکائیا۔ ویکھے وِگسے کرے وِچار، دِوس ریَن سیو کمائیا۔ دو جہاناں پاوے سار، ناتھ تریَلوکی وڈ وڈیائیا۔ چؤداں ہٹّاں ویکھے کھول کِواڑ، چؤداں لوک آپ بھوائیا۔ دھرم رکھائے سچ اکھاڑ، لوک مات وجےّ ودھائیا۔ جن بھگتاں کرے پرکاس بہتّر ناڑ، اندھ اندھیر رہن نہ پائیا۔ جوتی جوت سروُپ ہرِ، آپ اپنی جوت دھر، نِرگُن داتا بےپرواہیِا۔ ہرِجن بنے جگت ملاح، ساچے بیڑے آپ چڑھائندا۔ ساچا بیڑا پُرکھ ابناس، اپنے ہتّھ رکھائندا۔ ہرِجن مندر پاوے راس، گوپی کاہن آپ نچائندا۔ پرم پُرکھ پربھ شاہو شاباش، شاہ سُلطان ناؤں دھرائندا۔ آد جُگاد نہ جائے وِناس، جُگ جُگ اپنا کھیل کھلائندا۔ جن بھگتاں ہوئے داسی داس، سیوک سیوا آپ کمائندا۔ کرے کرائے بند خلاص، لکھّ چؤراسی پھند کٹائندا۔ لہنا دینا چُکائے دس دس ماس، مات گربھ پھیر نہ آئیندا۔ پاوے سار پرِتھمی آکاش، کھنڈ منڈل برہمنڈ جیرج انڈ ویکھ وکھائندا۔ لیکھے لائے سواس سواس، جو جن ہرِ ہرِ رسنا گائندا۔ سَتگُر پوُرا وسے پاس، وِچھڑ کدے نہ جائندا۔ جوتی جوت سروُپ ہرِ، آپ اپنی جوت دھر، ہرِجن وکھائے اپنا گھر، گھر سُہنجنا آپ سُہائندا۔ گھر سُہنجنا سوبھاوَنت، ہرِ ہرِ میل مِلنیا۔ ہرِجن میلا ناری کنت، آتم سیجا اِک سُہنیا۔ کھیل کھلائے سِری بھگوَنت، جُگ جُگ اپنا ویس وٹنیا۔ جوتی جوت سروُپ ہرِ، آپ اپنی جوت دھر، درس دکھائے سِری بھگوانیا۔ سِری بھگوان نِرگُن روُپ، سَت سروُپ سمایا۔ وسنہارا چارے کوُٹ، دہ دِشا ویکھ وکھایا۔ جن بھگتاں ناتا توڑے جوُٹھ جھوُٹھ، ساچا مارگ ایکا لایا۔ اپنی کِرپا آپے جانا تُٹھ، سِر اپنا ہتّھ ٹِکایا۔ امرت جام پیائے گھُٹ، نِجھر جھِرنا آپ جھِرایا۔ آون جاون جائے چُھٹ، جِس

جن ہرِ ہرِ درشن پایا۔ بُھلے پِھردے کوٹی کوٹ، کوٹ کوٹی ہتّھ نہ آیا۔ گُرمُکھ وِرلے تن نگارے لائے چوٹ، اپنا ڈنکا آپ وجایا۔ ہرِجن وِرلا ہرِ ہرِ رکھے ایکا اوٹ، دوُجا در نہ منگن جایا۔ سَتگُر پوُرا ہؤمے ہنگتا کایا کڈھے کھوٹ، کوُڑی کِریا میٹ مِٹایا۔ جوتی جوت سروُپ ہرِ، آپ اپنی جوت دھر، نام بھنڈارا اِک ورتایا۔ نام بھنڈارا سچ وست، ہرِ سَتگُر ہتّھ رکھائیا۔ دیونہارا دست بدست، جن بھگتاں جھولی پائیا۔ نام خُماری دِوس ریَن رکھے مست، مدھ پیالہ نہ کوئی رکھائیا۔ ایکا رنگ رنگائے کیِٹ ہست، اوُچ نیِچ نہ کوئی جنائیا۔ جوتی جوت سروُپ ہرِ، آپ اپنی جوت دھر، دیونہارا ساچا ور، ساچی رنگن نام رنگائیا۔ رام نام رنگ انڈیٹِھا، دِس کِسے نہ آیا۔ گُرمُکھ وِرلا جانے رس میِٹھا، جِس جن آپ چکھایا۔ مِٹھا کرے کؤڑا ریِٹھا، پھل میوہ امرت آپ بنایا۔ جِس جن وسیا ہرِ ہرِ چیتا، چِتوِت ٹھگؤری کوئی نہ پایا۔ جُگا جُگنتر آپ چلائے اپنی ریِتا، دھار اولّی آپ رکھایا۔ آپے رام آپے سیِتا، کاہنا کرِشنا ناؤں دھرایا۔ آپے پتت آپ پُنیِتا، پتت پاوَن وڈ وڈیایا۔ آپے نانک گوبِند رہے اتیِتا، نِرگُن اپنا کھیل کِھلایا۔ گُرمُکھاں کایا کرے ٹھانڈی سیِتا، اگنی تت نہ کوئی جلایا۔ جوتی جوت سروُپ ہرِ، آپ اپنی جوت دھر، جِس جن اپنے گلے لگایا۔ بھگت وچھل ہرِ گِردھار، بھگت بھگتی لیکھے لائیا۔ کایا مندر کھول کِواڑ، ڈوُنگھی کَندر پھول پُھلائیا۔ ترےَگُن ترِسنا دیوے ساڑ، پنچم پنچم موہ چُکائیا۔ دھرم وکھائے اِک اکھاڑ، ساچا منگل راگ الائیا۔ ساچے مندر کر پیار، ساڈھے تِنّ ہتّھ ویکھ وکھائیا۔ اُچ محل اٹل چڑھ مینار، گھر گھر وِچ ویکھ وکھائیا۔ گھر میِتا ہرِ میِت مُرار، گھر سجّن بےپرواہیِا۔ دِس نہ آئے وِچ سنسار، بھرمے بُھلی سرب لوکائیا۔ گُرمُکھ ہرِجن ہرِ بھگت لوک مات وِرلا اُترے پار، جِس جن اپنی بوُجھ بُجھائیا۔ درس دکھائے گُپت ظاہر، اندر باہر ویس وٹائیا۔ نہ کوئی پُرکھ نہ کوئی نار، نِرگُن جوت ہرِ رگھُرائیا۔ جن بھگتاں بھرے سچ بھنڈار، سچ ونجارا ایکا ونج کرائیا۔ تولا تولے تولنہار، ایکا کنڈا ہتّھ اُٹھائیا۔ لکھّ چؤراسی دئے ہُلار، اُتبُھج سیتج جیرج انڈ ویکھ وکھائیا۔ برہما وِشن شِو لائے سیوادار، سیوک ساچی سیو کمائیا۔ آپے سانگو پانگ سُتا پَیر پسار، آپ اپنا آسن لائیا۔ آپے لال بھوُشن کر شِنگار، چرن کوَل ویکھ وکھائیا۔ آپے کھڑگ کھنڈا تیز کٹار، اشٹبُھج روُپ وٹائیا۔ آپے سِنگھ شیر ہویا خبردار، سچ بھوانی روُپ وٹائیا۔ آپے دوُتاں دُشٹاں کرے سنگھار، لوک مات ویکھ وکھائیا۔ آپے راما راون توڑے گڑھ ہنکار، غریِب نِمانے گلے لگائیا۔ آپے بِپر سُداما دیوے تار،

جُگ جُگ وڈّی وڈیائیا۔ کلجُگ کھیل اگمّ اپار، الکھ اگوچر بھیوَ نہ پائیا۔ جُگ جُگ وِچھڑے میلے یار، سَتجُگ تریتا دواپر ویکھ وکھائیا۔ کلجُگ بخشے چرن پیار، ساچا ناتا جوڑ جُڑائیا۔ نہ کوئی ڈوبے وِچ منجھدھار، بھوَ ساگر پار کرائیا۔ تربَینی نیَنی پاوے سار، گنگا گوداوری سُرستی جمنا پھیرا پائیا۔ چارے ویداں خبردار، پُران اٹھاراں ویکھ وکھائیا۔ گیِتا گیان اِک ادھار، ایکا سِکھیا سِکھ سمجھائیا۔ کلجُگ انتم سچ جَیکار، ایکا نعرہ لائیا۔ سو پُرکھ نِرنجن میِت مُرار، پاربرہم کرے کُڑمائیا۔ پاربرہم برہم ساچا یار، پوُت سپوُتا ناؤں دھرائیا۔ جوتی جوت سروُپ ہرِ، آپ اپنی جوت دھر، بھگتن میلا در، در دروازہ آپ کُھلائیا۔ بھگتن رنگ رتّڑا، رام نام انمول۔ نہ ٹھنڈا نہ تتڑا، آد جُگادی وسے کول۔ آپے دے سمجھاوے متڑا، شبد اگمّی وجائے ڈھول۔ جوتی جوت سروُپ ہرِ، آپ اپنی جوت دھر، دیونہارا ساچا ور، بِشن داس نِج گھر واس، آتم پرکاس روَ سس رسن سواس، لیکھا لیکھے لئے لگائیا۔