کتب خانہGranth 11 (Shahmukhi)

۱۰ چیت ۲۰۱۹ بِکرمی دارا سِنگھ دے گرِہ نؤرنگاباد ضِلع امرتسر

حُکمے اندر گُن بھرپوُر، گُنونتا کھیل کرائیندا۔ حُکمے اندر نِرگُن نوُر، نوُر نوُرانہ ڈگمگائیندا۔ حُکمے اندر لیکھا جانے نیڑے دوُر، دو جہاناں پھیرا پائیندا۔ حُکمے اندر پرگٹ ہوئے ظاہر ظہوُر، ظاہرا اپنا روُپ وٹائیندا۔ جوتی جوت سروُپ ہرِ، آپ اپنی کِرپا کر، ساچا حُکم آپ ورتائیندا۔ ساچا حُکم ہرِ ہرِ ناؤں، سو پُرکھ نِرنجن آپ ورتائیا۔ لیکھا جانے اگمّ اتھاہو، بےپرواہ وڈی وڈیائیا۔ سچ سندیسہ پِتا ماؤں، پوُت سپوُتا آپ سمجھائیا۔ بھگت بھگوَنت جُگ جُگ اُٹھائے پھڑ پھڑ باہوں، آتم گیان دھیان لگائیا۔ سرن سرنائی دیوے سچّا تھاؤں، تھان تھننتر اِک وکھائیا۔ پھڑ پھڑ ہنس بنائے کاؤں، سوہنگ ہنسا چوگ چُگائیا۔ جوتی جوت سروُپ ہرِ، آپ اپنی کِرپا کر، ساچا حُکم اپنا نام سمجھائیا۔ ساچا نام ہرِ نِرنکار، جُگ جُگ آپ جنائیندا۔ نِرگُن سرگُن پاوے سار، ویس انیک وٹائیندا۔ سیوک سیوا گُر اوتار، لوک مات بوُجھ بُجھائیندا۔ پنج تت کایا ہو اُجیار، آتم پرماتم جوڑ جُڑائیندا۔ نِرمل دیِا کر اُجیار، کایا مندر آپ جگائیندا۔ بند تاکی کھول کِواڑ، بجر کپاٹی کُنڈا لاہِندا۔ انحد شبد سچّی دُھنکار، گرِہ مندر آپ سُہائیندا۔ امرت آتم ٹھنڈا ٹھار، سر سروور اِک نُہائیندا۔ سوَچّھ سروُپی درس اپار، آتم سیجا آپ وکھائیندا۔ کاغد قلم نہ لِکھنہار، لِکھ لِکھ لیکھ نہ کوئے مُکائیندا۔ حُکمے اندر سرب سنسار، لکھّ چؤراسی بندھن پائیندا۔ حُکمے اندر وید چار، برہما ویتا مُکھ صالاحِندا۔ حُکمے اندر شاستر سِمرت دئے ادھار، گیِتا گیان گیان دِرڑائیندا۔ حُکمے اندر اِنجیِل قُرآن، کایا کُرہ ویکھ وکھائیندا۔ حُکمے اندر گُر گُر بانی بول جَیکار، جےَ جَیکار نعرہ لائیندا۔ حُکمے اندر دو جہان ویکھے اکھاڑ، لوآں پُریاں ناچ نچائیندا۔ حُکمے اندر ترےَگُن مایا اگنی ہاڑ، تتَو تت تت جلائیندا۔ حُکمے اندر سَتگُر گُر کرے پیار، گُر شبدی بوُجھ بُجھائیندا۔

حُکمے مندر بھگت بھگوَنت لئے اُبھار، دیِنن اپنی دَیا کمائیندا۔ حُکمے اندر ساچے سنتاں سُرتی شبدی شبدی سُرت لئے اُٹھال، آلس نِندرا آپے لاہِندا۔ گُرمُکھاں چلے نال نال، جُگ جُگ وِچھڑ کدے نہ جائیندا۔ گُرسِکھاں مارگ دسےّ سُکھال، ساچی ریِتی آپ چلائیندا۔ حُکمے اندر کال مہاکال، جُگ چؤکڑی سیو کمائیندا۔ حُکمے اندر چِتر گُپت اپنا لیکھا رہیا وکھال، لِکھ لِکھ لیکھ سرب جنائیندا۔ حُکمے اندر رائے دھرم اٹھ دس وکھائے جگت دھرمسال، اٹھاراں دس میل مِلائیندا۔ لیکھا جانے شاہ کنگال، ابُھل بُھل کدے نہ جائیندا۔ جوتی جوت سروُپ ہرِ، آپ اپنی کِرپا کر، گیڑا گیڑے وِچ وکھائیندا۔ جُگ جُگ گیڑا ہرِ نِرنکار، جُگ کرتا آپ رکھائیا۔ نؤ نؤ چار اُترے پار، لوک مات رہن نہ پائیا۔ وِشن برہما شِو رووے زارو زار، نیتر نَیناں نیِر وہائیا۔ گُر اوتار پیِر پَیغمبر گئے ہار، ہرِ کا اَنت کوئے نہ پائیا۔ بےاَنت بےاَنت بےاَنت کہہ کہہ گئے پُکار، دوئے جوڑ سیِس جھُکائیا۔ جُگ جُگ سِکھیا دے وِچ سنسار، ساچی سِکھیا اِک وکھائیا۔ کاغد قلم نال پیار، لِکھ لِکھ شاہی لیکھ بنائیا۔ نِرگُن سرگُن کر پسار، اکھّر اکھّر جوڑ جُڑائیا۔ رسنا جِہوا دے ادھار، بانی بانی روُپ وٹائیا۔ صِفت صالاحی صِفت کرائے اگمّ اپار، سیوک ساچی سیو لگائیا۔ پہلوں دیوے درس دیِدار، دوُجے اپنا راہ چلائیا۔ تیِجے دیوے نَین اُگھاڑ، چؤتھے چؤتھے پد وڈیائیا۔ پنچم ناد شبد دُھنکار، چھیویں چھپر چھنّ چُھہائیا۔ ستّویں سَت سَتوادی کر پیار، سَت پُرکھ نِرنجن میل مِلائیا۔ نظری آئے اِک اکال اجوُنی رہِت بے مثال، جوتی جاتا ڈگمگائیا۔ جُگ چؤکڑی حل کرے آپ سوال، دوُسر سنگ نہ کوئے رکھائیا۔ بھگت بھگوَنت آپے بھال، لکھّ چؤراسی وِچوں لئے اُٹھائیا۔ دیِپک سنگ دیِپک بال، بِن تیل باتی کرے رُشنائیا۔ لیکھا چُکے شاہ کنگال، جِس اپنی بوُجھ بُجھائیا۔ کایا مندر اندر وکھائے سچّی دھرمسال، گھر سَتگُر وسے سچّا ماہیِا۔ جوتی جوت سروُپ ہرِ، آپ اپنی کِرپا کر، جِس جن اپنی دَیا کمائیا۔ دَیا کما وجائے ڈنکا، ایکا نامہ نام جنائیندا۔ دُئی دوَیتی میٹے شنکا، شرع شریِعت نہ کوئے وکھائیندا۔ آپے پھیرے من کا منکا، من واسنا نہ کوئے رکھائیندا۔ لیکھا جانے جیِو جن کا، گھٹ ایکا روُپ دھرائیندا۔ جوتی جوت سروُپ ہرِ، آپ اپنی کِرپا کر، ساچے بھگتاں آپ اُٹھائیندا۔ ساچے بھگتاں دیوے مان، نِمانیاں گلے لگائیا۔ پوُرب لہنا کرم پچھان، نیتر نَیناں دئے درسائیا۔ ہرِ کا لیکھا گا نہ سکے زبان، بےزباں کرے شنوائیا۔ جوتی جوت سروُپ ہرِ، آپ اپنی کِرپا کر، ہرِجن ساچے ہوئے سہائیا۔ ہرِجن سہائک ہووے آپ، سِر اپنا ہتّھ ٹِکائیندا۔ من

واسنا میٹے پاپ، اپرادھی گلے لگائیندا۔ رسنا جِہوا جپائے جاپ، بتّی دند نہ کوئے ہِلائیندا۔ اندر وڑ وڑ کرے پاٹھ، ساچے مندر سوبھا پائیندا۔ گھر سروور مارے ٹھاٹھ، اٹھسٹھ تیِرتھ مُکھ شرمائیندا۔ جوتی جوت سروُپ ہرِ، آپ اپنی کِرپا کر، ساچا کھیل آپ کرائیندا۔ ساچا کھیل کرے کرتار، اپنی دَیا کمائیا۔ من واسنا کرے خوار، مت متوالی رہن نہ پائیا۔ بُدھ بِبیکی ایکا وار، ہرِ جوُ ہرِ ہرِ آپ کرائیا۔ ترےَگُن مایا سیک نہ لائے وِچ سنسار، اگنی تت نہ کوئے جنائیا۔ نام امولک وست دئے بھنڈار، سَتگُر پوُرا آپ ورتائیا۔ گُرسِکھ منگن نہ جائے کِسے دوار، جِس سَتگُر پوُرا مِلیا سچّا ماہیِا۔ ایتھے اوتھے دو جہاناں پَیج دئے سوار، سمرتھ پُرکھ وڈ وڈیائیا۔ جوتی جوت سروُپ ہرِ، آپ اپنی کِرپا کر، ساچے سنتاں آپ مِلائیا۔ ساچے سنتاں میلا جگ، جیِون جُگت آپ جنائیندا۔ ہنس بنائے پھڑ پھڑ کگّ، کاگوں ہنس اُڈائیندا۔ درس دِکھائے اُپر شاہ رگ، نؤ دوارے پندھ مُکائیندا۔ آتم سیجا بہے سج، سچ سِنگھاسن سوبھا پائیندا۔ کام کرودھ لوبھ موہ ہنکار جائے بھجّ، نام کھنڈا اِک وکھائیندا۔ جگت ترِسنا من واسنا جائے بھجّ، ابِھمان نہ کوئے ودھائیندا۔ سَتگُر پوُرا حاضر حضوُرا گُرسِکھ پڑدہ دیوے کج، سِر اپنا ہتّھ ٹِکائیندا۔ گھر مندر سچ نگارہ جاوے وجّ، انحد نادی ناد سُنائیندا۔ امرت پیائے پیالہ رجّ، نِجھر جھِرنا آپ جھِرائیندا۔ سُرت سوانی شبد گُروُ کرائے حج، گھر میلا میل مِلائیندا۔ جوتی جوت سروُپ ہرِ، آپ اپنی کِرپا کر، گُرمُکھ اپنے رنگ رنگائیندا۔ گُرمُکھ سچ رنگائے رنگ، رنگنہار کرتارا۔ آتم سیجا ویکھ پلنگ، میل مِلائے نار کنت بھتارا۔ اٹّھے پہر اِک مردنگ، دِوس رَین وجےّ نگارہ۔ کرے کھیل سوُرا سربنگ، پُرکھ ابناسی ایکنکارا۔ سُکھمن ٹیڈھی بنک پار لنگھ، جوتی جوت سروُپ ہرِ، آپ اپنی کِرپا کر، ایکا دیوے نام سہارا۔ سچ سہارا نام اوٹ، ایکا ایک جنائیا۔ بھاگ لگائے کایا کوٹ، کنچن گڑھ روُپ وٹائیا۔ نِرمل نوُر جگائے جوت، اندھ اندھیر دئے گوائیا۔ سَتگُر پوُرا اِکو بہُت، گُر گُر گھر گھر منگن کوئے نہ جائیا۔ ہرِجن آپ اُٹھائے آلنیوں ڈِگے بوٹ، پھڑ اپنی گود بہائیا۔ جوتی جوت سروُپ ہرِ، آپ اپنی کِرپا کر، گُرسِکھ میلا چائیں چائنیا۔ گُرسِکھ میلا آتم گھر، پرماتم دَیا کمائیندا۔ لیکھا جانے ناری نر، نر نرائن ویس وٹائیندا۔ سُرت سوانی لئے پھڑ، شبدی بندھن آپے پائیندا۔ نِربھؤ چُکائے بھےَ ڈر، سِر اپنا ہتّھ رکھائیندا۔ پنچ وِکارا جائے مر، مر جیِوت اپنا بھیوَ چُکائیندا۔ اِکو نظری آئے ہرِ، دوُجا اِشٹ نہ کوئے وکھائیندا۔ جِس جن اُپر سَتگُر پوُرا کِرپا دئے کر، تِس اپنی بوُجھ بُجھائیندا۔ جرم کرم مرن ڈرن دُکھ

جائے ہر، آتم سُکھ اِک وکھائیندا۔ درس دِکھائے اَگے کھڑ، نِرگُن سرگُن روُپ دھرائیندا۔ سنت سُہیلے گُروُ گُر چیلے باہوں پھڑ، ترےَبھوَن دھنی پار کرائیندا۔ تھِر گھر ساچے آپے وڑ، شبدی جوڑ جُڑائیندا۔ سچکھنڈ دوار پؤڑے چڑھ، چڑھ چڑھ خوشی منائیندا۔ جوتی جوت سروُپ ہرِ، آپ اپنی کِرپا کر، جُگ جُگ ساچے بھگت آپ ترائیندا۔ جُگ جُگ تارے ہرِ جوُ بھگت، بھگتن اپنی دَیا کمائیا۔ لیکھے لائے بوُند رَکت، پنج تت دئے وڈیائیا۔ نِرگُن نِراکار آپ جنائے اپنی شکت، شرع شریِعت نہ کوئے رکھائیا۔ اپنے ہتّھ رکھائے ویلا وقت، تِھت وار نہ کوئے سمجھائیا۔ آپے گھڑے آپے بھنےّ آپ بنائے بنت، گُرمُکھ سجّن آپ پرگٹائیا۔ لیکھا جانے آد اَنت، سِری بھگوَنت جُگ جُگ اپنا حُکم ورتائیا۔ گُرسِکھ گُر گُر گڑھ توڑے ہؤمے ہنگت، میل مِلائے ساچی سنگت، سنگت ہرِ ہرِ اپنا ڈیرہ لائیا۔ ناتا توڑے بُھکھ ننگت، نام بھنڈارا اِک ورتائیا۔ گُرسِکھ سچّا بودھ اگادھا ہوئے پنڈت، جگت وِدیا پڑھن کِتے نہ جائیا۔ ناتا تُٹے جیرج انڈت، اُتبُھج سیتج نہ کوئے پِھرائیا۔ لکھّ چؤراسی ہوئے کھنڈت، مات گربھ نہ پھیرا پائیا۔ مانَس جنم نہ ہوئے بھنگت، سَتگُر اپنی گود بہائیا۔ پربھ اَگے آد جُگاد جُگ جُگ سارے کردے مِنت، نِیوں نِیوں اپنا سیِس جھُکائیا۔ گُرسِکھ وِرلا کرکے آئے ہِمت، جگت دوارا پندھ مُکائیا۔ سَتگُر پوُرا چؤداں لوکاں باہر وکھائے اپنی سِمت، چؤداں طبق چرناں ہیٹھ دبائیا۔ پُرکھ ابناسی ہرِ بھگتاں سنگ سدا ہوئے پرپُھلت، پُھل پُھلواڑی مات مہکائیا۔ جوتی جوت سروُپ ہرِ، آپ اپنی کِرپا کر، جن بھگتاں دیوے نام ور، آد جُگاد آپ رہے اڈولت، گُرسِکھ اڈول آپ رکھائیا۔ مہاراج شیر سِنگھ وِشنوُں بھگوان، لیکھا جانے انبولت، اگلا بولیا اپنے لیکھے وِچ چُھپائیا۔