کتب خانہGranth 21 (Shahmukhi)

۳ ساوَن شہنشاہی سمت ۵ مختیار سِنگھ دے گرِہ پِنڈ گگوبوُا

اوتار کہن پربھ تیرے اَگے ساڈی نِمسکار، نمو نمو سیِس نِوائیا۔ تیرے نام دا ہووے اِک جَیکار، دیِن دُنی اِکو نام دِھیائیا۔ جھگڑا مذہب میٹ وِچ سنسار، سنساری بھنڈاری سنگھاری بَیٹھے سیِس نِوائیا۔ چرن پریِتی ایکنکار دے اِک ادھار، تُدھ بِن دوُجا نظر کوئے نہ آئیا۔ ساچا مندر سوہے تیرا اِک دوار، دھرم دی دھار دے اِک پرگٹائیا۔ تُوں میرا میَں تیرا آتم پرماتم سب دی ہووے وار، وارث ہو کے دے سمجھائیا۔ کلجُگ کوُڑی کِریا میٹ اندھ اندھیار، نِرگُن نوُر جوت کر رُشنائیا۔ تیئی اوتار تیرے سیوادار، بچّے ننےّ منگ منگائیا۔ چاروں کُنٹ ویکھ ہاہاکار، دیِن دُنی رہی کُرلائیا۔ پِتا پوُت نہ رہیا پیار، بھَین بھائی سگلا سنگ نہ کوئے وکھائیا۔ چاروں کُنٹ دھوُاں دھار، دھرم دا چند نہ کوئے چمکائیا۔ تُدھ بِن کوئے نہ پاوے سار، مِہربان تیری اوٹ تکائیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، در تیرے آس رکھائیا۔ اوتار کہن پربھ ویکھ کلجُگ اندھ، سرِشٹی درِشٹی پھول پُھلائیا۔ بھرماں ڈھاہے کوئی نہ کندھ، شاستر سِمرت وید پُران اِنجیِل قرآن پڑھ پڑھ تھکی لوکائیا۔ آتم پرماتم پریِتی سکے نہ کوئے گنڈھ، ٹُٹی جوڑ نہ کوئے جُڑائیا۔ نِج گرِہ ملِے نہ کِسے انند، انندپُر والا جگ نیتر نظر کِسے نہ آئیا۔ مایا ممتا موہ وِکار ودھیا گھمنڈ، ہؤمے گڑھ نہ کوئے تُڑائیا۔ کِرپا کر سوُرے سربنگ، شاہ پاتشاہ تیری اِک سرنائیا۔ جن بھگت سُہیلے لا انگ، انگیکار آپ ہو جائیا۔ صدی چؤدھویں سارے ہوئے ننگ، نام پردہ سیِس نہ کوئے ٹِکائیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، در تیرے منگ منگائیا۔ اوتار کہن پربھ ثابت رہیا نہ کوئے سریِر، پنج تت نہ کوئے وڈیائیا۔ صوُفی ملِے نہ کوئے فقیِر، کلمہ حق نہ کوئے جنائیا۔ سنت بدلے نہ کوئے

تقدیِر، طبع طبیعت نہ کوئے بدلائیا۔ جھگڑا پیا شاہ حقیِر، امیِر غریِب کرے لڑائیا۔ ہؤمے گھر گھر ودھی پیِڑ، دُکھ درد نہ کوئے مِٹائیا۔ لیکھا ویکھ ہست کیِٹ، کیِٹ کیِٹاں کھوج کھوجائیا۔ ساڈا انتر ہویا دِلگیِر، دھیِرج دھیِر نہ کوئے دھرائیا۔ کِرپا کر گُنونت گہر گمبھیِر، گوَر تیری اوٹ تکائیا۔ نام کھنڈا پھڑ شمشیِر، شرع زنجِیر دے تُڑائیا۔ جو آسا رکھ کے گیا کبیِر، بِنا کعبیاں تیرا نوُر چمکائیا۔ اوس دا ویکھ انت اَخیِر، آخر ہو سہائیا۔ تیئی اوتار وہاؤندے نیِر، بِن نیَناں چھہبر لائیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، نِہکلنک نرائن نر، مہاراج شیرسِنگھ وِشنوُں بھگوان، نام نِدھان بخش اپنا سیِر، رس اِکو اِک چکھائیا۔

۳ ساوَن شہنشاہی سمت ۵ کرم سِنگھ دے گرِہ پِنڈ گگوبوُا

اوتار کہن ساڈے انتر آئی پربھ چِندا، چِنتا ویکھی تھاؤں تھائنیا۔ جِدھر ویکھیئے دیِن مذہب اِک دوُجے دی کرن نِندا، تیرا نام کلمہ سمجھ کوئے نہ پائیا۔ سَت دھرم دی ساچی دِسے کوئی نہ بِندا، جننی جن نوُر نہ کوئے چمکائیا۔ پرکاش دِسے نہ کِسے جیؤ پِنڈا، پنچ وِکارا اگنی رہی جلائیا۔ امرت رس دھار وہائے نہ کوئے سِندھا، کایا گاگر ڈوُنگھا ساگر نہ کوئے وڈیائیا۔ میل ملِے نہ کِسے گہر گمبھیِر گُنی گہِندا، پاربرہم برہم تیرا جوڑ نہ کوئے جُڑائیا۔ کلجُگ کوُڑی کِریا مارگ چلے وِنگا، سُکھمن ٹیڈھی بنک پار نہ کوئے کرائیا۔ نیتر رووے کروڑ تیتیِسا سُرپت اِندا، وِشن برہما شِو دین دُہائیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، آد انت پربھ تیرے ہتّھ وڈیائیا۔ اوتار کہن پربھ سچ رہیا نہ کوئے اِنصاف، عدل عدالت نہ کوئے کرائیا۔ جنم کرم دا لیکھا کرے نہ کوئے مُعاف، سنت سَتگُر سیِس ہتّھ نہ کوئے ٹِکائیا۔ من کلپنا میٹے نہ کوئے گُستاخ، موہ ہنکار وِکار اندروں باہر نہ کوئے کڈھائیا۔ تیرا نام نِدھان سِری بھگوان سکے نہ کوئے واچ، اکھّر وِدیا پڑھ پڑھ دیِن دُنی ہوئی ہلکائیا۔ صاحِب سُلطان نؤجوان مرد مردان کلجُگ میٹ اندھیری رات، سَتجُگ سچ کر رُشنائیا۔ جھگڑا رہے نہ دیِن مذہب ذات پات، ہِندوُ مُسلم سِکھ عیِسائی اِکو رنگ دے رنگائیا۔ تیرا نام کلمہ ہووے اِک اِکو طُلبیاں ہووے جماعت، نؤ کھنڈ پرِتھمی اِکو کر پڑھائیا۔ ہر ہِردے انتر نِرنتر رکھ واس، واسطہ آتما پرماتما نال جُڑائیا۔ اسیں تکّیئے اُپر

آکاش، تیرا کھیل اُپر پرِتھمی جنگل جوُہ اُجاڑ پہاڑ وِچ بھرواس، سمُند ساگر پردہ دے اُٹھائیا۔ چار کُنٹ دہ دِشا تیرا نوُر ہووے پرکاش، جوتی جاتے ڈگمگائیا۔ مِہربان مِہربان مِہربان سب دے سِر تے رکھ ہاتھ، پُشت پناہ اپنی دَیا کمائیا۔ جو بھوِکھتاں وِچ سرگُن دھار آئے آکھ، نِرگُن نِروَیر پوُرا دے کرائیا۔ ہؤں سیوک تیرے بالے چرن داس، یاچک ہو کے سیو کمائیا۔ تیئی اوتار کہن پربھ ساڈی اِک عرضوئی اِکو تیرے اَگے بات، باطن پردہ دے کُھلائیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، نِہکلنک نرائن نر، مہاراج شیرسِنگھ وِشنوُں بھگوان، نؤ کھنڈ پرِتھمی ستّ دیِپ من کلپنا رہے نہ کوئے گُستاخ، سَت سچ ہر ہِردے دے وسائیا۔

۳ ساوَن شہنشاہی سمت ۵ جاگیِر سِنگھ دے گرِہ پِنڈ گگوبوُا

اوتار کہن پربھ ویکھ تت اٹّھ، تن ماٹی کھوج کھوجائیا۔ دھیِرج رہیا نہ کوئے ہٹّھ، سَت سنتوکھ نہ کوئے جنائیا۔ بھاگ لگّے نہ کایا مٹھ، تن وجوُد نہ کوئے رُشنائیا۔ پِھری دروہی اٹھسٹھ، گنگا گوداوری جمنا سُرستی رہی کُرلائیا۔ سچ نام دا ملِے نہ اِک ہٹّ، دُھر دی وست نہ کوئے ورتائیا۔ اوتار پَیغمبر گئے تھک، صِفتاں وِچ تیری صِفت صالاحیِا۔ انتم ویکھ حقیِقت حق، لاشریِک پردہ لاہیِا۔ نؤ کھنڈ پرِتھمی اُبلے رتّ، سانتک سَت نہ کوئے کرائیا۔ انتر رہی نہ کِسے گُرمت، من مت ہوئی ہلکائیا۔ تُدھ بِن رکھے کوئے نہ پت، پت پرمیشور ہو سہائیا۔ سَتجُگ تریتا دواپرگیا نٹھ، کلجُگ ویلا انتم آئیا۔ دیِن مذہب دی میٹے نہ کوئے وٹّ، حدوُد حد نہ کوئے گوائیا۔ سچ نام دا لاہا سکے نہ کوئے کھٹّ، کھٹکا اندروں نہ کوئے چُکائیا۔ کِرپا کر پُرکھ سمرتھ، صاحِب سُلطان بےپرواہیِا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، در تیرے منگ منگائیا۔ اوتار کہن پربھ کلجُگ ویکھ کنارہ، نوَ نؤ چار کھوج کھوجائیا۔ سَت دھرم دا دئے نہ کوئے سہارا، سیِس جگدیِش ہتّھ نہ کوئے ٹِکائیا۔ گھر گھر ویکھیا ہؤمے ہنگتا گڑھ ہنکارا، نِمرتا وِچ نہ کوئے سمائیا۔ سَت سچ تیرا نام لائے نہ کوئے اَکھاڑا، کلجُگ مایا ممتا ویسوا ناچ نچائیا۔ ترےَگُن مایا اگنی اگّ لگائے ہاڑا، امرت میگھ نہ کوئے برسائیا۔ جھگڑا پیا پُرکھ نارا، پِتا پوُت کرے لڑائیا۔ کِسے کمّ نہ سیِتا رام جَیکارا، رادھا کرِشنا نہ کوئے چتُرائیا۔ نیتر سارے روون زارو زارا، ظاہر

ظہوُر کر رُشنائیا۔ بےانت بے پرواہ پا سارا، مہاسارتھی اپنا ویس وٹائیا۔ تَینوُں کہہ کے آئے چؤویواں اوتارا، کل کلکی اِک اکھوائیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، تیرے نام دی اِک وڈیائیا۔ اوتار کہن دیِن دَیال اپنی دُنی تک، سچکھنڈ نِواسی دھیان لگائیا۔ چار کُنٹ نہ رہیا سچّ، جوُٹھ جھوُٹھ وجّی ودھائیا۔ گُر اوتار پَیغمبر گئے چھڈ، ناستک روُپ ہوئی لوکائیا۔ آتم پرماتم کر کے اڈّ، پربھوُ تَینوُں رہے بُھلائیا۔ وِشوَ دھار سمجھے نہ کوئے جدّ، بھگت بھگوان نہ رنگ رنگائیا۔ گرِہ مندر اندر لئے نہ کوئے سدّ، کایا کعبے خوشی نہ کوئے منائیا۔ ساچے حُجرے ویکھے نہ کوئے حج، محبوُب مُحبّت وِچ مِلن کوئے نہ پائیا۔ شاستر سِمرت وید پُران اِنجیِل قرآن سارے پڑھ پڑھ گئے تھک، انتر آتم پردہ نہ کوئے اُٹھائیا۔ مِہربان محبوُب صدی چؤدھویں کوُڑی میٹ حد، حدوُد اپنی اِک سمجھائیا۔ تیری دھار تیرا آتم تیرے نالوں رہے نہ کوئے الگ، وکھرا گرِہ نہ کوئے سُہائیا۔ جن بھگتاں درشن دے اُپر شاہ رگ، نؤ دوارے ڈیرہ ڈھاہیِا۔ کلجُگ کوُڑ کلپنا بُجھے اگّ، سانتک سَت سَت کرائیا۔ تیئی اوتار لوک مات رہے سدّ، سدّا دیون تھاؤں تھائنیا۔ بِن ہرِ نامے خالی ہوئے سب دے ہڈّ، ناڑ بہتّر رہی کُرلائیا۔ کِرپا کر صاحِب سمرتھ، شہنشاہ تیری اوٹ تکائیا۔ جوتی جوت سروُپ ہرِ، آپ اپنی کِرپا کر، دیونہارا ساچا ور، ہرِ کرتا نوُر الاہیِا۔ اوتار کہن پربھ دیکھ اپنی دُنی، دعوے نال جنائیا۔ ساچا رہیا نہ کوئے رِکھی مُنی، مُنیِشر روُپ نہ کوئے درسائیا۔ انتر سُنے نہ کوئے دُھنی، ناد شبد نہ کوئے شنوائیا۔ دھرم دا دِسے کوئے نہ گُنی، گُنونت نظر کوئے نہ آئیا۔ لکھّ چؤراسی سرِشٹی چھانی پُنی، مانَو مانَو پھول پُھلائیا۔ بھاگ دِسے نہ کِسے کُلیّ، ساڈھے تِنّ ہتّھ کایا خالی نظری آئیا۔ تیرا نام رسنا جپدے سارے بُلیِں، ہِردے اندر نہ کوئے وسائیا۔ سکھی سہیلی تیرے کنڈے کوئے نہ تُلی، تُلسی رمائن کمّ کِسے نہ آئیا۔ صدی چؤدھویں محمد پُھلواڑی پُھلی، عیسیٰ موُسیٰ دئے گواہیِا۔ اُمت نبیِاں راہ بُھلی، رحمت حق نہ کوئے کمائیا۔ تُدھ بِن اوَر نہ دِسے کوئی صُلح کُلیّ، کُل مالک ویکھ وکھائیا۔ دھرنی دھرت دھوَل دھؤل مایا ممتا وِچ رُلی، منسا موہ نہ کوئے مِٹائیا۔ سب دی کایا بِرچھ ٹاہنی ہُلی، پھل پُھل نظر کوئے نہ آئیا۔ کِرپا کر اپنے چرناں دے دھوُلی، دھوُڑی ٹِکّے مستک خاک رمائیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، ہرِ صاحِب تیری سرنائیا۔ اوتار کہن پُرکھ اکال کیوں بَیٹھا لُک، کلجُگ انتم ویکھ وکھائیا۔ گھر گھر ہؤمے بھریا دُکھ، دردیِاں درد نہ کوئے گوائیا۔ سُپھل ہووے نہ جننی کُکھ، بھگت جنمے نہ کوئے مائیا۔ کوٹن کوٹ ویکھ مانَس منُکھ،

تتاں والا سریِر رہے ہنڈائیا۔ تیرا درس کوئے نہ پائے ابناشی اچُت، پاربرہم برہم میل نہ کوئے مِلائیا۔ آسا ترِسنا ودھی بُھکھ، سانتک سَت نہ کوئے جنائیا۔ نِرگُن نِروَیر نِرنکار نِراکار آپے اُٹھ، جوتی جاتے لےَ انگڑائیا۔ غریِب نِمانیاں اُتے تُٹھ، کوجھے کملے گلے لگائیا۔ بھگت بھگوان بنا سُت، اپرادھی اپنے رنگ رنگائیا۔ کلجُگ پَینڈا جائے مُک، نام کھنڈا کھڑگ چمکائیا۔ جھوُٹھ اندھیرا جائے چُھپ، ساچا چند نام رُشنائیا۔ سنت سُہیلیاں آپے پُچھ، کایا مندر اندر وڑ کے پردہ لاہیِا۔ کوُڑ کُڑیاراں جڑ پُٹ، لوک مات رہن نہ پائیا۔ دیِن مذہب دی رہے نہ کوئے پُھٹ، ہِندوُ مُسلم سِکھ عیِسائی سارے اِکو گھر وسائیا۔ تُوں میرا میَں تیرا آتم پرماتم سوہنگ سب دی سانجھی ہووے تُک، پاربرہم برہم اپنا رنگ رنگائیا۔ تیئی اوتار کہن تیری سرن سرنائی جائیے جھُک، ڈنڈاوت وِچ نِیوں نِیوں لاگن پائیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، نِہکلنک نرائن نر، مہاراج شیرسِنگھ وِشنوُں بھگوان، دُھر دا امرت حقیِقی جام پیا گھُٹ، جنم جنم دی کرم کرم دی ترِسنا رہے نہ رائیا۔

۳ ساوَن شہنشاہی سمت ۵ گُربخش سِنگھ دے گرِہ پِنڈ گگوبوُا

اوتار کہن پربھ ویکھ کلجُگ رَین اندھیری کالی، کلوُ کل اپنی کار کمائیا۔ چار کُنٹ دہ دِشا سانوُں کڈھن گالی، ستکار وِچ سیِس نہ کوئے نِوائیا۔ سمت سمتی وقت ویکھ حالی، ہرِجوُ اپنی دَیا کمائیا۔ سَت دھرم دے باغ دا رہیا کوئے نہ مالی، ہریا سِنچ نہ کوئے کرائیا۔ ساڈے نام دی مُکی دلالی، دلیِل وِچوں دلیِل نہ کوئے بدلائیا۔ اسیں در تیرے سوالی، مانگت ہو کے منگ منگائیا۔ ترےَگُن مایا توڑ جنجالی، جاگرت جوت کر رُشنائیا۔ تیرے دواریوں کوئی نہ جائے خالی، خالص وست دینی ورتائیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، اوتار نِو نِو لاگن پائنیا۔ اوتار کہن پربھ دے دے اِک سہارا، سہائک ہو کے ویکھ وکھائیا۔ مستک دھوُڑی لا دے چھارا، شہنشاہ ٹِکاّ نام رمائیا۔ تُوں سرگُن نِرگُن دھریا روُپ دوبارہ، کل کلکی ویس وٹائیا۔ آتم برہم دا سانجھا یارا، سچ دا مالک اِک اکھوائیا۔ کلجُگ اندھ اندھیرا میٹ غُبارا، نِرگُن نوُر چند کر رُشنائیا۔ وید ویاسا دے رہیا اِشارہ،

شبدی سیَنت نال دِرڑائیا۔ تیرا کھیل الکھ اگوچر اگمّ اپارا، پاربرہم پربھ بھیوَ کوئے نہ پائیا۔ سرِشٹی درِشٹی میٹ دھوُاں دھارا، نِرگُن دیِا اِکو اِک ڈگمگائیا۔ تیئی اوتار تیرا ونجارا، وست اِکو دینی ورتائیا۔ سَت سچ دا بول جَیکارا، جےَ جَیکار دینی سُنائیا۔ اِکو حُکم ورتے پُرکھ نارا، بِردھ بال ونڈ نہ کوئے ونڈائیا۔ تُوں صاحِب سوامی چؤویواں اوتارا، تارنہارا دُھردرگاہیِا۔ تیرا لیکھا کاغذ قلم نہ لِکھنہارا، کانی قلم نہ کوئے چتُرائیا۔ در ٹھانڈے کڈھیئے سارے ہاڑا، ہؤکا لےَ حال جنائیا۔ کلجُگ جیِواں اگنی لگّی بہتّر ناڑا، اپ تیج وائے پرِتھمی آکاش من مت بُدھ سانتک سَت نہ کوئے کرائیا۔ تُوں شہنشاہ سُلطان پروردِگار ہو ظاہرا، ظہوُر نوُر اِک چمکائیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، وست اگمّ اتھاہ ورتائیا۔ اوتار کہن پربھ اپنی دسّ دے ہستی، ہستناپُر کرِشن پانڈو گیا دِرڑائیا۔ نِگاہ مار نِرگُن دھار چاڑھ دے مستی، مست مستانے آپ پرگٹائیا۔ تُوں مالک خالق دُھر دا عرشی، پریِتم پُراتن نظری آئیا۔ نؤ سؤ چُرانویں چؤکڑی جُگ پِچھوں تیری بھگتاں والی برسی، دوُسر سمجھ کوئے نہ پائیا۔ آد انت دی ساڈے لیکھے والی کڈھ پرچی، پراچیِن دا پردہ دے اُٹھائیا۔ اسیِں سارے تیرے غرضی، گرج کے تَینوُں رہے سُنائیا۔ انت اَخیِری ویکھ عرضی، جو آرزو تیرے وِچ ٹِکائیا۔ صدی چؤدھویں بن دردی، دیِناں اناتھاں دَیا کمائیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، دُھر دھام دینا درسائیا۔ اوتار کہن ساچا نام وجا دے ڈنکا، ڈؤروُ اِک کھڑکائیا۔ سندیسہ دے دے راؤ رنکا، شاہ سُلطان لےَ اُٹھائیا۔ سچ سمجھا دے اپنا بنکا، بنک دَواری دے کُھلائیا۔ شبدی دھار لا کے تنکا، سوئی سُرتی لےَ جگائیا۔ کلجُگ جیو پھیردے منکا، من کی مالا نہ کوئے بھوائیا۔ جھگڑا مِٹا دے راگ کنّ کا، انحد نادی دُھن شنوائیا۔ لیکھا رہے نہ ہرکھ سوگ غم کا، چِنتا اندروں دینی کڈھائیا۔ پرکاش کر دے آپ گوبِند چنّ کا، نِرگُن نوُر جوت رُشنائیا۔ جھگڑا مِٹا دے مایا ممتا تن کا، دؤلت اِکو نام ورتائیا۔ تُدھ بِن بیڑا کوئے نہ بنّھدا، جُگ چؤکڑی تیری اوٹ تکائیا۔ ویکھ کھیل کلجُگ کل دا، کلکاتی بنے قصائیا۔ بھیوَ کُھلا دے اپنے اگمّ محل دا، محفل اپنے نال رکھائیا۔ وِچھوڑا ہووے نہ کدے پل دا، پلکاں دے پِچھے نظری آئیا۔ سچ سِنگھاسن تُدھ بِن کوئے نہ ملّدا، آتم سیج نہ کوئے سُہائیا۔ وقت سُہنجنا کر دے اپنے محل اٹل دا، درگاہ ملِے مان وڈیائیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، مِہر نظر آپ اُٹھائیا۔ اوتار کہن ساڈی انت انت ایہہ مِنّت، نِمرتا وِچ جنائیا۔ ساڈی رہی کوئے نہ ہِمّت، ہوصلے رہے ڈھاہیِا۔

پرگٹ ہو چارے سِمت، چارے بانی پھول پُھلائیا۔ کلجُگ کلوُآ کرے عِلّت، من منسا نال مِلائیا۔ جگت خواری دِسے ذِلّت، آبروُ رہن کوئے نہ پائیا۔ جِدھر تکّیئے تیرے نِندک، نِندیا وِچ سرِشٹ سبائیا۔ ساچا صبر صبوُری دے دے صِدق، صدقے واری گھول گھُمائیا۔ تُوں میرا میَں تیرا آتم پرماتم ہووے مِلّت، میلا ہرِ جگدیِش کرائیا۔ ہرکھ سوگ غم رہے نہ چِنتک، چِنتا چِکھا نہ کوئے جلائیا۔ جھگڑا رہے نہ مذہب ہِنسک، ہنس روُپ دینا بنائیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، نِہکلنک نرائن نر، مہاراج شیرسِنگھ وِشنوُں بھگوان، مِہربان مِہربان مِہربان مِہر نظر اِک اُٹھائیا۔

۴ ساوَن شہنشاہی سمت ۵ چنّن سِنگھ دے گرِہ پِنڈ گگوبوُا

اوتار کہن پربھ تیرے چرن کوَل بندنا، بندگی بندیاں توں باہر دینی دِرڑائیا۔ رام وشِشٹ تُونہی بخشندنا، دوُجا نظر کوئے نہ آئیا۔ سیِس جھُکائے کرِشن کاہنا نند مُکندنا، تریَلوکی ناتھ لاگے پائیا۔ انتم سب نے ایتھوں ونجھنا، لوک مات رہن کوئے نہ پائیا۔ بِن تیری کِرپا ملِے نہ کِسے انندنا، نِجانند نہ کوئے وکھائیا۔ آتم سیج سُہائے نہ کوئے پلنگنا، سَت سوامی نظر کوئے نہ آئیا۔ کلجُگ انت اِکو نام کِسے نہ ونڈنا، مارگ اِک نہ کوئے درسائیا۔ نیتر رووے سوُریہ چندنا، منڈل منڈپ دئے دُہائیا۔ کلجُگ انتم ویکھ کنڈھنا، تٹ کنارہ پھول پُھلائیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، دیونہار تیری وڈیائیا۔ اوتار کہن پربھ تیرے چرن کوَل ارداس، سیِس جگدیِش نِوائیا۔ ساڈے رہیا کِچھ نہ پاس، پاسا دیِن دُنی بدلائیا۔ ویلا وقت ویکھ لےَ خاص، خالص اپنا رنگ رنگائیا۔ جو بول کے آئے بھوِکھت واک، سندیسہ دُھر دے رام سُنائیا۔ سو لہنا مُکا دے ماٹی خاک، خالق خلق تیری وڈیائیا۔ کلجُگ اندر سَتجُگ کھول دے تاک، نانک گوبِند دئے گواہیِا۔ تُدھ بِن دوُجا رہے کوئی نہ ساک، آتم پرماتم جوڑ جُڑائیا۔ صدی چؤدھویں میٹ دے واٹ، محمد حمد وِچ سُنائیا۔ ویہویں صدی لیکھےلاوے آپ، عیسیٰ اِشٹ تیرا اِک منائیا۔ موُسیٰ راہ تکّے اگمّی باپ، نیتر لوچن نیَن اکھّ اُٹھائیا۔ برہما کہے میٹ دے ذات، آتم برہم دینا جنائیا۔ شنکر کہے کوُڑی کِریا کر دے گھات، حُکم فرمانا اِک سُنائیا۔ وِشنوُں کہے سب نوُں دے بھنڈارا دات، دَیاوان آپ ورتائیا۔ دُھر دا شبد کہے پربھ تُوں سب کُچھ آپے آپ، دوُجا نظر کوئے نہ آئیا۔

لکھّ چؤراسی تھاپن تھاپ، ترےَ پنج جوڑ جُڑائیا۔ اپنا نام دسّ کے پوُجا پاٹھ، سِمرن رسنا والا وکھائیا۔ نِرگُن نوُر کر پرکاش، ہر گھٹ کریں رُشنائیا۔ تیرے اَگے اِک درخواست، بیننتی چرناں وِچ سُنائیا۔ سب دا لیکھا ویکھ واستک، واہ واہ تیری اوٹ تکائیا۔ جیو رہے نہ کوئی ناستک، جوتی جوت سروُپ ہرِ، آپ اپنی کِرپا کر، ایکا دینا دُھر دا ور، وست اگمّ آپ ورتائیا۔ اوتار کہن سچ تھاپنا تھاپ، تھپکی نام والی لگائیا۔ کلجُگ کوُڑی کِریا میٹ دے پاپ، پتت پُنیِت دے بنائیا۔ سَتجُگ ساچا دسّ جاپ، جگ جیِون داتے آپ دِرڑائیا۔ کلجُگ میٹ اندھیری رات، جوُٹھ جھوُٹھ ڈیرہ ڈھاہیِا۔ سَتجُگ سچ دے سوغات، وست امولک آپ ورتائیا۔ کلجُگ جھگڑا میٹ دے ذات، ذاتی نظر کوئے نہ آئیا۔ سَتجُگ سچ بخش اِتفاق، کلجُگ نِفاق دے گوائیا۔ ساڈا پوُرا کر بھوِکھت واک، وید ویاسا کرمنڈلی رہیا کھڑکائیا۔ چار ویداں ولّ جھاک، برہما ورقہ ورقہ رہیا اُلٹائیا۔ رام رو رو رہیا آکھ، بنباسی دئے دُہائیا۔ شنکر بھجےّ اُپر کَیلاش، وِشنوُں وِشوَ دھار دُہائیا۔ کرِشنا چھڈ کے یادو ساتھ، بنسری ناتا مات تُڑائیا۔ کِرپا کر پربھوُ پربھ آپ، کاہن کاہنا ویس وٹائیا۔ سچ دھرم دا کھول دے ہاٹ، دوارا اِکو اِک پرگٹائیا۔ تُوں میرا میَں تیرا دیِن دُنی دا کر دے جاپ، آتم پرماتم رنگ رنگائیا۔ روُح بُت ہووے پاک، تن ماٹی خاک کر صفائیا۔ سانوُں تیرے اُتے وِشواس، وِشیاں توں باہر تُوں سَتگُر اِکو نظری آئیا۔ تیرا ہڈّ ماس ناڑی نہ کوئے سرگُن پاوے راس، تتاں والی نہ کوئے لڑائیا۔ نِرگُن نوُر جوت پرکاش، آد جُگادی اِک اکھوائیا۔ ساڈی بیننتی منظور کر ارداس، نِمرتا وِچ سیِس جھُکائیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، ور داتے تیری وڈیائیا۔ اوتار کہن تیرا لیکھا پرا پسنتی، مدھم بَیکھری کھوج کھوجائیا۔ تیرا لہنا اکھّراں والا پنڈتی وِدیا وِچ چتُرائیا۔ تیرا مان پیا سنگتی، ہرِجن میلا سہج سُبھائیا۔ تیرا جھگڑا جیرج انڈجی، اُتبُھج سیتج کھوج کھوجائیا۔ کِرپا کر صاحِب بخشندگی، بخشنہار تیری سرنائیا۔ اوتاراں آشا ایہو منگ لئی، مانگت ہو کے جھولی ڈاہیِا۔ دیِن دُنی دی کایا ماٹی رنگ دئیں، رنگن اپنا نام رنگائیا۔ صدی چؤدھویں جاوے لنگھدی، محمد ویکھے تھاؤں تھائنیا۔ کوئی آواز آوے نہ دُھنی دھنّ دی، شُکُرانے وِچ نہ حق خُدائیا۔ سرِشٹی بُھکھی ہوئی انّ دی، مایا ممتا وِچ کُرلائیا۔ کِسے نوُں آس نہیں گوبِند چنّ دی، گوبِند درس کوئے نہ پائیا۔ منسا نانک کوئے نہ منّدی، ممتا موہ نہ کوئے مِٹائیا۔ جگت گھڑی دِسے غم دی، غم خوار ملِے نہ کوئے گوسائنیا۔ دُنیا بھوگی ہوئی درِشٹی چمّ دی، آتم سیج نہ کوئے ہنڈھائیا۔

ونجاری ہوئی نِندیا کنّ دی، سرون نام نہ کوئے شنوائیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، در ٹھانڈے بخش سرنائیا۔ اوتار کہن اپنی دیِن دُنی تکّ، چؤراسی اپنی ویکھ وکھائیا۔ سانوُں سب تے پیا شکّ، تیرا پریم نہ کوئے ودھائیا۔ رسنا گاؤندے کوٹن بھٹّ، جِہوا نال جنائیا۔ منکے مالا رہے رٹ، دھوُڑی خاک سیِس رمائیا۔ بھجےّ پِھردے تیِرتھ تٹ، اٹّھاں سٹّھاں ونڈ ونڈائیا۔ شاستر سِمرت وید پُران پڑھ پڑھ گئے تھک، اکھّر اکھّراں جوڑ جُڑائیا۔ سیِس نِواؤندے رہے مندر مسجد شِودوالے مٹھ، گُروُدُآر ویکھن چائیں چائنیا۔ کلجُگ انت سِری بھگوَنت تیرا نام ملِے کِسے نہ رس، رستہ اندروں نہ کوئے کُھلائیا۔ من کلپنا ہو کے وسّ، بھجّن تھاؤں تھائنیا۔ کِسے دے کُچھ نہ آوے ہتّھ، خالی ہتّھ دِسے لوکائیا۔ کِرپال کِرپانِدھ کلجُگ انتم ہو پرگٹ، پرگنا اپنا دے سمجھائیا۔ جِتھے گُر اوتار پَیغمبر وِشن برہما شِو دیوت سُر تیرا نام رہے رٹ، اِکو سد آواز لگائیا۔ اوہ کلمہ کائنات دسّ، ہر ہِردے دے دِسائیا۔ تیری سرِشٹی تیرا کرے جس، تتاں والا اِشٹ نہ کوئے منائیا۔ شبد سَتگُروُ ہر گھٹ اندر وس، ہوکا دے کے لےَ جگائیا۔ امرت جھِرنا دیوے تیرا رس، رسنا رس چکھن دی لوڑ رہے نہ رائیا۔ نِج نیتر کھول دے اکھّ، اٹّھے پہر کر رُشنائیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، ور اپنا اِک سمجھائیا۔ اوتار کہن اسیں چھڈیئے ایُدھیا پراگ، کاشی قسم نال تجائیا۔ بن بِندرا کر تیاگ، متھرا گوکل نہ ونڈ ونڈائیا۔ اِکو تیرا ہوئے وَیراگ، دوُجا پیار نہ کوئے ودھائیا۔ کِرپا کر سب دی کھول دے جاگ، جاگرت جوت کر رُشنائیا۔ ساڈے کہِندیاں سرِشٹی درِشٹی لگّی آگ، ترےَگُن سکے نہ کوئے بُجھائیا۔ برہم دا جگے نہ کوئے چراغ، کایا مندر نہ کوئے رُشنائیا۔ کوٹن کوٹ رادھا کرِشن سیِتا رام دا کردے پاٹھ، سیِتا رام مِلن کِسے نہ آئیا۔ سب دی پوُری ہوئی واٹ، پَینڈا مُکنا تھاؤں تھائنیا۔ کلجُگ ویکھ اندھیری رات، اندھ اندھیر دینا گوائیا۔ اسیں سارے چھڈے ساک، سجّن گئے تجائیا۔ بول کے تیرا واک، نعرہ نام سُنائیا۔ کلجُگ انت کل کلکی آوے آپ، آپ اپنا پھیرا پائیا۔ جو سب دا ہووے مائی باپ، پِتا پُرکھ اکال وڈ وڈیائیا۔ سانجھا دیوے دُھر دا جاپ، جگ جیِون داتا آپ ورتائیا۔ سو ساڈی پوُری کر دے آس، نِراسا رہن کوئے نہ پائیا۔ اوتار کہن تیری آد انت دی اِکو ذات، دوُجا روُپ نہ کوئے بدلائیا۔ سب دی کرنی کر دے مُعاف، مِہر نظر اِک اُٹھائیا۔ جوتی جوت سروُپ ہرِ، آپ اپنی

کِرپا کر، ایکا دینا دُھر دا ور، نِہکلنک نرائن نر، مہاراج شیرسِنگھ وِشنوُں بھگوان، تیرا درس کریئے ساکھیات، پردہ اوہلا کایا چولا رہن کوئے نہ پائیا۔

۴ ساوَن شہنشاہی سمت ۵ دلیِپ سِنگھ دے گرِہ پِنڈ گگوبوُا

اوتار کہن پربھ تیرا پرسِدھ ہووے اِکو اُوڑا، اونکار تیری سرنائیا۔ سرِشٹی درِشٹی رنگ چاڑھ گوُڑھا، دُتیا بھاؤ دے مِٹائیا۔ چتُر سُگھڑ بنا موُرکھ موُڑھا، اگیان اندھیرا رہے نہ رائیا۔ ساچے نام دی دے دے تُورا، تُریا توں پرے کر شنوائیا۔ جوتی نوُر دے ظہوُرا، ظاہر ظہوُر دَیا کمائیا۔ سب دا واک کر پوُرا، بھوِکھتاں وِچ صِفتاں وِچ منگ منگائیا۔ کلجُگ کوُڑی کِریا سانبھ دے کوُڑا، گلی کوُچا ہوئے صفائیا۔ سچ پریم دی دے دھوُڑا، ٹِکّے مستک نام رمائیا۔ چار جُگ دا بھگت تیرا مزدوُرا، چاکر سیوا ویکھ وکھائیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، در تیرے الکھ جگائیا۔ اوتار کہن پربھ سِدھ کر دے اُوڑا اکھّر، اکھّراں ونڈ نہ کوئے ونڈائیا۔ گوبِند لیکھے لا لےَ ستھر، سیج یارڑا اِک ہنڈھائیا۔ پوُجا رہے نہ مڑھی گور پتّھر، سِل پاہن پوُجن کوئے نہ پائیا۔ نیتر نیِر وہاوَن پریمی پیارے اتھر، بِرہوں وَیراگی چوٹ لگائیا۔ چاروں کُنٹ تیری یاد وِچ نسّن، بھجّن تھاؤں تھائنیا۔ چرن دوارے تیرے وسن، دوُجا گرِہ نہ کوئے سُہائیا۔ اِکو نام ڈھولا جپن، کلمہ کائنات دِرڑائیا۔ دھرم دی دھار کراؤنا مجن، دُرمت مَیل کر صفائیا۔ آتم پرماتم بننا سجّن، سگلا سنگ اِک وکھائیا۔ تُدھ بِن دوُجا کوئے نہ پردہ کجّن، سِر ہتّھ نہ کوئے رکھائیا۔ جھگڑا مُکا دے ماٹی بدن، مذہباں رہے نہ کوئے لڑائیا۔ اوتار در سیِس نِوا کے تَینوُں سدّن، لوک مات ویکھ وکھائیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، در تیرے وجےّ ودھائیا۔ اوتار کہن اپنی کر دے کِرپا، کِرپال تیری وڈیائیا۔ دیِن دُنی دی میٹ دے بِپتا، وِپریِت دا جھگڑا دے مُکائیا۔ مانَو روُپ بنا لےَ سِکھ دا، سچ دھرم اِک سمجھائیا۔ اِشٹ پرگٹا دے ایکنکار اِک دا، اِک اِکلّا ہو سہائیا۔ جو گُر اوتار پَیغمبر تیرا لیکھا رہیا لِکھدا، ناتا جوڑ کاغذ قلم شاہیِا۔ ونجارا بنیا رہیا پتّھر اِٹّ دا، کھیل جُگ جُگ مات کرائیا۔ کلجُگ انتم تیرا نام ٹکیاں دے وِچ وِکدا، بِنا ٹّکیاں توں گرنتھی پاٹھ کرن کوئے نہ پائیا۔ نانک نِرگُن سرگُن تیرا نِشانہ ویکھ لما چِٹ

دا، جِس دا اکھّر پڑھن کوئے نہ پائیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، در مانگت منگ منگائیا۔ اوتار کہن پربھ تیرے اوڑے وِچ جذب ہووے اوم، وِشن برہما شِو نہ کوئے وڈیائیا۔ دُتیا رہے کوئے نہ دوم، دوُآ ایکے وِچ رلائیا۔ جھگڑا رہے نہ کوئے سوم، سوَیم اپنا رنگ رنگائیا۔ چؤتھا گھر ونڈ نہ ہوم، ہر گھٹ اندر نظری آئیا۔ پنچم پنچ صاحِب موہن، موہن اِکو سوبھا پائیا۔ سرِشٹی درِشٹی کھول دے لوئن، نیتر اکھّ کر رُشنائیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، بھیوَ ابھیدا آپ کُھلائیا۔ اوتار کہن اوڑے وِچوں ویکھیئے تیرا اِشٹ، اِشٹی اِکو نظری آئیا۔ نؤ ستّ کھول دے درِشٹ، دِشا اپنی پردہ لاہیِا۔ جھگڑا مُکا سوَرگ بہِشت، جنّت توں پرے دے سمجھائیا۔ جھگڑا مُکا مجازی حقیِقی عِشق، آتم پرماتم رنگ رنگائیا۔ جھگڑا رہے نہ ٹانک جِست، اِک دو نہ کوئے وکھائیا۔ گُر اوتار پَیغمبر رہے بِست، جُگ جُگ دھیان لگائیا۔ صدی چؤدھویں انت اَخیِر تیرے ہتّھ سب دی لِسٹ، پردہ کھولنا تھاؤں تھائنیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، دُھر دھام اِک پرگٹائیا۔ اوتار کہن تیرا اوڑا تیرا دِسے دھرم، دھرم دھار جنائیا۔ جِس دے وِچ نہیں کوئی کرم، کرم کانڈ ونڈ نہ کوئے کرائیا۔ جھگڑا رہے نہ کِسے برن، ورن رنگ نہ کوئے رنگائیا۔ اِکو نظری آئے سرن، سرنگت اِک اکھوائیا۔ اِکو پوُجا ہووے چرن، چرن دھوُڑی وڈ وڈیائیا۔ دو جہان تَیتھوں ڈرن، سِر سکے نہ کوئے اُٹھائیا۔ گُر اوتار پَیغمبر تیرا نام پڑھن، وکھری کرے نہ کوئے پڑھائیا۔ سچ دوارے سارے کھڑن، ہوکا اِکو حق سُنائیا۔ قؤل اِقرار سب دا ہووے پرن، پت پرمیشور تیری بےپرواہیِا۔ جن بھگتاں کھول کے ہرن پھرن، لہنا سب نوُں دے سمجھائیا۔ تُوں صاحِب سوامی کرنی کرن، کرتا پُرکھ اِک اکھوائیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، نِہکلنک نرائن نر، مہاراج شیرسِنگھ وِشنوُں بھگوان، بِن تیری کِرپا آد جُگاد جُگ چؤکڑی تیری منزل جیو موُل نہ چڑھن، چڑھدا لہندا دکھّن پہاڑ نِرگُن دھار سمجھ کِسے نہ آئیا۔

۴ ساوَن شہنشاہی سمت ۵ کرم سِنگھ دے گرِہ پِنڈ گگوبوُا

اوتار کہن پربھ ساڈی پوُری کر دے شرط، شرطیہ اپنا حُکم ورتائیا۔ رام کہے میَں سندیسہ دِتا بھرت، ایُدھیا توں باہر آپ سمجھائیا۔ کلجُگ دُہائی پِھرنی اُتے دھرت، چاروں کُنٹ ہاہاکار مچائیا۔ نِرگُن دھار پربھ نے آؤنا پرت، پت پرمیشور ویس وٹائیا۔ اسیں ویکھنا اُتوں عرش، عرشی پریِتم کی کی کار کمائیا۔ کِس بِدھ بھگتاں اُپر کرے ترس، رحمت سچ کمائیا۔ امرت میگھ اگمّا دیوے برس، برکھا اپنا نام برسائیا۔ چِنتا سوگ مِٹے ہرکھ، ہوَس کوُڑی دئے بُجھائیا۔ سب دا لہنا پوُرا کرے قرض، مقروُض جھولی دئے بھرائیا۔ دیِناں اناتھاں ونڈے درد، دُکھیاں ہوئے سہائیا۔ شرع چُھری نہ کاٹے کرد، قتل گاہ دا ڈیرہ ڈھاہیِا۔ بیننتی منظور کرے عرض، آرزو اپنے لیکھے پائیا۔ ایہہ کھیل ہونا اسچرج، جِس نوُں سمجھے نہ کوئے رائیا۔ جودھا سوُربیِر مردانہ بنکے مرد، مُدّعا اپنا ویکھ وکھائیا۔ جوتی جوت سروُپ ہرِ، آپ اپنی کِرپا کر، کرے کھیل ساچا ہرِ، سچ دا حُکم اِک ورتائیا۔ اوتار کہن ساڈی پوُری کرے خواہش، خالص اپنا رنگ رنگائیا۔ جن بھگت سُہیلے کر تلاش، نِرگُن سرگُن میل مِلائیا۔ گُر اوتار پَیغمبراں دے شاباش، بلّے بلّے کر وڈیائیا۔ انتم سب دا لیکھا پوُرا کرے حُکم دیوے آپ، اپنی کار کمائیا۔ چار ورن دا سانجھا کر کے جاپ، جگ جیِون داتا دئے سمجھائیا۔ نؤ کھنڈ پرِتھمی شبد دھار آپ ناپ، بِنا قدم قدم اُٹھائیا۔ سرِشٹی درِشٹی ویکھنہار پلیِت پاک، پتت پاپی کھوج کھوجائیا۔ ایہہ کھیل کرے پُرکھ ابناش، ہرِ کرتا دُھردرگاہیِا۔ جوتی جوت سروُپ ہرِ، آپ اپنی کِرپا کر، کرے کھیل ساچا ہرِ، نِہکلنک نرائن نر، مہاراج شیرسِنگھ وِشنوُں بھگوان، نِرگُن نوُر کر جوت پرکاش، پرکاشت ایکا اپنا نام کرائیا۔

۴ ساوَن شہنشاہی سمت ۵ اجیِت سِنگھ دے گرِہ ویرکا

اوتار کہن پربھ اصلی رہی نہ ساڈی صوُرت، پاتھر پاہن روُپ گئے بدلائیا۔ سَتجُگ ساچی سَت سَت دی کر مہوُرت، مِہربان مِہربان مِہربان مِہر نظر اُٹھائیا۔ اپنے نام شبد دی دے دے اِک تُورت، تُریا توں پرے تُرت دے سمجھائیا۔ کلجُگ جیو سمجھا موُڑھ موُرکھ، اگیان اندھیر دے گوائیا۔ ناتا توڑ کوُڑو کوُڑت، سچ سُچ سنجم اِک پرگٹائیا۔ نِرگُن جوت بخش نوُرت، نوُر

نوُرانہ ڈگمگائیا۔ تُوں سرب کلا بھرپوُرت، سمرتھ سوامی اِک اکھوائیا۔ ہر گھٹ حاضر حزوُرت، گرِہ گرِہ مندر ڈیرہ لائیا۔ ساڈی آسا منسا کر پوُرت، پوُرن برہم دے جنائیا۔ ہؤمے روگ سگلا میٹ وِسوُرت، وِشے وِکاراں ڈیرہ ڈھاہیِا۔ کلجُگ انتم سب نوُں تیری پئی ضرورت، ظاہر ظہوُر ہو کے ویکھ وکھائیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، ہرِ اپنا رنگ رنگائیا۔ اوتار کہن تیرے نام دا وجےّ ڈنکا، چار ورن شنوائیا۔ سَت دھرم دا اِک سُہا بنکا، کھتری براہمن شوُدر وَیش اِکو گھر وسائیا۔ اِکو اِشٹ دیوَ سوامی تیری ہووے منّتا، دوُجا نظر کوئے نہ آئیا۔ گُرمُکھ سنت سُہیلے پرگٹا گڑھ توڑ ہؤمے ہنگتا، ہنگ برہم اِک جنائیا۔ بودھ اگادھ بن پنڈتا، نِرگُن نِروَیر نِراکار نِرنکار نِش اکھّر دے سمجھائیا۔ تیرا کھیل جُگ چؤکڑی سَتجُگ تریتا دواپرکلجُگ انتا، انتشکرن ویکھ خلق خُدائیا۔ سَت دھرم دی سچ بنا دے بنتا، گھڑن بھنّنہار سمرتھ تیرا لیکھا اگمّ اتھاہیِا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، سچ تیری آس رکھائیا۔ اوتار کہن دیِن دُنی دی بدل دے عادت، عدل اِنصاف اِک کمائیا۔ اِکو کلمہ دسّ عبادت، نام نِدھانا اِک جنائیا۔ چار جُگ دے شاستر دین شہادت، گواہ اِنجیِل قرآن لےَ بُھگتائیا۔ کوُڑی کِریا ہر ہِردے کر ممانت، تن وجوُد رہن نہ پائیا۔ سَتجُگ سچ ساچی وست بخش نیامت، مِہربان محبوُب اپنا رنگ رنگائیا۔ منوُآ کرے نہ کوئے بغاوت، بُدھی وِچ نہ کوئے لڑائیا۔ جوتی جوت سروُپ ہرِ، آپ اپنی کِرپا کر، ایکا دینا ساچا ور، سچ دے مالک ویکھ وکھائیا۔ اوتار کہن پربھ ساچی دسّ دے سَتجُگ ریِتی، ریِتیوان تیری سرنائیا۔ بھیوَ چُکا دے مندر مسیِتی، کایا کعبہ اِک وڈیائیا۔ دیِن دُنی دی بدل دے نیِتی، مایا ممتا موہ دے گوائیا۔ کایا اگنی کر دے ٹھانڈی سیِتی، ترےَگُن امرت دھار بُجھائیا۔ نؤ کھنڈ پرِتھمی ستّ دیِپ دیِن دُنی ویکھ اپنی باغیچی، چار ورن اٹھاراں برن کھوج کھوجائیا۔ ایکو نام کلمہ تیری دھرم دی ہوئے حدیِثی، حضرتاں توں پرے کر پڑھائیا۔ صدی چؤدھویں انت اَخیِری رہی بیِتی، باطن پردہ دے اُٹھائیا۔ تُوں پرماتما آتما دی اپنے نال لگا پریِتی، پریِتم ہو کے جوڑ جُڑائیا۔ سَتجُگ تریتا دواپرتیری کھیل سدا رہی انڈیٹِھی، جگت نیتر جیو جہان نظر کوئے نہ پائیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، در تیرے منگ منگائیا۔ اوتار کہن ساڈا وقت ویکھ لےَ پوُرا، پاربرہم تیری سرنائیا۔ اِکو بخش اپنا نوُرا، جوتی جاتے کر رُشنائیا۔ کلجُگ جیو رہے نہ موُرکھ موُڑھا، چتُر سُگھڑ سُچجے دے بنائیا۔ نِرگُن دھار بخش کے دھوُڑا،

مستک ٹِکّے اگمّ رمائیا۔ نظری آ حاضر حضوُرا، ہر ہِردے سوبھا پائیا۔ انحد شبد وجا تُورا، تُرت اپنا نام جنائیا۔ ساڈی عرض کر منظُورا، در ٹھانڈے سیِس جھُکائیا۔ اوتار کہن تُوں سرب سوامی بھرپوُرا، پت پرمیشور اِک اکھوائیا۔ جوتی جوت سروُپ ہرِ، آپ اپنی کِرپا کر، ایکا دے دُھر دا ور، نِہکلنک نرائن نر، مہاراج شیرسِنگھ وِشنوُں بھگوان، جُگ چؤکڑی نِت نوِت نِرگُن سرگُن تیرا نام صِفتاں وِچ کر کے آئے مشہوُرا، شبد گُروُ دھار جنائیا۔

۴ ساوَن شہنشاہی سمت ۵ گُرنام سِنگھ دے گرِہ ویرکا

اوتارو سُنی اگمّی عرض، پُرکھ اکال اکال جنائیا۔ سب دی پوُرب ویکھاں غرض، لہنا دیواں تھاؤں تھائنیا۔ دھرم دا پوُرا کراں فرض، حُکمی شبد شبد سمجھائیا۔ کلجُگ میٹاں اندھیرا گرد، گردش ویکھاں جگت لوکائیا۔ چُھری شرع رہن نہ دیواں کرد، قاتل مقتُول روُپ نہ کوئے درسائیا۔ جودھا سوُربیِر مردانہ بن کے مرد، مدد کراں تھاؤں تھائنیا۔ اگلا کھیل دسّاں اسچرج، جِس دی سمجھ کوئے نہ پائیا۔ دو جہاناں ہون نہ دیواں حرج، ہر ہِردا تکاّں چائیں چائنیا۔ غریِب نِمانیاں ونڈاں درد، دُکھیاں دُکھ گوائیا۔ ساچے نام دی بدل دیواں طرز، راگ انادی اِک شنوائیا۔ سچ جَیکارا بولاں گرج، غرض سب دی ویکھ وکھائیا۔ چار جُگ دی پوُرب ویکھاں فرد، جوتی جوت سروُپ ہرِ، آپ اپنی کِرپا کر، کرے کھیل دُھر دا ہرِ، دُھر دا حُکم اِک اُپجائیا۔ اوتارو تُہاڈا سُنیا انتر سندیسہ، سندھیا سرگھی دھیان لگائیا۔ جُگ چؤکڑی خیال رکھاں ہمیشہ، سَتجُگ تریتا دواپرکلجُگ بُھل وِچ نہ آئیا۔ ایکنکارا بن کے دُھر دا نیتا، نر نرائن ہو کے کھوج کھوجائیا۔ لیکھا جاناں سچکھنڈ ساچے دیسا، دھرنی دھرت دھوَل پردہ دیاں اُٹھائیا۔ خبردار کراں شبدی سُت دُلارا بیٹا، حُکم حُکم نال اُٹھائیا۔ دو جہان بناواں نیِتا، نیانکار اِک اکھوائیا۔ ساچے بھگتاں کرے ہیتا، گُرمُکھاں جوڑ جُڑائیا۔ سیِس دی منگے کوئی نہ بھیٹا، جگدیِش حُکمے کار کمائیا۔ نِرگُن دھار ہوواں کھیوٹ کھیٹا، سرگُن نئیا مات چلائیا۔ جوتی جوت سروُپ ہرِ، آپ اپنی کِرپا کر، دیونہارا دُھر دا ور، وست امولک اگمّ ورتائیا۔ اوتارو تُہاڈی سُنی انتر آواز، جو بِن رسنا دِتی سُنائیا۔ سارا بھیوَ کھولاں راز، پردہ رہن کوئے نہ پائیا۔ سرِشٹی درِشٹی دیاں سادھ، سادھنا رہن کوئے نہ پائیا۔ شبد سُناواں دُھر دا

ناد، اگمّی راگ الائیا۔ درِشٹی سب دی جائے جاگ، سوئی سُرتی لَواں اُٹھائیا۔ بُدھی رہے کوئی نہ کاگ، ہنس گُرمُکھ لَواں پرگٹائیا۔ کلجُگ اگن بُجھاواں آگ، امرت میگھ اِک برسائیا۔ تُہاڈی بیننتی دا اِک جواب، دُھر سندیسہ دیاں سُنائیا۔ جِس کل کلکی دا لیَندے رہے خواب، سُفنیاں وِچ دھیان لگائیا۔ اوہ کھیل کرے پربھ آپ، اپنا پردہ آپ چُکائیا۔ دو جہاناں دسّ کے جاپ، لکھّ چؤراسی کرے پڑھائیا۔ کلجُگ کوُڑی کِریا میٹ کے پاپ، پتت پُنیِت آپ لئے بنائیا۔ پاربرہم برہم بنا کے ساک، سجّن اِکو اِک اکھوائیا۔ سچ دوار دا کھول کے تاک، کھتری براہمن شوُدر وَیش لئے لنگھائیا۔ پریم پریِتی وِچ ہو کے چاک، سیوک اپنی سیو کمائیا۔ کلجُگ کوُڑی کِریا میٹے خاک، خالص اپنا رنگ دئے چڑھائیا۔ جھگڑا رہن نہ دیوے ذات پات، دیِن مذہب کرے نہ کوئے لڑائیا۔ صدی چؤدھویں میٹ اندھیری رات، نوُری چند اِک رُشنائیا۔ سب نوُں بخش دیواں دات، نام کلمہ جھولی پائیا۔ ہِندوُ مُسلم سِکھ عیِسائی بنا کے اِک جماعت، طُلبیاں کراں حق پڑھائیا۔ تُہاڈی منسا پوُری کر کے خواہش، خالص اپنا گھر وکھائیا۔ پُرکھ اکالا باہروں کرنا نہ پئے تلاش، کایا مندر اندر مِل کے وجےّ ودھائیا۔ دُھر دی منزل دے کے گھاٹ، پؤڑی ڈنڈے نام چڑھائیا۔ آون جاون میٹ کے واٹ، بھگت سُہیلے جوت سمائیا۔ آتم برہم دا دے کے ساتھ، پاربرہم دا میل مِلائیا۔ نِج گرِہ کر کے واس، واسطہ اپنے نال جُڑائیا۔ ساچے منڈل پا کے راس، سُرتی شبد گوپی کاہن نچائیا۔ تُہاڈا سُکھالا کراں ساس، جو ساہ ساہ دِھیائیا۔ نِرگُن نوُر کر پرکاش، جوتی جاتا ڈگمگائیا۔ کل کلکی پرگٹ ہو کے آپ، آپ اپنا راہ چلائیا۔ روُح بُت کر کے پاک، پَیغمبراں توں پرے کراں صفائیا۔ لکھّ چؤراسی پُچھاں وات، چارے کھانی ویکھ وکھائیا۔ سب نوُں اِک دا دے وِشواس، وِشیاں توں باہر کڈھائیا۔ جوتی جوت سروُپ ہرِ، آپ اپنی کِرپا کر، کرے کھیل ساچا ہرِ، نِہکلنک نرائن نر، مہاراج شیرسِنگھ وِشنوُں بھگوان، تن وجوُد ماٹی خاک دا بدل لباس، جوتی جاتا ہو کے ویکھ وکھائیا۔

۴ ساوَن شہنشاہی سمت ۵ ڈا بلونت سِنگھ دے گرِہ ویرکا

پُرکھ اکال کہے اوتارو ہوواں مِہربان، سچکھنڈ نِواسی ہو کے دَیا کمائیا۔ سو پُرکھ نِرنجن ہو کے دیواں دان، داتا دانی دَیا کمائیا۔ ہرِ پُرکھ نِرنجن ہو کے کِرپا کراں مہان، مہما اکتھ کتھ دِرڑائیا۔ آد نِرنجن ہو کے دیِپک جگاواں مہان، نِرگُن نوُر نوُر رُشنائیا۔ جودھا سوُربیِر بن سِری بھگوان، بھگوَن ہو کے ویکھ وکھائیا۔ ابناشی کرتا ہو کے دیواں مان، مان نِمانیاں آپ اکھوائیا۔ پاربرہم ہو کے ویکھاں مار دھیان، بِن اکھّاں اکھّ اُٹھائیا۔ برہم دا لیکھا کراں پروان، پرم پُرکھ اپنی کار کمائیا۔ وِشن برہما شِو دیوت سُر سارے سیِس جھُکان، سِر سکے نہ کوئے اُٹھائیا۔ دو جہاناں مرد مردانہ نؤجوانا سندیسہ دیواں آن، اَنک کل دھاری اپنی کل ورتائیا۔ جِس دی نِرگُن سرگُن کھیل مہان، نِروَیر نِراکار نِرنکار اپنی کار کمائیا۔ پرگٹ ہوواں جودھا سوُربیِر مرد مردان، بھےَ بھیانک ویکھاں تھاؤں تھائنیا۔ تیئی اوتارو سب نوُں کراں سوادھان، آلس نِندرا رہے نہ رائیا۔ سچ دا مالک ہو پردھان، کوُڑی کِریا پھول پُھلائیا۔ کلجُگ میٹاں جھوُٹھ نِشان، نِشانہ اِکو نام جنائیا۔ شرع دا رہن نہ دیواں کوئے شیَطان، چُھری بنے نہ جگت قصائیا۔ ہؤمے ہنگتا گڑھ توڑاں ابِھمان، من کا منکا آپ بھوائیا۔ کراں کھیل وِچ جہان، جہالت میٹاں کوُڑ لوکائیا۔ تُہاڈی کرنی سب دی کراں پروان، پرم پُرکھ ہو کے ویکھ وکھائیا۔ سَت دھرم دا بنا اِک وِدھان، حُکم سندیسہ اِک سُنائیا۔ نؤ کھنڈ پرِتھمی ستّ دیِپ اِکو اِشٹ دِسے وِچ جہان، دوُسر سیِس نہ کِسے نِوائیا۔ لیکھا جاناں شاستر سِمرت وید پُران، اِنجیِل قرآن کھانی بانی پردہ دیاں اُٹھائیا۔ جوتی جوت سروُپ ہرِ، آپ اپنی کِرپا کر، کرے کھیل دُھر دا ہرِ، ہرِ وڈّا وڈ وڈیائیا۔ پُرکھ اکال کہے اوتارو ایکا دیواں نام سندیسہ، دُھر دی دھار آپ پرگٹائیا۔ جِس نوُں منّن وِشن برہما شِو گنیشا، سُرپت نِیوں نِیوں سیِس نِوائیا۔ کھیل کھِلاواں سچکھنڈ دیسا، درگاہ ساچی سوبھا پائیا۔ تُہاڈا سب دا کر کے ایکا، ایکنکار ہو کے ویکھ وکھائیا۔ سب نوُں اِکو بخش کے ٹیکا، ٹِکّے مستک دھوُڑی خاک رمائیا۔ دیِن دُنی دی بُدھ کراں بِبیکا، دُرمت مَیل کراں صفائیا۔ نال رلا شبد گُروُ گوبِند آد جُگاد دا بیٹا، جِس نوُں تتاں والی جنمے کوئے نہ مائیا۔ اوہ ایتھے اوتھے دو جہاناں ہووے کھیوٹ کھیٹا، نئیا نؤکا نام اِک چلائیا۔ بھگت اُدھارنا جِس دا آد جُگاد پیشہ، پیشیِنگوئی سب دی ویکھ وکھائیا۔ لیکھا جانے موُنڈ مُنڈائے دھاری کیسا، پردہ اوہلا آپ اُٹھائیا۔ آتم پرماتم پرماتم آتم پاربرہم برہم دسےّ اپنا ہیتا، ہِتکاری ہو کے کھوج کھوجائیا۔

نِرگُن سب نے منّنا نیِتا، نر نِرنکار نوُر الاہیِا۔ صدی چؤدھویں سب دا پوُرا ہونا ٹھیکا، لیکھا سب دا دئے مُکائیا۔ اَگوں دیوے نام سندیسہ، شبد اگمّی کرے پڑھائیا۔ جوتی جوت سروُپ ہرِ، آپ اپنی کِرپا کر، ایکا دینا دُھر دا ور، دُھر دی دھار اِک سمجھائیا۔ پُرکھ اکال کہے اوتارو کراں کھیل مہانا، منسا سب دی ویکھ وکھائیا۔ شبدی ناد دے ترانہ، تُریا توں پرے دیاں دِرڑائیا۔ جِتھے نِرگُن نوُر جوت مہانا، سوُریہ چند کرے رُشنائیا۔ تخت نِواسی نؤجوانا، سِری بھگوان سوبھا پائیا۔ جِس نوُں جھُکے زِمیں اسمانا، گگن گگننتر لاگن پائنیا۔ سو مالک پہرے انتم اپنا جامہ، سمبل نگر سوبھا پائیا۔ جِس نوُں بُدھی کرے نہ کوئے پہچانا، شاستر سکے نہ کوئے دِرڑائیا۔ لبھ سکے نہ کوئے وِدوانا، اکھّراں والی نہ کوئے پڑھائیا۔ جِس نے دیِن دُنی دا کلجُگ انتم بدل دینا زمانہ، سَتگُر سچ دئے پرگٹائیا۔ شرع دا رہے نہ کوئی بے اِیمانہ، بیوہ کرے خلق خُدائیا۔ ساچا نام سندیسہ دئے پَیغاما، پَیغمبراں توں پرے کرے پڑھائیا۔ جِس نوُں محمد منّیا مہدی اِماما، مالک خالق ہو کے ویکھ وکھائیا۔ جِس دا محل اٹل اگمّ اتھاہ عالیشانا، عالم عِلم وِچ نہ کِسے سمجھائیا۔ اوہ صاحِب سُلطان والی دو جہانا، نِرگُن سرگُن سرگُن نِرگُن اپنی کار کمائیا۔ جِس نوُں تیئی اوتار نِو نِو کرن پرناما، ڈنڈاوت وِچ سیِس نِوائیا۔ اوہ کرے کھیل اِک مہانا، مِہربان اپنا حُکم ورتائیا۔ نوَ نؤ چار جھُلا اِک نِشانہ، نِشانے پِچھلے دئے بدلائیا۔ ہرِجن رہن نہ دیوے کوئے بیگانہ، گُرمُکھ اپنے گھر وسائیا۔ جوتی جوت سروُپ ہرِ، آپ اپنی کِرپا کر، دیونہارا دُھر دا ور، دُھر دا مالک اِک اکھوائیا۔ پُرکھ اکال کہے دھرنی دھرت دھوَل تکّو راہ، دھؤل دیاں جنائیا۔ نِگاہ مارو جل تھل اسگاہ، مہیئل ویکھ وکھائیا۔ جِس نے رچنا لئی رچا، جُگ جُگ اپنی کار کمائیا۔ سو لہنا دینا سب دا دئے مُکا، مُکمل اپنا حُکم ورتائیا۔ نِرگُن نوُر کر رُشنا، کلجُگ اندھ اگیان دئے مِٹائیا۔ ساچے مارگ دئے لا، سَتجُگ سَت سَت وکھائیا۔ سب دا بن کے پِتا ماں، سنت سُہیلے گود ٹِکائیا۔ ساڈھے تِنّ ہتّھ سُہا کے گراں، نؤ دوارے لیکھا دئے مُکائیا۔ آتم جوتی کر رُشنا، مندر اندر نوُر نوُرانہ ڈگمگائیا۔ جِس نوُں پَیغمبر کہہ کے آئے خُدا، خود مالک نوُر الاہیِا۔ کِسے نوُں رہن نہ دیوے جُدا، جُز وکھرا ونڈ نہ کوئے ونڈائیا۔ سو سوامی بن کے دِلرُبا، رحمت اپنی حق کمائیا۔ اُس دا اِکو کلمہ اِک ہونی صدا، آواز اِکو اِک پرگٹائیا۔ سو لیکھا جانے تھاؤں تھاں، تھان تھننتر ویکھ وکھائیا۔ اوتارو سب دا لیکھا دئے مُکا، مُکمل اپنا حُکم چلائیا۔ کلجُگ انتم کرے نیاں، عدل اِنصاف آپ وکھائیا۔ ویکھنہارا دو جہاں، جہاں تہاں ہوئے سہائیا۔ جوتی جوت سروُپ ہرِ،

آپ اپنی کِرپا کر، کرے کھیل ساچا ہرِ، نِہکلنک نرائن نر، مہاراج شیرسِنگھ وِشنوُں بھگوان، آد جُگاد جُگ چؤکڑی نِت نوِت دیونہارا دان، داتا دانی دَیاوان اِک اکھوائیا۔

۷ ساوَن شہنشاہی سمت ۵ جمعدار کِشن سِنگھ دے نوِت ہرِ بھگت دوار جیٹھوُوال

جنم وِچوں مِلی جنم دی دات، داتے دِتی ورتائیا۔ اپنے نال بنا کے اپنے ساک، سجّن اپنے لئے پرگٹائیا۔ لالو دے لیکھے لا کے سواس، نانک لہنا جھولی پائیا۔ بھگتاں دی بھگت سُہا کے جماعت، سنگی سنگیِاں نال رکھائیا۔ اگلا لیکھا پندراں کتّک نوُں دسّانگا خاص، خالص پردہ لاہیِا۔ جوتی جوت سروُپ ہرِ، آپ اپنی کِرپا کر، کرے کھیل ساچا ہرِ، سچ کرنی کار کمائیا۔ پندراں کتّک دیوے مان، مان ملِے وڈیائیا۔ پنج تت کر پروان، پروانہ اگلا دئے سمجھائیا۔ کرے کھیل مہان، مِہربان مِہر نظر اُٹھائیا۔ ماجھا مالوا دوآبہ جموں پنج پنج گُرمُکھ آون نؤجوان، جوبن ونتے رنگ رنگائیا۔ بِردھ بال نہ کوئے پہچان، وڈّا چھوٹا نہ کوئے وڈیائیا۔ جوتی جوت سروُپ ہرِ، آپ اپنی کِرپا کر، سد دیونہار سرنائیا۔ پندراں کتّک کہے گُرمُکھ پریم پیارے آؤن گے۔ ماجھا مالوا دوآبہ جموں اِک اِک پگڑی نال رکھاؤن گے۔ رات ساڈھے نؤ وجے کِشن سِنگھ دے سیِس سجاؤن گے۔ پُرکھ ابناشی مِل کے ہرِ جگدیِش، سارے اِس دی منگ منگاؤن گے۔ سانوُں اِس دے مِلن دی سدا ریِجھ، ہتّھ جوڑ کے واسطہ پاؤن گے۔ پربھوُ بے شک ایہدی آتما تیری چیز، وست امولک اپنے نال رلاؤن گے۔ جوتی جوت سروُپ ہرِ، آپ اپنی کِرپا کر، کرے کھیل ساچا ہرِ، سچ کرنی کار کماؤن گے۔ ساری سنگت کرے ارداس، نِیوں نِیوں سیِس نِوائیا۔ پھیر کِشن سِنگھ رہن دیواں سنگت پاس، بِنا بیننتی سکے نہ کوئے بچائیا۔ اِس دا نؤ مگھّر نوُں اَخیِری سی سواس، سواس پربھ دے لیکھے لائیا۔ ایہہ کِرپا کیِتی خاص، خالص اپنا رنگ رنگائیا۔ پنجاں لِکھاریاں ضرور ہونا ساتھ، سگلا سنگ بنائیا۔ درشن سِنگھ نوُں مار لیَنی آواز، دِلّیؤں لیَنا بُلائیا۔ سب نے جانا جاگ، سویا رہن کوئے نہ پائیا۔ بھگت بھگوان دا اِک وَیراگ، وَیری نظر کوئے نہ آئیا۔ سب توں سریشٹ اُتم صاحِب سَتگُر دا ساتھ، گُرمُکھ سوہنا نظری آئیا۔ جوتی

جوت سروُپ ہرِ، آپ اپنی کِرپا کر، سد اپنا رنگ رنگائیا۔ پندراں کتّک کہے پنجاں پنجاں پنجاں پنجاں دے ہونے سوہنے بستر، پنج پنچم نال وڈیائیا۔ ننگی دھار موڈھیاں تے ہونے ششتر، سوہنے روُپ بنائیا۔ سب نے جانا اُپر استر، شاہ سوارا آسن لائیا۔ کھانا کھانا نہیں وِچ کِسے نے برتن، حُکم دِتا دِرڑائیا۔ سب دا سانجھا ہونا خرچن، حِصّہ وڈّا چھوٹا پائیا۔ کرے کھیل پربھوُ پربھ مردن، پاربرہم پربھ ہوئے سہائیا۔ جوتی جوت سروُپ ہرِ، آپ اپنی کِرپا کر، کرے کھیل ساچا ہرِ، سچ کرنی کار کمائیا۔ پندراں کتّک کہے صاحِب سَتگُر دے لکّ نوُں بنھنا سنگل، کُنڈی کُنڈی وِچ اڑائیا۔ سب نے گاؤنا منگل، سِنگھاسن اُتے ٹِکائیا۔ پنجاں پیاریاں لاؤنا چندن، مستک نال چُھہائیا۔ پنجاں لِکھاریِاں کر کے بندن، آسن لیَنا جمائیا۔ میانوں ننگے کڈھ کے کھنڈن، چنڈی دینی چمکائیا۔ سب نے ڈھولا گاؤنا چھندن، جَیکارا اِکو وار لگائیا۔ اَگے صاحِب سَتگُر چاڑھے رنگن، اپنا رنگ رنگائیا۔ دھوُڑی چرن دے کے ساچا سگن، پاپاں کرے صفائیا۔ جوتی جوت سروُپ ہرِ، آپ اپنی کِرپا کر، کرے کھیل ساچا ہرِ، سچ کرنی کار کمائیا۔ پندراں کتّک کہے ایہہ کھیل ہونا اَلھڑ پِنڈی، پِنڈ پِنڈ دینا بخشائیا۔ اِک لِکھاری لیکھ لِکھے وِچوں ہِندی، ہِندوستان دئے دِرڑائیا۔ پنجاں لِکھاریاں مستک لاؤنی لال بِندی، بِندرابن دا لیکھا دینا مُکائیا۔ پگڑی دی دھار رکھنی ڈِنگی، ٹیڈھا روُپ درسائیا۔ پھیر زِندگانی بخشنی زِندی، زِندہ دئے کرائیا۔ اِک گُرسِکھ نے وِچوں اُٹھ کے جانا نِندی، ایہہ اپرادھی نوُر خُدائیا۔ اِک بچّی نال ہووے چِھندی، دوِندر کول بہائیا۔ جوتی جوت سروُپ ہرِ، آپ اپنی کِرپا کر، کرے کھیل ساچا ہرِ، سچ دا میلا لئے مِلائیا۔ کتّک کہے میرا لیکھا کوئی نہ جانے کتّک، کٹک کوٹن گئے وِہائیا۔ کرِشن نے اِک بچن سُنا بدھک، بدھک دِتا جنائیا۔ جِس ویلے دھرم سَت رہیا نہ اَدھک، دھیِرج دھیِر نہ کوئے دھرائیا۔ چاروں کُنٹ لگّی آتش، اگنی اگّ نہ کوئے بُجھائیا۔ ثابت رہیا کوئی نہ شخص، شخصیّت نظر کوئے نہ آئیا۔ چاروں کُنٹ پَینا بخت، دھیِرج دھیِر نہ کوئے دھرائیا۔ بِنا بھگتاں توں رہے کوئی نہ مست، خُماری نام دینی چڑھائیا۔ میرا کاہن آؤنا پرت، نِرگُن نِروَیر ویس وٹائیا۔ آوے اُتے دھرت، دھرنی دھوَل ویکھ وکھائیا۔ سب دی پوُری کرے شرط، شرع اگلی دئے جنائیا۔ جوتی جوت سروُپ ہرِ، آپ اپنی کِرپا کر، کرے کھیل ساچا ہرِ، سچ دیوے مان وڈیائیا۔ کتّک کہے میَں تکدا، تقدیِر ویکھ وکھائیا۔ کی حُکم ہووے یک دا، یدی کی سمجھائیا۔ کی اِشارہ ملِے اکھّ دا، کی شبد دُھن شنوائیا۔ کی سندیسہ ملِے سچ دا، سچ

وِچ وڈیائیا۔ جاں خبر سُنی پربھ جن بھگتاں آپ رکھدا، رکھک ہو کے ویکھ وکھائیا۔ مرن وِچوں جیِون کڈھدا، جیِون وِچوں جیِون رکھائیا۔ جِس نال پیار اُس نوُں کدے نہ چھڈدا، جُگ جنم دے وِچھڑے اپنے نال رکھائیا۔ سنسار بھرم ماس ناڑی ہڈّ دا، چمّ کمّ کِسے نہ آئیا۔ کدے وسیرا نہیں بھگت بھگوان اڈّ دا، گھر اِکو سوبھا پائیا۔ دوہاں اِکو دیِپک جگدا، جگ کرے رُشنائیا۔ جِس دا لہنا اُس نوُں سدّدا، اوسے دی جھولی پائیا۔ پربھ دا پیار سدا سدا جائے ودھدا، بھگتی بھگتاں نال رکھائیا۔ ایہہ لیکھا وِشنوُں وِشوَ جدّ دا، یادواں کرِشن گیا سمجھائیا۔ پَیغمبراں ویلا رہنا نہیں حج دا، کعبے کربلا وانگ دُہائیا۔ جوتی جوت سروُپ ہرِ، آپ اپنی کِرپا کر، کرے کھیل ساچا ہرِ، نِہکلنک نرائن نر، مہاراج شیرسِنگھ وِشنوُں بھگوان، اپنی کرنی توں کدے نہیں بھجّدا، بھجّیاں اپنے نال رکھائیا۔